قىرعىزستان پرەزيدەنتى سادىر جاپاروۆ تاجىكستانمەن شەكاراداعى قارۋلى قاقتىعىسقا بايلانىستى ەل ازاماتتارىنا تىكەلەي ەفيردە ۇندەۋ جاسادى, دەپ حابارلايدى Egemen.kz.
پرەزيدەنت جولداۋىندا وتانىن سۇيەتىن ەرلەردى تاربيەلەگەن قىرعىز انالارىنا العىسىن ءبىلدىردى.
«وتان ءۇشىن جان بەرىپ, قازا تاپقان جاۋىنگەرلەردىڭ انالارىنا ايتارىم ناعىز باتىرلاردى تاربيەلەدىڭىزدەر, مەن سىزدەرگە باس يەمىن. ءاربىر باتىردىڭ ەرلىگى قىرعىز حالقىنىڭ جادىندا ماڭگى ساقتالادى. وتان قورعاۋ جولىندا قازا تاپقان ءاربىر جاۋىنگەردىڭ تۋعان-تۋىستارى مەن جاقىندارىنا قايعىلارىنا ورتاقتاسىپ كوڭىل ايتامىن», دەدى جاپاروۆ.
ونىڭ ايتۋىنشا, قاقتىعىس كەزىندە قيراعان ۇيلەردى قالپىنا كەلتىرۋگە مەملەكەتتىڭ مۇمكىندىگى بار.
«قاقتىعىس كەزىندە قيراپ, ورتەنگەن ۇيلەردى تەز ارادا قالپىنا كەلتىرەمىز. از ۋاقىت ىشىندە ءبىز ايتارلىقتاي نىعايدىق. بۇل ىشكى جانە سىرتقى جاۋلاردى دا قاتتى الاڭداتادى», دەدى قىرعىز رەسپۋبليكاسىنىڭ پرەزيدەنتى.
سونداي-اق ول قايعىلى وقيعا بولعان باتكەنگە حالىقتىڭ بارماۋىن ءوتىندى. ونىڭ سوزىنشە, شەكاراداعى ماسەلەنى رەتتەۋگە مەملەكەتتىڭ اسكەري الەۋەتى جەتكىلىكتى.
«تاعى ءبىر ايتا كەتەتىن جايت: مەن باتكەنگە بارعىسى كەلەتىن جىگىتتەردى سابىرعا شاقىرامىن. مەملەكەتتىڭ اسكەري الەۋەتى ءبىر دەڭگەيدە دەپ ويلاماڭىز. قۇدايعا شۇكىر, بۇگىندە اسكەردىڭ جاعدايى باسقاشا. شەكارا بۇزۋشىلارعا تويتارىس بەرۋگە بىزدە باتىل جاۋىنگەرلەر مەن كۇش جەتكىلىكتى. وعان دالەل جەرىمىزگە باسىپ كىرگەندەردىڭ جازالانۋى. ءبىز حالىقتان سابىر ساقتاپ, بيلىك پەن قارۋلى كۇشتەردىڭ ارەكەتىن بىرلىكپەن قولداۋدى سۇرايمىز», دەدى سادىر جاپاروۆ.
ەسكە سالايىق, 16 قىركۇيەك كۇنى تاڭەرتەڭ قىرعىزستان مەن تاجىكستان شەكاراسىنداعى بىرنەشە ۋچاسكەدە اتىس باستالدى. قىرعىز رەسپۋبليكاسسىنىڭ ۇقك شەكارا قىزمەتىنىڭ مالىمەتىنشە, شامامەن ساعات 6:00-دە تاجىك تاراپى شەكارا وتريادتارى مەن قىرعىز تاراپىنىڭ پوزيتسيالارىن اتقىلاي باستاعان.