كونستيتۋتسيالىق سوتتىڭ مارتەبەسى ايقىندالدى

دەپۋتاتتار قاراۋىنا كەلىپ تۇسكەن بىرقاتار قۇجات جونىندە ادىلەت ءمينيسترى قانات مۋسين بايانداما جاسادى. اتاپ ايتقاندا, «قازاقستان رەسپۋبليكاسىنىڭ كونستيتۋتسيالىق سوتى تۋرالى» زاڭ جوباسى قارالدى. جالپى, قۇجات 3 بولىمنەن, 10 تاراۋدان جانە 68 باپتان تۇرادى. ۆەدومستۆو باسشىسىنىڭ ايتۋىنشا, زاڭ جوباسىندا كونستيتۋتسيالىق سوتتىڭ جانە ونىڭ سۋديالارىنىڭ مارتەبەسى, ولاردىڭ كەپىلدىكتەرى مەن قامتاماسىز ەتىلۋى, سونداي-اق كونستيتۋتسيالىق ءىس جۇرگىزۋ ءتارتىبى قامتىلعان.

«كونستيتۋتسيالىق سوت بيلىكتىڭ سوت تار­ماعىنا جاتپايتىنىن اتاپ وتكىم كەلەدى, ويتكەنى بۇل ماسەلە كونستيتۋتسيادا تۇپكىلىكتى شەشىلدى. كونستيتۋتسيالىق سوت ەلىمىزدىڭ بۇكىل اۋماعىندا كونس­تي­تۋتسيانىڭ ۇستەمدىگىن قامتاماسىز ەتەتىن ورگان بولادى. ال كونستيتۋتسيالىق سوتتىڭ سۋديالارى مارتەبەسى كونستيتۋتسيامەن ايقىندا­لاتىن جاۋاپتى مەملەكەتتىك لاۋازىمدى اتقا­راتىن ادامدار. زاڭ جوباسىندا كونستيتۋ­تسيالىق سوت سۋديالارىن تاعايىنداۋ جانە ولار­دىڭ وكى­لەت­تىكتەرىن توقتاتۋ تارتىبىنە بايلانىس­تى ما­سەلەلەر ەگجەي-تەگجەي رەگلامەنتتەلگەن. ولار­دىڭ تاۋەلسىزدىگى مەن كەپىلدىكتەرى دە بەكىتىلگەن.

كونستيتۋتسيالىق سوت سۋديالارىنىڭ جوعارى مارتەبەسىن ەسكەرە وتىرىپ, ولاردى ماتەريالدىق جانە الەۋمەتتىك قامتاماسىز ەتۋ جونىندەگى نورمالار ەنگىزىلگەن. اتاپ ايتقاندا, سوت جۇيەسى تۋرالى كونستيتۋتسيالىق زاڭعا ۇقساس كونستيتۋتسيالىق سوت سۋديالارىنىڭ وتستاۆكاعا شىعۋ ينستيتۋتىن ەنگىزۋ ۇسىنىلادى.

كونستيتۋتسيالىق سوتتى قارجىلاندىرۋ ءتارتىبىن, ونىڭ اپپاراتىنىڭ مارتەبەسىن جانە وسى ورگاننىڭ قىزمەتىن قامتاماسىز ەتۋگە بايلانىستى وزگە دە ماسەلەلەردى قامتيتىن كونستيتۋتسيالىق سوتتىڭ قىزمەتىن ۇيىمداستىرۋ ماسەلەلەرى قاراستىرىلعان», دەدى ق.مۋسين.

سونىمەن قاتار كونستيتۋتسيالىق سوتتىڭ قۇزىرەتى جانە ونى جۇزەگە اسىرۋدىڭ ۇيىم­داستىرۋشىلىق نىساندارى كورسەتىلگەن. ماسە­لەن, كونستيتۋتسيالىق سوتتىڭ قۇزىرەتىنە سايلاۋدى وتكىزۋدىڭ دۇرىستىعى ماسەلەلەرىن قاراۋ, پارلامەنت قابىلداعان زاڭدار مەن حالىق­ارالىق شارتتاردىڭ رەسپۋبليكا كونستي­تۋتسياسىنا سايكەستىگىن قاراۋ, سونداي-اق كونستيتۋتسيا نورمالارىنا رەسمي تۇسىندىرمە بەرۋ جاتقىزىلعان. ياعني كونستيتۋتسيالىق كەڭەستىڭ قولدانىستاعى فۋنكتسيالارى كونستي­تۋتسيالىق سوتقا بەرىلدى.

