دۇيسەنبى كۇنى الماتىداعى بالالار ۇيلەرىندە تاربيەلەنىپ جاتقان دارىندى بالالار “ماكس” دىبىس جازۋ ستۋدياسىنا كەلدى. بۇل جەردە تالانتتى بالالار تانىمال كومپوزيتور جانە بالالارعا ارنالىپ جازىلعان بىرقاتار اندەردىڭ اۆتورى ماقسات جاۋتىكوۆپەن بىرىگىپ, 1 ماۋسىم – بالالاردى قورعاۋ كۇنىنە وراي وتەتىن “مەيىرىم” فەستيۆالىنىڭ ءانۇرانىن جازدى.
– ءبىز “مەيىرىم” بايقاۋ-فەستيۆالىن جىل سايىن وتكىزىپ كەلەمىز. بيىل بۇل ءىستى قازاقستاننىڭ ازاماتتىق اليانسىمەن بىرلەسىپ قولعا الدىق, ياعني ەندىگى جەردە بىزدەر – ءبىر كوماندامىز. ءبىز ءۇشىن بالالارمەن, ەلىمىزدىڭ كەلەشەگىمەن بىرگە بولىپ, تالانتتى ورىنداۋشىلارمەن شىعارماشىلىق وداق قۇرىپ, رۋحاني ءوسىپ, دامىعانىمىز اسا ماڭىزدى, – دەدى مارات وسپانوۆ اتىنداعى قوعامدىق قوردىڭ وكىلى ەلنۇر ءجاشىموۆا. سونداي-اق اكتسيا اياسىندا رەسپۋبليكالىق جانە حالىقارالىق بايقاۋلاردىڭ جۇلدەگەرى, “تامشىلار” اتتى بالالار مۋزىكالىق ۇجىمىنىڭ جەتەكشىسى ماقسات جاۋتىكوۆ شەبەرلىك-سىنىپتارىن وتكىزدى. تاعدىردىڭ تەپەرىشىنە تۋماي جاتىپ تۇسسە دە, تالانتتان كەندە قالماعان بالالار ساحنالىق شەبەرلىكتىڭ, ۆوكال مەن ريتميكانىڭ قىر-سىرلارى تۋرالى دارىستەر الىپ, ۋاقىتتارىن اسا اسەرلى وتكىزدى. ولاردىڭ بارلىعى دەرلىك كاسىپقوي ءان جازۋ ستۋدياسىنىڭ تابالدىرىعىن تۇڭعىش رەت اتتادى. بولاشاقتا وسىلاردىڭ ىشىنەن وزا شىققان ناعىز ۇزدىكتەر ونەردىڭ جالىنا تۇپكىلىكتى جارماسۋى عاجاپ ەمەس. – ەلىمىزدىڭ تانىمال ونەرپازدارىمەن جانە تالانتتى مۋزىكانتتارىمەن مۇنداي فەستيۆالدەردى, شەبەرلىك-دارىستەرىن وتكىزۋ دامۋ ەرەكشەلىكتەرى باسقا جاعدايدا ءجۇرىپ جاتقان جەتىم بالالاردىڭ قابىلەتتەرىن تانىپ, دامىتۋعا مۇمكىندىك بەرەدى. بۇل باستامالار شەكتەۋلەر مەن شەكارالاردى جويىپ, بارلىعىنا تەڭ جاعداي تۋدىرادى. ويتكەنى, ءبارىمىز دە بىرگەمىز جانە بىزدەر ءبىر كوماندامىز, – دەدى قوردىڭ ديرەكتورى باقىت وسپانوۆا. ايناش ەسالي, الماتى. سۋرەتتى تۇسىرگەن بوريس بۋزين.