ۇستىمىزدەگى جىلدىڭ 21 مامىرىندا – 2010 جىلدىڭ ناۋرىزىندا 46 تەڭىزشىنىڭ قازاسىنا سوقتىرعان وڭتۇستىككورەيالىق اسكەري كەمەنىڭ سۋعا باتىرىلۋى تۋرالى بايانداما جاريا ەتىلگەننەن كەيىن – ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر مينيسترى قانات ساۋداباەۆ سولتۇستىك-شىعىس ازيادا بەيبىتشىلىك پەن تۇراقتىلىقتى قالىپتى دەڭگەيدە ۇستاپ تۇرۋ ماقساتىندا ۇنقاتىسۋدى بەلسەندى ەتە ءتۇسۋ قاجەتتىگى جونىندە مالىمدەدى.
“مەن وسى قايعىلى وقيعاعا بايلانىستى الاڭداۋشىلىق ءبىلدىرەمىن جانە وپات بولعانداردىڭ وتباسىلارىنا, سونداي-اق وڭتۇستىك كورەيا ۇكىمەتى مەن ونىڭ حالقىنا ءوزىمنىڭ تەرەڭ جان كۇيزەلىسىمدى جەتكىزە وتىرىپ, كوڭىل ايتامىن. بۇل ەل ەقىۇ-نىڭ ماڭىزدى ارىپتەسى بولىپ تابىلادى. ۇيىمعا توراعا مەملەكەت سولتۇستىك-شىعىس ازيادا ۇنقاتىسۋدى دامىتۋ مەن بەيبىتشىلىكتى قامتاماسىز ەتۋ بويىنشا بارلىق كۇش-جىگەردى قولدايدى”, – دەدى ول.
26-27 ساۋىردە الماتىدا “سولتۇستىك-شىعىس ازياداعى قاۋىپسىزدىك ماسەلەلەرى جونىندەگى كوپقىرلى ىنتىماقتاستىق جانە ەقىۇ تاجىربيەسىنىڭ قولدانىلۋى” تاقىرىبىندا حالىقارالىق كونفەرەنتسيا بولىپ ءوتتى.
وسى اپتانىڭ الدىندا ەقىۇ-نىڭ سەۋلدە بولىپ وتكەن ازيالىق ارىپتەستەرىمەن كونفەرەنتسيادا ۇيىمنىڭ ىنتىماقتاستىق نەگىزىندەگى قاۋىپسىزدىك پەن ۇنقاتىسۋ تۇجىرىمداماسىن ىلگەرى جىلجىتۋدى ازيادا قالايشا ىسكە قوسۋعا بولادى دەگەن ماسەلە كوتەرىلگەن ەدى.