«ەڭ ماڭىزدىسى, كونستيتۋتسياعا ەنگىزىلگەن وزگەرىستەرگە سايكەس كونستيتۋتسيالىق سوت ازا­مات­تاردىڭ وتىنىشتەرى بويىنشا ولاردىڭ قۇقىق­تارى مەن بوستاندىقتارىنا تىكەلەي تيەتىن نورماتيۆتىك قۇقىقتىق اكتىلەردى كونستي­تۋ­تسياعا سايكەستىگىن قارايدى. سونداي-اق كونستي­تۋتسيالىق سوتقا جۇگىنۋ قۇقىعى باس پروكۋرور مەن ادام قۇقىقتارى جونىندەگى ۋاكىلگە بەرىلدى», دەپ ءتۇسىندىردى ق.مۋسين.

ءمينيستردىڭ سوزىنە سۇيەنسەك, كونستي­تۋ­تسيا­لىق ءىس جۇرگىزۋدىڭ جالپى شارتتارى مەن قاعي­داتتارى بەكىتىلەدى. كونستيتۋتسيالىق سوتقا جولداناتىن وتىنىشتەردىڭ تۇرلەرى, ولاردىڭ نىسانى مەن مازمۇنى ايقىندالادى. زاڭ جوباسىندا ازاماتتاردىڭ كونستيتۋتسيالىق سوتقا جۇگىنۋ ءتارتىبىن بەلگىلەۋ ۇسىنىلعان.

«ازامات داۋلاپ وتىرعان نورماتيۆتىك-قۇ­قىق­تىق اكت ونىڭ قاتىسۋىمەن جالپى يۋريسديكتسيا سوتىندا قولدانىلۋى كەرەك دەگەن تالاپتى بەلگىلەۋ ۇسىنىلادى. بۇل نورمانى بەلگىلەۋ, ەڭ الدىمەن, كونستيتۋتسيالىق سوت ازامات­تاردىڭ وتىنىشتەرى بويىنشا تەك ولاردىڭ قۇقىق­تارى مەن بوستاندىقتارىنا قاتىستى نورما­تيۆتىك-قۇقىقتىق اكتىلەردى تەكسەرەتىنى تۋرالى كونستيتۋتسيا نورماسىن ىسكە اسىرۋ ءۇشىن قا­جەت. كونستيتۋتسيالىق سوتقا جۇگىنگەنگە دەيىن جال­پى يۋريسديكتسيا سوت قۇرالدارىن پايدالانۋ تۋرالى شارت كوپتەگەن ەۋروپا ەلدەرىندە قولدا­نى­لاتىنىن اتاپ وتكەن ءجون», دەدى ق.مۋسين.

جالپى, كونستيتۋتسيالىق سوتتىڭ وتىنىشتەردى قاراۋ ءراسىمى جالپى سوتتارداعى سوت ءىسىن جۇرگىزۋ تارتىبىنەن تۇبەگەيلى ەرەكشەلەنەدى. جوبا بارلىق پروتسەدۋرالىق جانە ۇيىمداستىرۋشىلىق راسىمدەردى بارىنشا جەڭىلدەتۋ قاجەتتىلىگىن ەسكەرە وتىرىپ ازىرلەندى.

«كونستيتۋتسيالىق سوتتىڭ وتىنىشتەردى قاراۋ ءتارتىبى بەس كەزەڭنەن تۇراتىن بولادى. ءبىرىنشى, كونستيتۋتسيالىق سوت اپپاراتىنىڭ وتىنىشتەردى الدىن الا قاراۋى. ەكىنشى, كونستيتۋتسيالىق ءىس جۇرگىزۋگە ءوتىنىشتى قابىلداۋ. ءۇشىنشى, كونستيتۋتسيالىق سوت وتىرىسىندا ءوتىنىشتى قاراۋ ءۇشىن ماتەريالدار دايىنداۋ. ءتورتىنشى, ءوتىنىشتى قاراۋ بويىنشا وتىرىس وتكىزۋ. جانە سوڭعى كەزەڭ – ءوتىنىش بويىنشا تۇپكىلىكتى شەشىم قابىلداۋ. سونداي-اق جوباعا كونستيتۋتسيالىق سوتتىڭ شەشىمدەرىن ورىنداۋ تەتىكتەرى ەنگىزىلگەن», دەدى ق.مۋسين.

