مۇناي باعاسى تومەندەي بەرەدى

ماكروەكونوميكالىق ساۋالدامادا ۇلتتىق بانكتىڭ بولجامدارى قامتىل­ماي­تىنىن اتاپ وتكەن ءجون. وندا ىشكى جانە الەمدىك نارىقتارداعى جاعدايدىڭ كەلەشەك دامۋىنا قاتىستى نارىقتاعى كاسىبي قاتىسۋشىلاردىڭ تاۋەلسىز پىكىرىنە, باعالاۋى مەن كۇتۋىنە شولۋ جاسالعان.

رەسپوندەنتتەردىڭ مەديانالىق بولجامى بويىنشا 2022 جىلى Brent ماركالى مۇنايدىڭ باعاسى ورتا ەسەپپەن جىلىنا ءبىر باررەل ءۇشىن – 101 دوللار, 2023 جىلى – 89,9 دوللار, 2024 جىلى 75,0 دوللار دەڭگەيىندە قالىپتاسادى. اعىمداعى جىلعا ساراپشىلاردىڭ بولجاۋلارى ءبىر باررەل ءۇشىن 90 دوللاردان 110 دوللارعا دەيىن وزگەرەدى. 2023 جانە 2024 جىلدارعا ارنالعان بولجامدار دياپازونى كەڭەيەدى. دەگەنمەن رەسپوندەنتتەردىڭ كوپشىلىگى مۇناي باعاسىنىڭ تومەندەۋىن كۇتۋدە.

«رەسپوندەنتتەردىڭ بولجامدارى بويىنشا 2022 جىلى قازاقستان ەكونوميكاسىنىڭ ءوسىمى – 3,0 پايىز, 2023 جىلى – 3,8 پايىز, 2024 جىلى 4 پايىز دەڭگەيىندە قالىپتاسادى. 2022 جىلعا ساراپشىلاردىڭ بولجامدارى 2,6 پايىزدان 4 پايىزعا دەيىن وزگەرەدى. 2023 جانە 2024 جىلدارى ساراپشىلار ەكونوميكالىق ءوسۋدىڭ قالپىنا كەلۋىن كۇتۋدە», دەلىنگەن زەرتتەۋدە.

سونداي-اق ساۋالداماعا قاتىسۋ­شى­لاردىڭ بولجاۋىنشا, بيىل جەلتوقساندا ينفلياتسيا 15,1 پايىز دەڭگەيىندە قالىپ­تاسپاق. ولاردىڭ الداعى جىلدارعا جاساپ وتىرعان بولجامدارى ءبىرشاما وپتيميستىك سيپاتقا يە. ياعني ينفلياتسيا دەڭگەيى 2023 جىلى – 8,8 پايىزعا, 2024 جىلى 7,0 پايىزعا دەيىن تومەندەيدى دەپ پايىمدايدى. سونىمەن بىرگە ساۋال­داماعا قاتىسۋشىلار بازالىق مولشەر­لەمەنىڭ جىل سوڭىنا دەيىن 13,6 پايىزعا جوعارىلاپ, 2023 جىلى – 12,0, 2024 جىلى 9,2 پايىزعا دەيىن تومەندەۋىن كۇتەدى. وسىلايشا, رەسپوندەنتتەردىڭ كوپشىلىگى جىل سوڭىنا دەيىن بازالىق مولشەرلەمەنىڭ ساقتالۋىن نەمەسە جوعارىلاۋىن كۇتۋدە.

ساراپشىلار 2022 جىلدىڭ قورىتىندىسى بويىنشا تەڭگەنىڭ ايىرباس باعامى جىلىنا ورتاشا ەسەپپەن ءبىر دوللار ءۇشىن 460 تەڭگە دەڭگەيىندە, 2023 جىلى – 478,4 تەڭگەگە دەيىن, 2024 جىلى 495,0 تەڭگەگە دەيىن السىرەيدى دەپ باعامدايدى.

«ساراپشىلار الەۋەتتى ىشكى جالپى ءونىمنىڭ ورتاشا ءوسۋ قارقىنىن 5 جىلدىق شەگىندە 3,5 پايىز دەڭگەيىندە كۇتەدى. بولجام اۋقىمى 2 پايىزدان 4 پايىزعا دەيىن وزگەرەدى. جالپى, ماكروەكونوميكالىق كورسەتكىشتەر بويىنشا رەسپوندەنتتەردىڭ بولجامدارىنىڭ دياپازونى ءبىر جىلدىڭ شەگىندە دە, ورتا مەرزىمدى پەرسپەكتيۆادا دا كەڭ. بۇل ىشكى جانە الەمدىك نارىقتارداعى جاعدايدىڭ دامۋ پەرسپەكتيۆالارىنا قاتىستى نارىق قاتىسۋشىلارىنىڭ بەلگىسىزدىگىنىڭ جوعارى دەڭگەيىن كورسەتەدى», دەلىنەدى حابارلامادا.

ەسكە سالايىق, ۇلتتىق بانك ساۋالداماسىنا AERC, Halyk Finance, Jusan Invest, «ازيا دامۋ بانكى», اكرا, «ەۋرازيالىق دامۋ بانكى», «ەۋرازيالىق ەكونوميكالىق كوميسسيا», «رەنەسسانس كاپيتال», سەنتراس سەكيۋريتيز, «فريدوم فينانس» جانە «ەكونوميكالىق زەرتتەۋلەر ينستيتۋتى» قاتىسقان.