سەنات سپيكەرى ماۋلەن اشىمباەۆتىڭ توراعالىعىمەن پالاتانىڭ جاڭا سەسسياداعى العاشقى وتىرىسى ءوتتى. سەنات توراعاسى مەملەكەت باسشىسى قاسىم-جومارت توقاەۆ جاڭا جولداۋدا ەل دامۋىنىڭ باسىم باعىتتارىن بەلگىلەپ بەرگەنىن اتاپ ءوتتى.
ماۋلەن اشىمباەۆ ەل پرەزيدەنتى ايقىنداعان مىندەتتەردى ىسكە اسىرۋ ءۇشىن پارلامەنت سەناتى بەلسەندى جۇمىس ىستەۋگە دايىن ەكەنىن ايتتى.
«جولداۋدا ەكونوميكانى ءارتاراپتاندىرۋ, حالىقتىڭ ءال-اۋقاتىن ارتتىرۋ, ساياسي جۇيەنى ءارى قاراي رەفورمالاۋ باعىتتارى بويىنشا ماڭىزدى باستامالار ايتىلدى. ونىڭ ءبارى – جاڭا قازاقستان قۇرۋعا ارنالعان ناقتى قادامدار. سوعان بايلانىستى پارلامەنتكە بىرقاتار زاڭنامالىق مىندەت جۇكتەلدى. سەنات بۇل باعىتتا بەلسەندى جانە ءتيىمدى جۇمىس ىستەۋگە دايىن. بۇل – ءبىزدىڭ باستى مىندەتىمىز», دەدى ماۋلەن اشىمباەۆ.
سەنات توراعاسى بۇل ىستە مۇددەلەس قۇرىلىمدارمەن بىرلەسىپ ارەكەت ەتۋدىڭ ماڭىزدى ەكەنىنە نازار اۋداردى.
«جولداۋدى ىسكە اسىرۋ ءۇشىن ساراپشىلار قاۋىمداستىعىمەن, قوعامدىق ينستيتۋتتارمەن جانە باسقا دا مۇددەلەس تاراپتارمەن بىرلەسىپ جۇمىس ىستەۋىمىز قاجەت. ماجىلىسپەن جانە ۇكىمەتپەن بىرگە قاجەتتى, ساپالى زاڭداردى ۋاقتىلى قابىلداۋدىڭ دا ماڭىزى زور», دەدى پالاتا سپيكەرى.
سونىمەن قاتار ول سەناتورلاردىڭ شىلدە, تامىز ايلارىندا وڭىرلەرگە جانە شالعاي اۋىلدارعا جاساعان ساپارلارىنا توقتالدى. سەنات توراعاسى جۇرتشىلىقپەن جانە جەرگىلىكتى تۇرعىندارمەن كەزدەسۋلەردە كوتەرىلگەن ماسەلەلەر پالاتانىڭ الداعى سەسسياداعى جۇمىسىندا جان-جاقتى ەسكەرىلۋى قاجەت ەكەنىن دە اتاپ ءوتتى.
وتىرىستا جاڭادان قۇرىلعان اباي, جەتىسۋ جانە ۇلىتاۋ وبلىستارىنان سايلانعان سەناتورلار حالىققا انت بەردى. سونداي-اق ولار پالاتانىڭ تۇراقتى كوميتەتتەرىنىڭ قۇرامىنا سايلاندى. سوعان سايكەس اينۇر ارعىنبەكوۆا, سوۆەتبەك مەدەباەۆ, امانگەلدى تولاميسوۆ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەلەرى بولدى. ال باقىتجان باياحمەتوۆ – قارجى جانە بيۋدجەت كوميتەتىنىڭ, عالياسقار سارىباەۆ – حالىقارالىق قاتىناستار, قورعانىس جانە قاۋىپسىزدىك كوميتەتىنىڭ جانە سەرىك شايداروۆ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ قۇرامىنا سايلاندى.
«جاڭادان سايلانعان دەپۋتاتتاردى سايلاۋداعى جەڭىستەرىمەن قۇتتىقتايمىز. سەنات جۇمىسىنا بەلسەندى ارالاسىپ, دەپۋتاتتىق مىندەتتەرىڭىزدى ابىرويمەن اتقاراسىزدار دەپ سەنەمىز», دەدى ماۋلەن اشىمباەۆ.