سونداي-اق ادىلەت ءمينيسترى «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسىن تانىستىردى. ۆەدومستۆو باسشىسى بۇعان دەيىن مۇنداي قۇجات قابىلدانعانى, جاڭا ءماتىن ۋاكىل قىزمەتىنىڭ ماقساتتارى مەن مىندەتتەرىن, ونىڭ قۇقىقتىق جاعدايى مەن قۇزىرەتىن اشاتىنىن جەتكىزدى.

«جاڭا ەرەجەلەردى ەكى توپقا بولۋگە بولادى. ءبىرىنشىسى – ۋاكىلدىڭ قۇزىرەتتىلىگىن كۇشەيتۋ, ەكىنشىسى – ونىڭ قىزمەتىن ۇيىمداستىرۋدىڭ تيىمدىلىگىن ارتتىرۋ. ۋاكىلدىڭ قۇزىرەتىن كۇشەيتۋ بولىگى بويىنشا. بىرىنشىدەن, كونستيتۋتسيا نورمالارىن ىسكە اسىرۋ ماقساتىندا زاڭ جوباسىندا ۋاكىلدىڭ ادامنىڭ جانە ازاماتتىڭ كونس­تيتۋ­تسيادا بەكىتىلگەن قۇقىقتارى مەن بوستان­دىق­تارىن قوزعايتىن نورماتيۆتىك قۇقىقتىق اكتىلەر­دىڭ كونستيتۋتسياعا سايكەستىگى ماسەلەسى بويىنشا كونستيتۋتسيالىق سوتقا جۇگىنۋ قۇقىعى كوزدەلگەن.

ەكىنشىدەن, باسقا مەملەكەتتەردىڭ شاقى­رۋى بويىنشا ادام قۇقىقتارى مەن بوستاندىق­تارىنىڭ ساقتالۋىنا بايقاۋشى رەتىندە ارەكەت ەتۋ قۇقىعىن بەرۋ ۇسىنىلادى. ۇشىنشىدەن, ۋاكىلدىڭ قۇزىرەتىن كۇشەيتۋ ماقساتىندا ونىڭ ارناۋلى الەۋمەتتىك قىزمەتتەر كورسەتەتىن ۇيىم­دارعا جانە قىلمىستىق-اتقارۋ جۇيەسى مەكەمە­لەرىنە كەدەرگىسىز بارۋ قۇقىعى بەكىتىلەدى», دەدى ق.مۋسين.

ۋاكىلدىڭ قىزمەتىن ۇيىمداستىرۋدىڭ تيىمدىلىگىن ارتتىرۋ بولىگىندە زاڭ جوباسىندا ادام قۇقىقتارى جونىندەگى ۇلتتىق ورتالىق باسشىسىنىڭ ورىنباسارى لاۋازىمىن ەنگىزۋ, سونداي-اق ۇلتتىق ورتالىقتىڭ قوسىمشا فۋنكتسيالارى بەلگىلەنەدى.

«قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا مەملەكەت باسشى­سىنىڭ 2022 جىلعى 16 ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەس­پۋبليكاسى كونستيتۋتسيالىق زاڭىنىڭ جوباسى جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىق­تىرۋلار ەنگىزۋ تۋرالى» قازاقستان رەسپۋب­لي­كاسى زاڭىنىڭ جوباسى جونىندە دە ادىلەت ءمي­نيسترى قانات مۋسين بايانداما جاسادى. جالپى قۇجاتتا 7 باعىت بويىنشا تۇزەتۋ ەنگىزىلمەك.

ء«بىرىنشى, پرەزيدەنتكە قاتىستى تۇزەتۋلەر. زاڭ جوبالارى پرەزيدەنتتىڭ جەرگىلىكتى اتقا­رۋشى ورگاندارعا جانە جوعارعى سوت كەڭەسىنە قاتىستى جەكەلەگەن وكىلەتتىلىكتەردى, سەناتتاعى «پرەزيدەنتتىك كۆوتانى» قىسقارتۋ, سونىمەن قاتار پرەزيدەنت لاۋازىمىن اتقارۋ كەزەڭىندە ەنگى­زىلەتىن جەكەلەگەن شەكتەۋلەر بو­يىنشا تۇزە­تۋلەردى قامتيدى.

