اۋىل شارۋاشىلىعى مينيسترلىگىنىڭ بۇيرىعىنداعى وزگەرىستەرگە سايكەس, اگرارلىق سەكتوردا ساقتاندىرۋ سىيلىقاقىسىنىڭ ءبىر بولىگىن سۋبسيديالاۋ ءنورماتيۆى 50 پايىزدان 80 پايىزعا دەيىن ارتادى. بۇل اۋىل شارۋاشىلىعى تاۋارلارىن وندىرۋشىلەر ءۇشىن ساقتاندىرۋ ءپوليسىنىڭ قۇنىن تومەندەتۋگە مۇمكىندىك بەرەدى, سونداي-اق اگروساقتاندىرۋدى ودان دا قولجەتىمدى ەتە تۇسەدى.
ەسكە سالا كەتەيىك, 2020 جىلدان باستاپ قازاقستاندا اگروونەركاسىپتىك كەشەنىن ساقتاندىرۋدىڭ جاڭا جۇيەسى جۇمىس ىستەيدى. ساقتاندىرۋ سىياقىلارىن سۋبسيديالاۋدىڭ نەگىزگى ماقساتى – اگروونەركاسىپتىك كەشەن سۋبەكتىلەرى ءۇشىن قارىز جانە ساۋدالىق قارجىلاندىرۋدىڭ قولجەتىمدىلىگىن ارتتىرۋ.
قازىرگى ۋاقىتتا وسىمدىك جانە مال شارۋاشىلىعى سالالارىندا كەلەسىدەي ساقتاندىرۋ ونىمدەرى بەكىتىلگەن: توپىراقتىڭ ىلعالدىلىعىنىڭ جەتىسپەۋشىلىك يندەكسىن ساقتاندىرۋ; توپىراقتىڭ ارتىق ىلعالدىلىق يندەكسىن ساقتاندىرۋ; كۇزدىك داقىلدار ءۇشىن توپىراق ىلعالدىلىعىنىڭ جەتىسپەۋشىلىك يندەكسىن ساقتاندىرۋ; ءىرى قارا مالدى, ۇساق مالدى, جىلقى مەن قۇستاردى ساقتاندىرۋ.
وسىمدىك شارۋاشىلىعىنداعى ساقتاندىرۋعا ءداندى داقىلدار (بيداي, س ۇلى, ارپا, جۇگەرى), كۇزدىك جانە مايلى داقىلدار جاتادى.
سونداي-اق ءپاسسيۆتى ميكروتولقىندى قاشىقتىقتان زوندتاۋ نەگىزىندە «وسىمدىكتەردىڭ وپتيكالىق تەرەڭدىگى» يندەكسىنىڭ مونيتورينگىن كوزدەيتىن بيوماسسا يندەكسىن ساقتاندىرۋ بويىنشا ساقتاندىرۋ ءونىمى جۇمىس ىستەيدى.
وسىمدىكتەردىڭ وپتيكالىق تەرەڭدىگى وسىمدىكتەردەگى سۋدىڭ سالىستىرمالى مولشەرىن انىقتاپ, وسىمدىكتەردىڭ ءوسۋى مەن بيوماسساسىن كورسەتەدى.
ساقتاندىرۋمەن «JÝSAN Garant» سك» اق, «ۆيكتوريا» سك» اق, «Nomad Insurance» سك» اق, «Amanat» سك» اق جانە «لوندون-الماتى» سك» اق اينالىسادى.
اتالعان ساقتاندىرۋ ونىمدەرىنىڭ شەڭبەرىندەگى تاۋەكەلدەر الەمدىك ساقتاندىرۋ نارىعىندا «ا» رەيتينگى بار SWISS Re (شۆەيتساريا), HANNOVER RE (گەرمانيا), MUNICH RE (گەرمانيا) حالىقارالىق قايتا ساقتاندىرۋ كومپانيالارىندا قايتا ساقتاندىرىلادى. ولار ساقتاندىرۋ جاعدايلارى باستالعان كەزدە كەپىلدىك بەرىلگەن تولەمدەردى قامتاماسىز ەتەدى.
اۋىل شارۋاشىلىعى سالاسىنداعى ساقتاندىرۋدىڭ وپەراتورى – «اگرارلىق نەسيە كورپوراتسياسى» اق. بارلىق ءراسىم – شارت جاساسۋدان باستاپ, تولەمدەرگە دەيىن, اقپاراتتىق جۇيە ارقىلى ونلاين جۇرگىزىلەدى. ساقتاندىرۋ جاعدايى جەردى قاشىقتىقتان زوندتاۋ دەرەكتەرى نەگىزىندە تىركەلەدى. بۇل جۇيە ادامي فاكتوردى تولىعىمەن الىپ تاستاۋعا مۇمكىندىك بەرەتىنىن اتاپ وتكەن ءجون. ىلعال دەڭگەيىنىڭ مونيتورينگى تۇراقتى نەگىزدە جۇرگىزىلىپ وتىرادى جانە ساقتاندىرۋ جاعدايىنىڭ باستالۋ فاكتىسى اۆتوماتتى تۇردە تىركەلەدى.