مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا ايتىلعان ماسەلەلەر قوعام اراسىندا قىزۋ تالقىلانۋدا. جولداۋدىڭ قاي كەزدە دە ەل دامۋىنا سەپتىگىن تيگىزەر ماڭىزدى قۇجاتقا اينالعانى بەلگىلى.
جۋىردا تۇڭعىش پرەزيدەنت كىتاپحاناسىندا ءماجىلىس دەپۋتاتتارى, ازەربايجان پرەزيدەنتى اكىمشىلىگىنىڭ جانىنداعى الەۋمەتتىك زەرتتەۋلەر ورتالىعى, ەۋرازيالىق ينتەگراتسيا, قازاقستان قوعامدىق دامۋ ينستيتۋتى, قوعامدىق ساياسات, ەكونوميكالىق ساياسات, عىلىم جانە جوعارى ءبىلىم مينيسترلىگى عىلىم كوميتەتىنىڭ مەملەكەت تاريحى, «التەرناتيۆا» وزەكتى زەرتتەۋلەر ورتالىعى جانە قازاقستاننىڭ ستراتەگيالىق زەرتتەۋلەر ينستيتۋتتارىنىڭ باسشىلارى مەن ساراپشىلارى, ۇلتتىق قۇرىلتاي مۇشەلەرى جولداۋداعى باسىمدىقتاردى تالقىلادى.
– ەل پرەزيدەنتى ق.توقاەۆتىڭ قازاقستان حالقىنا جولداۋى قوعامدى جاڭعىرتۋ ۇدەرىسىندەگى ماڭىزدى كەزەڭ. رەسپۋبليكالىق رەفەرەندۋمنىڭ نەگىزىندە قولعا الىنعان كونستيتۋتسيالىق رەفورمانىڭ ءتۇيىندى يدەيالارىنىڭ قيسىندى جالعاسى ىسپەتتەس. مەملەكەتتىك ماڭىزى جوعارى شەشىمدەردى قابىلداۋ پروتسەسىندە وتانداستارىمىزدىڭ شەشۋشى داۋىسقا يە بولۋىنا باسىمدىق بەرىلۋى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءىس جۇزىندە ورىندالىپ جاتقانىن دالەلدەيدى, – دەدى تۇڭعىش پرەزيدەنت كىتاپحاناسىنىڭ ديرەكتورى باقىتجان تەمىربولات.
مەملەكەت باسشىسىنىڭ كەزەكتى جولداۋى جالپىۇلتتىق رەفەرەندۋمنان كەيىن قازاقستاندىقتار ساياسي جاڭعىرتۋ باعىتىن قولداپ, ەلىمىز دامۋدىڭ جاڭا كەزەڭىنە اياق باسقان تۇستا بۇعان دەيىنگى قۇجاتتىڭ زاڭدى جالعاسىنداي قابىلداندى. وسىنى ەسكەرسەك, كەلەسى قادام ەكونوميكانى نىعايتۋعا ارنالماق.
– جولداۋدى بەلگىلى ءبىر سالالارداعى مەملەكەتتىك ساياسات پاراديگماسىن وزگەرتۋ تۇرعىسىنان بەتبۇرىس دەپ اتاۋعا بولادى. الەۋمەتتىك ساياسات تۇبەگەيلى قايتا قارالىپ, قوعامدا تەك مەملەكەتكە عانا ءۇمىت ارتۋ جوق ەكەنى جانە ەلدەگى تۇراقتى جۇمىس ورىندارىنىڭ سانىن ارتتىرۋ ماسەلەسىن تەزىرەك شەشۋ قاجەت ەكەنى ايتىلدى, – دەدى ەۋرازيالىق ينتەگراتسيا ينستيتۋتىنىڭ ديرەكتورى ورازعالي سەلتەەۆ.
جولداۋدا كوتەرىلگەن مىندەتتەر جۇيەلى تۇردە ورىندالاتىن بولسا قازاقستاندىقتاردىڭ تۇرمىس ساپاسى, əل-اۋقاتى ارتاتىنى راس. «جولداۋدىڭ الدىندا ۇلتتىق اۋقىمداعى تەڭدەسسىز كونستيتۋتسيالىق رەفورما بولدى. ەندى مەملەكەت باسشىسى جاڭا ەكونوميكالىق ساياساتتى جۇرگىزۋگە كۇش سالۋ كەرەكتىگىن ايتتى. بارلىق جوسپارلانعان كونستيتۋتسيالىق رەفورما جۇزەگە اسىرىلعاننان كەيىن قازاقستان قۋاتتى ەكونوميكالىق سەرپىلىسكە يە بولادى دەپ سەنىممەن ايتا الامىن», دەدى ەكونوميكالىق ساياسات ينستيتۋتىنىڭ پرەزيدەنتى قايىربەك ارىستانبەكوۆ.
جيىن بارىسىندا بىرقاتار ساراپشى مەملەكەت باسشىسىنىڭ الەۋمەتتىك-ەكونوميكالىق جانە ساياسي باستامالارىنا ءبىراۋىزدان قولداۋ ءبىلدىردى.