ەكىنشى, پارلامەنتتىڭ قىزمەتىنە, ياعني پارلا­­مەنت پالاتالارىن قالىپتاستىرۋ تارتى­بىنە قاتىستى تۇزەتۋلەر. سايلاۋ جۇيەسىنىڭ ارالاس مو­دەلىنە كوشۋىنە جانە قازاقستان حال­قى اسسام­بلەياسىنىڭ ۇسىنىسى بويىنشا «پرە­زيدەنتتىك كۆوتانى» قولدانۋ ءتارتىبىنىڭ وزگەرۋىنە باي­­لانىستى تۇزەتۋلەر وسى قۇجات اياسىندا قاراس­­تىرىلعان. بۇدان باسقا, كونستيتۋتسياعا ەن­گى­زىلگەن تۇزەتۋلەرگە سايكەس پارلامەنتتىڭ بىر­­قا­تار جاڭا وكىلەتتىكتەرى بويىنشا تۇزەتۋلەر بار.

ءۇشىنشى, ۇكىمەتكە قاتىستى تۇزەتۋلەر. ەندى ۇكىمەتكە كونستيتۋتسياعا ەنگىزىلگەن تۇزەتۋ­لەرگە سايكەس زاڭدى كۇشىنە ەنگەن ۋاقىتشا قاۋلىلاردى قابىلداۋ بويىنشا وكىلەتتىلىكتەر بەرىلەدى. مىنانى اتاپ وتكەن ءجون, مۇنداي اكتىلەر ايرىقشا بولىپ تابىلادى جانە وسىنداي اكتىلەردى نەگىزسىز قابىلداۋ تاۋەكەلدەرىن ازايتۋ تالاپتارى جانە باسقا جاعدايلار وسى زاڭ جوبالارىنىڭ شەڭبەرىندە قاراستىرىلعان», دەدى ق.مۋسين.

ءمينيستردىڭ ايتۋىنشا, ءتورتىنشى باعىت سايلاۋ زاڭناماسىنا قاتىستى. سايلاۋ جۇيەسىنىڭ ارالاس مودەلىنە كوشۋىنە بايلانىستى سايلاۋدى وتكىزۋدىڭ جۇيەسى تولىعىمەن قايتا قۇرىلادى.

«سايلاۋ پروتسەسى زاماننىڭ تالاپتارىنا ساي جەتىلىپ كەلەدى. دەپۋتاتتىق مانداتتى كەرى قايراتىپ الۋ جاڭا ينستيتۋتى ەنگىزىلەدى. اۋىل, جانە وبلىستىق ماڭىزى بار قالالارىنىڭ اكىمدەرىن سايلاۋ كەزەڭ-كەزەڭىمەن ەنگىزىلەدى.

بەسىنشى, ساياسي پارتيالاردى تىركەۋ تارتىپ­تەرىنە قاتىستى تۇزەتۋلەر. ساياسي پارتيالاردى تىركەۋ ءۇشىن ونىڭ ساندىق شەگى 20 مىڭنان 5 مىڭ­عا دەيىن, ساياسي پارتيالاردىڭ ايماقتارداعى وكىل­دىك­تەرىنىڭ سانى 600-دەن 200-گە دەيىن, ساياسي پار­تيانى قۇرۋ كەزىندەگى باستاماشىل توپ ازاماتتارىنىڭ سانى 1 مىڭنان 700-گە دەيىن قىسقارتىلادى.

التىنشى, جەر جəنە ونىڭ قويناۋى, سۋ كوزدەرى, وسىمدىكتەر مەن جانۋارلار دۇنيەسى, باسقا دا تابيعي رەسۋرستاردى حالىق مەنشىگى دەپ تانۋ بويىنشا كونستيتۋتسيانىڭ 6-بابىنا قابىلدانعان ناقتى تۇزەتۋلەر ەنگىزۋ ۇسىنىلادى.

جەتىنشى, سوت لاۋازامىنا كونكۋرستىق راسىمدەر بويىنشا ونلاين-ترانسلياتسيا وتكىزۋ بولىگىندەگى جەكەلەگەن تۇزەتۋلەر. سونىمەن قاتار ءماسليحات توراعاسىنىڭ لاۋازىمىن ەنگىزۋ, نورمالاردى رەتتەۋدىڭ دەڭگەيلەرىن انىقتاۋ جانە نورماشىعارماشىلىق پروتسەسىن قىسقارتۋ بويىنشا تۇزەتۋلەر بار», دەدى ق.مۋسين.

