بۇل ءاننىڭ ەسىرتكى ساۋداسىنا قاتىسى بولماسا دا, وسى قىلمىس ءتۇرى ايتىلعاندا اتالعان ءوڭىردى اينالىپ وتە الماسپىز. بىلتىر ەلىمىزدە ەسىرتكى قىلمىستارى جامبىل جانە شىعىس قازاقستان وبلىستارىندا, الماتى قالاسىندا كوپ تىركەلگەن. جىل باسىنان بەرى ءتارتىپ ساقشىلارىنىڭ جەدەل ارەكەتتەرىنىڭ ناتيجەسىندە اشىلعان قىلمىستار دا از ەمەس.
سوڭعى ۋاقىتتا پوليتسيا قىزمەتكەرلەرى جابايى قاراسورا وسىرىلەتىن ايماقتاردى ەرەكشە نازارعا الۋدا. ماسەلەن, جامبىل وبلىسىنىڭ شۋ اۋدانىندا 26 تامىزدان 27 تامىزعا قاراعان ءتۇنى ءىىم ەسىرتكى قىلمىسىنا قارسى كۇرەس دەپارتامەنتىنىڭ قىزمەتكەرلەرى وزدەرىنىڭ اۋماقتىق بولىمشەسىمەن بىرگە تاسوتكەل اۋىلى ماڭىندا جابايى كەندىردى جيناپ جۇرگەن جەرىنەن قوناەۆ اۋىلىنىڭ تۇرعىنى, 39 جاستاعى باقتاشىنى ۇستادى. ەسىرتكى قىلمىسىنا قارسى ءىس-قيمىل دەپارتامەنتىنىڭ باسشىسى قاجى-عالي يماجانوۆتىڭ ايتۋىنشا, بۇگىندە «قاراسورا-2022» ارنايى ءىس-شاراسىنىڭ سوڭعى كەزەڭدەرى جالعاسۋدا. بەلگىلى بولعانداي, قىلمىسكەرلەر كۇزدىڭ سالقىنى تۇسكەنشە جابايى كاننابيستى قويمالارىن تولىقتىرۋ ءۇشىن پايدالانادى ەكەن. ال سۋىق اۋا رايىنىڭ باستالۋىمەن كەپتىرىلگەن ماريحۋانا قازاقستاننىڭ ءارتۇرلى ايماقتارى مەن كورشىلەس مەملەكەتتەرگە ەكسپورتتالاتىن كورىنەدى. بۇعان جول بەرمەس ءۇشىن پوليتسيا قىزمەتكەرلەرى قۇرامىندا ەسىرتكى بار وسىمدىكتەردىڭ جەتىلۋ كەزەڭىندە بارلىق ىقتيمال داقىلدار مەن قاراسورا بار قويمالاردى انىقتاپ, شۇعىل رەجىمدە جۇمىس ىستەۋدە. جاسىرىن ورىندار باقىلاۋعا الىنىپ, العاشقى قولايلى ساتتە اق ولاردىڭ يەلەرى ۇستالۋدا. قولدان ەگىلگەن, سونىمەن قاتار جابايى وسەتىن ءىرى قاراسورانىڭ انىقتالعان ءىرى ۋچاسكەلەرىن پوليتسيا قىزمەتكەرلەرى جەدەل تۇردە جويۋدا.
ال الماتى وبلىسىنىڭ كەگەن اۋدانىندا پوليتسيا قىزمەتكەرلەرى شەكاراشىلارمەن بىرلەسىپ شەلەك اۋىلىنىڭ ەكى تۇرعىنىن ۇستادى. ۇستالعانداردان ساتۋعا دايىن 4 قاپ كەپتىرىلگەن ماريحۋانا تاركىلەندى. ۇستالعاندار قاراسورا ورىلعان جەردى وزدەرى كورسەتكەن. بارلىعى 5 توننا ەسىرتكى زاتى بار وسىمدىكتەر جويىلدى. ۇستالعاندارعا قاتىستى اسا ءىرى كولەمدە ەسىرتكى زاتتارىن زاڭسىز ساقتاۋ فاكتىسى بويىنشا قىلمىستىق ءىس قوزعالدى.