جامبىل وبلىسىندا العاشقى جارتىجىلدىقتا 700-دەن استام جول-كولىك وقيعاسى تىركەلىپ, سونىڭ سالدارىنان 128 ادام باقيلىق بولعان. جالپى جول-كولىك وقيعالارىنىڭ 99 پايىزىنا جۇرگىزۋشىلەر كىنالى ەكەنى انىقتالىپ وتىر. التى ايدىڭ ىشىندە 396 كولىك جۇرگىزۋشىسىنىڭ ماس كۇيىندە كولىك تىزگىنىن قولعا العانى دا ويلاندىرماي قويمايدى.
ىشىنە وتتى سۋ تۇسسە, كولىك رۋلىنە جارماساتىنداردىڭ قاراسى ءالى سيرەمەي تۇر. قارا جول قاتەلىكتى كەشىرمەيتىنىن بىلە تۇرا ماس كۇيىندە كولىك جۇرگىزۋدەن باس تارتپايتىنداردىڭ سانى كۇن وتكەن سايىن ءورشي تۇسپەسە, كەميتىن ءتۇرى جوق. تەكسەرۋ جۇمىستارى تاعى دا جاعا ۇستاتاتىن كورسەتكىشتەردى انىقتاپ بەردى. بار بولعانى 22 كۇننىڭ ىشىندە ماس كۇيىندە كولىكتى باسقارعان 75 جۇرگىزۋشى پوليتسيا قىزمەتكەرلەرىنىڭ نازارىنا ىلىكتى.
ماس كۇيىندە ءبىر رەت ۇستالعاننان كەيىن ساباق العاندى ءجون كورمەيتىندەر دە بار. دەرەكتەرگە سەنسەك, ۇستالعانداردىڭ ءبىرى جول-كولىك وقيعاسىنىڭ سەبەپكەرى بولىپتى. ال 5 ازامات ماساڭ كۇيىندە قايتادان كولىك جۇرگىزۋگە كىرىسىپ كەتكەن. وسىلايشا, ولار ءبىر ەمەس, ەكىنشى رەت ۇستالىپ وتىر.
تۇرار رىسقۇلوۆ اۋدانىنىڭ ورتالىعى قۇلان اۋىلىنىڭ «جىبەك جولى» كوشەسىندە جول-كولىك وقيعاسى تىركەلگەن. 57 جاستاعى «مەرسەدەس» اۆتوكولىگىنىڭ جۇرگىزۋشىسى مەيرامحانا ماڭىنداعى تۇراققا قويىلعان تاعى ءبىر «مەرسەدەستى» سوققان. مەديتسينالىق كۋالاندىرۋ قورىتىندىسى جول-كولىك وقيعاسىنا سەبەپكەر بولعان ازاماتتىڭ ورتا دارەجەدە ماس بولعانىن انىقتاپتى. بۇگىنگى تاڭدا اتالعان دەرەككە قاتىستى قىلمىستىق كودەكستىڭ 346-بابى 2-بولىگىمەن سوتقا دەيىنگى تەرگەۋ امالدارى جۇرگىزىلىپ جاتىر. اۆتوكولىك ايىپ تۇراعىنا قويىلدى.
ءتارتىپ ساقشىلارىنىڭ جەدەل ارەكەت ەتۋىنىڭ ارقاسىندا ماس كۇيىندە كولىك جۇرگىزگەن ازاماتتار دەر كەزىندە ۇستالىپ جاتىر. العاشقى جارتىجىلدىقتا 16 ازامات كولىكتى ماس كۇيىندە ەكىنشى رەت جۇرگىزگەنى ءۇشىن قىلمىستىق جاۋاپكەرشىلىككە تارتىلعان. ولاردىڭ قاتارىنا تاعى دا 5 ادام قوسىلىپ وتىر.
ىشىمدىك ءىشىپ كولىك جۇرگىزگەن 396 ءوڭىر تۇرعىنى بۇعان دەيىن دە15 تاۋلىككە قامالىپ, 7 جىل بويى كولىك باسقارۋ قۇقىعىنان ايىرىلعان ەكەن.
جامبىل وبلىسى