بۇدان بولەك, اكىمشىلىك قۇقىق بۇزۋ تۋرا­لى كودەكسكە ەنگىزىلەتىن وزگەرىستەر مەن تولىق­تىرۋلار ءبىرىنشى وقىلىمدا ماقۇلداندى. اتال­عان قۇجاتتا 4 باعىتتا تۇزەتۋلەر ەنگىزىلەدى.

«بىرىنشىدەن, كونستيتۋتسيالىق سوتتىڭ قۇرىلۋىنا بايلانىستى كونستيتۋتسيالىق كەڭەس پەن ونىڭ مۇشەلەرى اتالعان باپتارعا ولاردى كونستيتۋتسيالىق سوت جانە ونىڭ سۋديالارىنا اۋىستىرۋ تۇرعىسىندا ناقتىلايتىن تۇزەتۋلەر ۇسىنىلىپ وتىر.

ەكىنشىدەن, زاڭ جوباسىندا ەسەپ كوميتەتىنىڭ اتاۋىن جوعارى اۋديتورلىق پالاتاعا اۋىستىرۋدى ناقتىلايتىن تۇزەتۋلەر قاراستىرىلعان. ۇشىنشىدەن, سايلاۋ تۋرالى كونستيتۋتسيالىق زاڭعا تۇزەتۋلەردى سايلاۋ الدىنداعى ۇگىت جۇرگىزۋگە جانە ۇگىت ماتەريالدارىن تاراتۋعا قاتىستى اكىمشىلىك قۇقىق بۇزۋشىلىق قۇرامدارىمەن بايلانىستىرۋ ماقساتىندا زاڭ جوباسىندا كودەكستىڭ 112 جانە 113-باپتارىنا تۇزەتۋلەر كوزدەلگەن.

ءتورتىنشى جانە سوڭعى باعىت كودەكستىڭ 874-1-بابىن كونستيتۋتسيانىڭ 83-1-بابىنىڭ ادام قۇقىقتارى جونىندەگى ۋاكىلدى سەناتتىڭ كەلىسىمىنسىز سوت تارتىبىمەن قولدانىلاتىن اكىمشىلىك جازالاۋ شارالارىنا تارتۋعا بولمايدى دەگەن بولىگىنە سايكەس كەلتىرىلەدى», دەدى ادىلەت ءمينيسترى ق.مۋسين.

بۇدان بولەك, جالپى وتىرىستا «پروكۋ­را­تۋرا تۋرالى» قازاقستان رەسپۋبليكاسى كونس­تي­تۋتسيالىق زاڭىنىڭ جوباسى قارالدى. اتالعان قۇجات جونىندە باس پروكۋروردىڭ ورىنباسارى اسەت شىنداليەۆ بايانداما جاسادى.

ء«بىرىنشى تاراۋدا پروكۋراتۋرا قىزمەتىنىڭ ماقساتتارى مەن پرينتسيپتەرى, قۇقىقتىق نەگىزدەرى جانە باسقا دا ماسەلەلەر بەرىلگەن. ەكىن­شى تاراۋدا پروكۋراتۋرانىڭ جۇيەسى ناقتى­لانىپ, ولاردىڭ ارقايسىسىنىڭ قۇزىرەتى بەكىتىلەدى. زاڭ جوباسىندا ءاربىر بۋىنداعى پروكۋ­راتۋرا ورگاندارىنا توقتاپ, ولاردىڭ قۇزىرەت­تەرىن بەكىتتىك. اتاپ ايتساق, باس پروكۋراتۋرا, قۇقىقتىق ستاتيستيكا جانە ارنايى ەسەپكە الۋ كوميتەتى, قۇقىق قورعاۋ ورگاندارى اكا­دەمياسى, اسكەري, كولىك, وبلىستىق, اۋداندىق پرو­كۋراتۋرالارعا دەربەس توقتالىپ, ولاردىڭ نەگىزگى فۋنكتسيالارى ناقتىلانعان.

پروكۋرورلاردىڭ وكىلەتتىكتەرى جەكە باپتا كور­سەتىلدى. ول باپتا اۋداندىق ساتىدان باستاپ باس پروكۋراتۋراعا دەيىن – قانداي قۇ­قىقتارى جانە قانداي مىندەتتەرى بار ەكەنى انىق بەكىلەدى. ءبىز ولاردى جۇيەگە كەلتىرىپ, بارىنشا كونس­تيتۋتسيالىق زاڭدا بەكىتۋگە ۇمتىلدىق. بۇل تاراۋدا نەگىزىنەن پروكۋراتۋرانىڭ كونستيتۋتسيالىق فۋنكتسيالارىن جۇزەگە اسىرۋعا باعىتتالعان وكىلەتتىكتەرى كورسەتىلەدى», دەدى ءا.شىنداليەۆ.

