بالاعا باقىلاۋ قاجەت

كامەلەت جاسىنا تولماعان جاسوس­پىرىمدەردىڭ قاۋىپسىزدىگىن قامتاماسىز ەتۋ ماقساتىندا وتكىزىلەتىن تۇراقتى رەيدتىك تەكسەرۋ جۇمىستارى بارىسىندا 42 ءجاسوسپىرىم انىقتالدى. نەگە ەكەنى بەلگىسىز, جىلدا قىركۇيەك ايىنىڭ باسىندا پوليتسيا قىزمەتكەرلەرى تەكسەرۋ جۇرگىزەتىنىن بىلە تۇرا, اتا-انالار بالا­لارىن تۇنگى ۋاقىتتا باقىلاۋعا ق ۇلىقسىز بولىپ وتىر. وكىنىشتىسى, بۇل جاعداي جىل سايىن قايتالانادى.

جوسپارلانعان ءىس-شارالاردى ىسكە اسىرۋ بارىسىندا يۋۆەنالدى پوليتسيا ينسپەكتورلارى تۇرعىن ۇيلەردىڭ اۋلالارىندا, ساياباقتاردا جانە جاستار كوپ جينالاتىن ورىنداردا رەيدتىك ءىس-شارالار وتكىزگەن بولاتىن. ناتيجەسىندە, ويىن-ساۋىق وتاۋلارىندا قورقور تارتىپ وتىرعان جەتكىنشەكتەر قۇقىق قورعاۋ سالاسى قىزمەتكەرلەرىنىڭ قۇرىعىنان قۇتىلىپ كەتە المادى.

تەكسەرۋ بارىسىندا بەلگىلى بولعان­داي, ىشكى ىستەر ورگاندارىنا 42 كامەلەتكە تولماعان ءجاسوسپىرىم جەتكىزىلىپ, 46 اتا-انا مەن زاڭدى وكىل اكىمشىلىك جاۋاپ­كەرشىلىككە تارتىلدى. كامەلەتكە تولما­عانداردىڭ تۇنگى مەزگىلدە ويىن-ساۋىق ورىندارىندا بولعانى ءۇشىن 1 مەي­رامحانا قوجايىنى جاۋاپكەرشىلىككە تارتىلدى.

«جاڭا وقۋ جىلىنىڭ باستالۋىنا وراي بارلىق كوڭىل كوتەرەتىن ويىن-ساۋىق ورىندارى مەن جاستار ءجيى جاعالايتىن جەرلەر قۇقىق قورعاۋ ورگاندارىنىڭ ءجىتى نازارىندا بولادى. ءبىزدىڭ مىندەتىمىز – بالالاردىڭ قاۋىپسىزدىگىن قامتاماسىز ەتۋ جانە جاسوسپىرىمدەر جاساعان جانە ولارعا قاتىستى قۇقىق بۇزۋشىلىقتاردىڭ الدىن الۋ. اتا-انالاردان بالالارىنىڭ بوس ۋاقىتىن جانە بايلانىس ورتاسىن قاداعالاۋدى سۇراۋداي سۇراپ كەلەمىز. الايدا ناتيجە جوق. بالالاردىڭ ەشبىر قاداعالاۋسىز بولۋى زاڭعا قاي­شى ارە­كەتتەر جاساۋعا سەبەپ بولۋى مۇم­كىن», دەيدى جامبىل وبلىسى پوليتسيا دە­پار­تامەنتى جەرگىلىكتى پوليتسيا قىز­مەتى باسقارماسى يۋۆەنالدىق پوليتسيا توبى­نىڭ اعا ينسپەكتورى, پوليتسيا مايورى وكسانا سەمەنوۆا.

جامبىل وبلىسى