مەملەكەت باسشىسى قاسىم-جومارت توقاەۆ بيىلعى 1 قىركۇيەكتەگى قازاقستان حالقىنا جولداۋىندا 2023 جىلعى 1 قاڭتاردان باستاپ ەڭ تومەنگى جالاقى مولشەرى 60 000-نان 70 000 تەڭگەگە دەيىن وسەتىنىن حابارلادى, دەپ جازادى Egemen.kz.
«قر ەڭبەك كودەكسىنە سايكەس جۇمىس بەرۋشىلەر جۇمىسكەرلەرگە ەڭبەكاقىنى ەتج-دان تومەن ەمەس دەڭگەيدە قامتاماسىز ەتۋگە مىندەتتى. وسىنىڭ ارقاسىندا ءارتۇرلى مەنشىك نىسانىنداعى كاسىپورىنداردىڭ بارلىق سالالارىندا جۇمىس ىستەيتىن جالاقىسى 70 مىڭ تەڭگەگە دەيىنگى 1,8 ملن-عا جۋىق جالدامالى جۇمىسكەردىڭ اقشالاي كىرىستەرى وسەدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى تاراتقان حابارلامادا.
ۆەدومستۆو اقپاراتىنا سايكەس, ءبىرىنشى كەزەكتە ەتج كوتەرىلۋى «جالاقىسى تومەن» قىزمەتكەرلەرگە قاتىستى بولادى. ەكىنشىدەن, جالاقى دەڭگەيىن بەلگىلەۋ كەزىندە ەتج كورسەتكىشىن پايدالاناتىن جۇمىس بەرۋشىلەر رازريادارالىق بىلىكتىلىك جۇيەسىن ەسكەرە وتىرىپ, قىزمەتكەرلەردىڭ باسقا ساناتتارىنىڭ جالاقىسىن قايتا قارايدى.
ايتا كەتسەك, پرەزيدەنت ۇكىمەتكە ەڭ تومەنگى جالاقىنى انىقتاۋدىڭ جاڭا ادىستەمەسىن ەنگىزۋدى تاپسىرعان ەدى. بۇل ونىڭ مولشەرىن كەزەڭ-كەزەڭىمەن ارتتىرۋعا مۇمكىندىك بەرەدى.
جۇكتەلگەن تاپسىرمانى ورىنداۋ ماقساتىندا مينيسترلىك ماماندارى ديناميكالىق تاسىلدەمەگە نەگىزدەلگەن جانە نەگىزگى ەكونوميكالىق كورسەتكىشتەردى ەسكەرەتىن ەتج ايقىنداۋ ادىستەمەسىن ازىرلەۋگە كىرىستى.