گازەت ءفوتوتىلشىسى ورىنباي بالمۇرات كەشە تۇسىرگەن مىنا سۋرەتتەگى استانا قالاسىنىڭ № 54 مەكتەپ-ليتسەيىنىڭ 11-سىنىپ وقۋشىلارى سەكىلدى ەلىمىزدىڭ سان مىڭداعان بويجەتكەندەرى مەن بوزبالالارى ءۇشىن بۇگىن ەڭ شالعايداعى اۋىلداردان باستاپ ۇلكەن شاھارلارعا دەيىنگى بارلىق مەكتەپتەردە سوڭعى قوڭىراۋ سوعىلادى.
مەكتەپ بىتىرۋشىلەر مەشىتتە بولدى
“نۇر وتان” حدپ “جاس وتان” جق “جاس ۇرپاقتىڭ بويىنا رۋحاني پاراساتتىلىق قۇندىلىقتاردى قالىپتاستىرۋ مەن دامىتۋدىڭ” تۇجىرىمداماسى اياسىندا كوپتەگەن قوعامعا پايداسى مول ءىس-شارالاردى اتقارۋ ۇستىندە. سونىڭ ءبىر دالەلى, كۇنى كەشە عانا وقۋ جىلىن اياقتاعان ەلوردالىق مەكتەپ ءبىتىرۋشى تۇلەكتەر “جاس وتان” جق جانە “نۇر استانا” ورتالىق مەشىتىنىڭ ۇيىمداستىرۋىمەن “نۇر استانا” مەشىتىنە كەلىپ, تانىمى مەن تاعىلىمى, ءتالىمى مەن ءتاربيەسى مول رۋحاني ءدارىس تىڭداپ قايتتى.
“كەزدەسۋدىڭ ماقساتى – ءومىردىڭ ءبىر بەلەسىنەن ەكىنشى بەلەسىنە اياق باسقان ءتۇلەكتەرگە الداعى ومىرلەرىنە ءساتتىلىك ءتىلەپ, “باتامەن ەل كوگەرەر” دەگەن اتالى ءسوزدى نەگىزگە الا وتىرىپ, جاستارعا باتا بەرىپ, اق جول تىلەۋ” – دەيدى اتالمىش رۋحاني ءىس-شارانى ۇيىمداستىرۋشىلار.
ەلوردانىڭ 15 مەكتەبىنەن كەلگەن 400-گە جۋىق مەكتەپ وقۋشىلارى ءوزدەرىنە رۋحاني ازىق بولاتىن بۇل ءدارىستى ۇيىپ تىڭدادى. “نۇر استانا” ورتالىق مەشىتىنىڭ باس يمامى ق.زاڭقوەۆ ءدارىس بارىسىندا وقۋشىلارعا وي سالاتىن سالماقتى سوزدەر ايتتى. باس يمام ءوز سوزىندە: “سىزدەردىڭ الدارىڭىزدا ءدال قازىر ءبىر-اق ماقسات بار. ول قالاي دا جوعارعى وقۋ ورنىنا ءتۇسۋ. ياعني, ستۋدەنت اتانۋ. اتا-انا مەن ۇستازدىڭ ۇكىلى ءۇمىتىن اقتاۋ. لايىم جاراتقان حاق جار بولىپ, سول نيەتتەرىڭىزگە جەتكىزسىن! ەلباسىمىز: ء“بىزدىڭ بولاشاعىمىز جاستار” دەپ سىزدەرگە ءۇلكەن سەنىم ارتىپ وتىر. سەنىم ارتىلىپ وتىرعان قانداي جاستار؟ ارينە, ءبىلىمدى دە بىلىكتى جاستار” – دەي كەلە ءبىلىم الۋدىڭ ماڭىزدىلىعىنا توقتالدى.
ال, “جاس وتان” جق-نىڭ رەسمي وكىلى نۇرلان قۇلمانوۆ ءوز سوزىندە ادامزات جولىندا يماندىلىقتىڭ ەرەكشەلىگىن تىلگە تيەك ەتسە, “نۇر استانا” ورتالىق مەشىتىنىڭ نايب يمامى تولەبي وسپان “باقىتتىڭ باستاۋى – يمان” اتتى تاقىرىپقا كەڭىنەن توقتالىپ, ادام ءۇشىن باقىتتىڭ نە ەكەنىن, شىنايى باقىتقا جەتۋدىڭ جولدارىن قۇران اياتتارىنان ۇزىندىلەر كەلتىرە وتىرىپ باياندادى. ەڭ سوڭىندا باس يمام ق.زاڭقوەۆ قۇران وقىپ, جاس جەتكىنشەكتەرگە اق جول تىلەپ باتا بەردى.
وسى جۇزدەسۋدەن كەيىن مەكتەپ ءتۇلەكتەرىنە “نۇر استانا” ورتالىق مەشىتى مەن “جاس وتان” جق دايىنداعان كىتاپتار, گازەت-جۋرنالدار, اۋديو ديسكىلەر تەگىن تاراتىلدى.
اراي ۇيرەنىشبەكقىزى.