وزگەردى زاڭىڭ, اشيدى جانىڭ

وندا دەنە شىنىقتىرۋ جانە تەحنولوگيا پاندەرىن وقىتۋدا سىنىپتاردىڭ توپتارعا بولىنبەۋى تۋرالى شەشىم قابىلدانعان. بۇل جاعداي پەداگوگتەر سانىنىڭ قىسقارۋىنا, كوپتەگەن مۇعالىمنىڭ جۇمىسسىز قالۋىنا اكەلەدى دەگەن ۇرەي بۇگىندە الەۋمەتتىك جەلىدە قىزۋ تالقىلانۋدا.

بۇل ورايدا وقۋشى سانى از شالعاي جاتقان اۋىلداردىڭ دا جاعدايى ءماز ەمەس. ايتالىق, جامبىل وبلىسىنان شالعاي ورنالاسقان مويىنقۇمدىق مۇعالىمدەر اراسىندا دا وتە وزەكتى ماسەلەگە اينالىپ وتىر. اتالعان اۋدان ورتالىعىنداعى جامبىل مەكتەپ-گيمنازياسىندا 27 جىلدان بەرى دەنە شىنىقتىرۋ ءپانىنىڭ مۇعالىمى بولىپ كەلە جاتقان جارقىن اۋەسبەك ۇلى زاڭداعى وزگەرىس كوپ مۇعالىمگە وڭاي تيمەگەنىن ايتادى. ول ءوز سوزىندە: «مەكتەبىمىزدە 7 دەنە شىنىقتىرۋ ءپانىنىڭ مۇعالىمى بار. ءبارىنىڭ ساعاتى قىسقاردى. دەنە شىنىقتىرۋ مەن كوركەم ەڭبەك ءپانى بۇعان دەيىن دە ۇل مەن قىز بولىپ ءبولىنىپ كەلگەن. اۋىلدىق جەرلەردە 20 وقۋشى بولعان كەزدە دە ەكى توپقا بولىنە بەرەتىن. ال قازىر 24 وقۋشىعا بارلىق سىنىپ تولمايدى. نەگىزى مۇعالىمنىڭ ستاۆكاسى 16 ساعات بولۋى كەرەك. ەندى بارىنە بولگەندە 0,5 ستاۆكا عانا بولىپ, 16 ساعاتقا تولماي, بار بولعانى 9,6 ساعات بولىپ وتىر. بۇل دەگەنىڭىز, كۇندەلىكتى كونكورىسكە جەتپەيدى دەگەن ءسوز. مۇعالىمدەردىڭ جۇمىسقا دەگەن قۇلشىنىسى بولماي وتىر. قازىرگى قىمباتشىلىقتا مۇعالىمدەردىڭ ساعاتىن قىسقارتقانى كوڭىلگە سىيمايدى. كۇندە ءبىر وزگەرىس, ەندى نە بولار ەكەن دەپ الاڭداپ وتىرمىز» دەيدى.

ال اتالعان مەكتەپتىڭ 31 جىل ەڭبەك ءوتىلى بار, سىزۋ, بەينەلەۋ ونەرى جانە ەڭبەككە باۋلۋ ءپانىنىڭ مۇعالىمى سۆەتلانا ايكەنوۆا: «قىسقارتۋ دەگەن حالىقتى اشتىققا يتەرۋ دەگەن ءسوز. سول ءپاننىڭ ورنىنا جاڭا ءپان ەنگىزۋ كەرەك ەدى. وقۋشى سانىن 24-كە قالاي جەتكىزەمىز؟ ءار سىنىپتا 20-21 بالادان وتىر. ساعاتىمىز نە بولماق؟ مەكتەبىمىزدە 10-نان اسا ورىس ءتىلى ءپانى مۇعالىمى بار. جارتى ستاۆكامەن جۇمىس ىستەيمىز بە؟ كوركەم ەڭبەك ءپانى ۇل-قىز بولىپ بولىنبەيتىن بولسا, قانداي باعدارلامامەن, قاي كىتاپپەن وقىتامىز؟ كوركەم ەڭبەك ءپانىن ۇل-قىز نەگە بىرگە وقۋى كەرەك؟ قىز بالا ستانوك, بالتا, بالعامەن جۇمىس ىستەۋدى ۇلدارمەن بىرگە ۇيرەنگەندە, ءىس تىگىپ, توقىما توقۋدى, قول ونەرىن, تاماق دايىنداۋدى قاي كەزدە ۇيرەنەدى؟ ورتاق ءبىلىم بەرەتىن وقۋلىق تا شىققان جوق», دەگەن جان شىرىلىن جەتكىزدى.

ءيا, راسىندا بۇل شەشىم مۇعا­لىم­دەر ءۇشىن مۇلدە كۇتپەگەن جاعداي بولدى. مامىر ايىندا وقۋ-اعارتۋ مينيسترلىگىنىڭ جاۋاپتى قىز­مەتكەرلەرى پەداگوگ قاۋىمعا جاڭا وقۋ جىلىنىڭ باسىنان باستاپ ەلدەگى مەكتەپتەردە دەنە شىنىقتىرۋ جانە تەحنولوگيا پاندەرى ۇل-قىزعا ءبولىپ وقىتىلاتىنىن مالىمدەگەن ەدى. ەندى وقۋ جىلىنىڭ باستالۋىنا 10 كۇن قالعاندا بۇل جاڭالىق مۇعالىمدەرگە «جەر استىنان جىك شىقتى, ەكى قۇلاعى تىك شىقتى» دەگەندەي اسەر ەتىپ وتىر. بايقاعانىمىزداي, الەۋمەتتىك جەلىدەگى پىكىرلەر دە ەكى ۇشتى. بۇل شەشىمدى ءبىرى قولداسا, ءبىرى ءتيىمسىز دەپ سانايدى. اسىرەسە اۋىلدىق جەردەگى سىنىپ وقۋشىسىن 24 بالاعا تولتىرۋ ءتىپتى مۇمكىن ەمەس.  

ال قازاقستاندىق سالالىق ءبىلىم جانە عىلىم قىزمەتكەرلەرى كاسىپ­وداعىنىڭ ءباسپاسوز قىزمەتى كاسىپوداق پەداگوگتەر مەن ولاردىڭ وتباسى مۇ­شەلەرىنىڭ ماسەلەلەرىنە بەيجاي قاراي المايتىندىقتارىن, وقۋ-اعارتۋ سالاسىنداعى ۋاكىلەتتى مەملەكەتتىك ورگانعا تۋىنداعان شيەلەنىستى قىسقا مەرزىمدە الەۋمەتتىك ارىپتەستىك تا­راپتارىنىڭ كەلىسىمى اياسىندا شەشۋ تۋرالى ۇسىنىس جولدانعانىن حابارلادى.

ءۋاليحان جايلاۋ,

جۋرناليست

جامبىل وبلىسى