ەجەلگى قوعامعا دا, قازىرگى قوعامعا دا ءتان قايشىلىقتاردىڭ ءبىرى – ليبەرالدىق جانە ءداستۇرشىل كوزقاراستاردى جاقتاۋشىلار اراسىنداعى يدەولوگيالىق تارتىس. عىلىمي ەڭبەكتەردە بۇل كونفرونتاتسيا ادەتتە «جاڭا – ەسكى», «مودەرنيزم – كونسەرۆاتيزم», «رەفورمالار – توقىراۋ», «وزگەرىستەر مەن داستۇرلەر», «داستۇرلەر مەن مودەرنيزاتسيا» تاعى باسقا بالاما ءسوز تىركەستەرىمەن سيپاتتالادى. بىراق قانداي تىلدىك تىركەستەر قولدانىلسا دا, بۇل ءبىر جاعىنان قالىپتاسقان داعدىلار, ەكىنشى جاعىنان ونى وزگەرتۋگە ۇمتىلعان جاڭانىڭ اراسىنداعى قاراما-قايشىلىقتى بىلدىرەدى.
قازاقستان قوعامىندا باسقا ەلدەردەگى سياقتى داستۇرشىلدەر دە, ليبەرالدار دا بار. ءبىزدىڭ ەلىمىزدە بۇل ەكى توپتىڭ ساندىق قاتىناسى قانداي جانە ولاردىڭ قايسىسى بولاشاقتا باسىمدىققا يە بولادى دەگەن سۇراق كوپتەگەن الەۋمەتتىك زەرتتەۋدى قاجەت ەتەدى. ءدىنتانۋ ءبولىمىنىڭ جوبالارى اياسىندا جۇزەگە اسىرىلعان ديسكۋرس-تالداۋدىڭ ناتيجەلەرىنە سۇيەنەتىن بولساق, قازىرگى تاڭدا ەكى دۇنيەتانىم وكىلدەرى ءجيى پىكىرتالاسقا ءتۇسىپ, قازاقستاندىق بىرەگەيلىك پەن يدەولوگيالىق باعدارلار قانداي بولۋ كەرەكتىگىن مۇلدەم ەكى ءتۇرلى ەلەستەتەدى. بۇل احۋالدى كەلەسى سەبەپتەرمەن تۇسىندىرۋگە بولادى: بىرىنشىدەن, تاۋەلسىزدىك جىلدارىنداعى ۇلتتىق سانا-سەزىمنىڭ قايتا جاندانۋىمەن جانە مادەني سايكەستىكتى ىزدەۋمەن بايلانىستى ءداستۇرلى جانە كەيدە ءدىني قۇندىلىقتاردىڭ وزەكتى بولۋى; ەكىنشىدەن, جاھاندىق وركەنيەتتىڭ ىقپالى مەن مادەني ينتەگراتسيالىق ۇدەرىستەردىڭ ناتيجەسىنەن تۋىنداعان ليبەرالدى كوزقاراستاردىڭ دامۋى.
سونداي-اق تالداۋ ناتيجەلەرىنەن كەلەسى ۇردىستەردى بايقايمىز: قازاقستاندىقتار الەۋمەتتىك ءتارتىپ پەن ەرەجەلەردى تاڭۋعا بەيىم كەلەدى, ولاردان اۋىتقىعان ادامدارعا سىن كوزبەن قارايدى. دۇنيەتانىمدىق قۇندىلىقتار ولشەمى مەن سيپاتى تۇرعىسىنان بەلگىلى ءبىر دەڭگەيدە الەۋمەتتىك توزىمسىزدىكتىڭ جوعارى ەكەنىن ايتۋعا بولادى.
قازاقستاندىقتار ءتۇرلى يدەيالار توڭىرەگىندە توپتاسقان. وسىعان بايلانىستى مەملەكەتتىلىكتى كۇشەيتۋدە ازاماتتىق قۇندىلىقتاردىڭ بەلسەندىلىگىن ارتتىرۋ ماسەلەسى العا شىعادى.
ايكەرىم التايقىزى,
فيلوسوفيا, ساياساتتانۋ جانە ءدىنتانۋ ينستيتۋتىنىڭ جەتەكشى عىلىمي قىزمەتكەرى