زاڭ جوباسىندا جوعارى قاداعالاۋدىڭ ءۇش نىسانى بەكىتىلەدى. ولار – تەكسەرۋ جۇرگىزۋ, زاڭ­دىلىقتىڭ جاي-كۇيىنە تالداۋ جاساۋ, كۇشىنە ەنگەن اكتىلەردى باعالاۋ. تەكسەرۋدى پرەزيدەنتتىڭ, باس پروكۋروردىڭ تاپسىرماسى جانە وبلىستار پەن اۋدان پروكۋرورلارىنىڭ شەشىمى بويىنشا جۇرگىزىلەدى.

سونداي-اق جيىندا «قازاقستان رەسپۋبلي­كا­سىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى. قۇجات جونىندە مادەنيەت جانە سپورت ءمينيسترى داۋرەن اباەۆ بايانداما جاسادى.

زاڭ جوباسى قولدانىستاعى زاڭنامانى جەتىلدىرۋگە جانە ۇلتتىق كينوكوميسسيانى قۇرۋ, شەتەلدىك ينۆەستورلاردى تارتۋ, حالىقارالىق كينونارىقتاردا, كينوبيزنەس-الاڭداردا جانە باسقا دا ءىس-شارالاردا قازاقستاننىڭ كينويندۋسترياسىن كورسەتۋ ارقىلى كينەماتوگرافيا­نى دامىتۋ ءۇشىن قولايلى جاعدايلار جاساۋعا باعىتتالعان.

زاڭ جوباسى سونداي-اق قازاقستان رەسپۋب­ليكاسىندا جانە شەتەلدە الەۋمەتتىك ماڭىزى بار جانە مادەني ءىس-شارالاردى ۇيىمداستىرۋ مەن وتكىزۋدى رەگلامەنتتەۋدى كوزدەيدى.

دەپۋتاتتار زاڭ جوباسىمەن جۇمىس بارىسىندا كينەماتوگرافيا سالاسىنداعى كادرلاردىڭ بىلىكتىلىگىن ارتتىرۋدى ۇيىمداستىرۋعا جانە كينەماتوگرافيالىق قىزمەت سۋبەكتىلەرىنىڭ حالىقارالىق كينوفەستيۆالدەرگە قاتىسۋىنا مەملەكەتتىك قولداۋ كورسەتۋ, ەلدە جانە شەتەلدە قازاقستاندىق كينو كۇندەرىن ۇيىمداستىرۋعا باعىتتالعان جانە تاعى باسقا دا بىرقاتار تۇزەتۋ ەنگىزدى.

پرەزيدەنتتىڭ 2022 جىلعى 16 ماۋسىمداعى ۇلتتىق قۇرىلتاي وتىرىسىندا بەرگەن تاپسىرماسىن ورىنداۋ ماقساتىندا «قازاقستان مەرەكەلەرى تۋرالى» زاڭعا تۇزەتۋ ەنگىزىلەدى. وسىلايشا, 25 قازان ۇلتتىق مەرەكە – رەسپۋبلي­كا كۇنى رەتىندە ايقىندالادى. 16 جەلتوقسان – تاۋەلسىزدىك كۇنى مەملەكەتتىك مەرەكە رەتىندە بەلگىلەنەدى. سونىمەن قاتار 1 جەلتوقسان – تۇڭعىش پرەزيدەنت كۇنىن مەرەكەلەۋدى مەم­لەكەتتىك رامىزدەر كۇنى, العىس ايتۋ كۇنى جانە قو­عامدىق ماڭىزى جوعارى الەۋەتى بار وزگە دە كۇن­دەر سياقتى, ونى مەملەكەتتىك مەرەكەلەر قاتارىنان الىپ تاستاۋ ۇسىنىلدى.

بۇدان بولەك, جالپى وتىرىستا بىرقاتار زاڭ جوباسى جۇمىسقا الىندى. جيىن سوڭىندا دەپۋتاتتار ءتيىستى مەملەكەتتىك مەكەمەلەر باسشىلارىنا دەپۋتاتتىق ساۋالدارىن جولدادى.