ءبىز ەركىندىكتىڭ نە ەكەنىن قىرانعا قاراپ تۇسىندىك. قاناتىن كەڭگە جايعان عاجايىپ قۇس الىپ اسپاننىڭ الاقانىندا قالقىپ جۇرگەندەي. شىرقاۋ بيىكتە قالىقتاعان بوستاندىق بەينەسى قازاقتىڭ ارمانىن ارقالاپ بارا جاتقانداي. وتاندى ءسۇيۋ وڭاي ەمەس, قىراننىڭ مۇزارت شىڭعا اسىققانىنداي الاپات كۇي. ءبىز كارتيناعا قاراپ ۇلتتىڭ ەركىندىككە قۇشتارلىعىن كورەمىز.
باقساڭىز, كارتينانى رەاليستىك تۇرعىدا جازۋعا تالپىنعان اۆتور ەركىندىك پەن اسقاقتىقتىڭ سيمۆولىن سىزىپ وتىر. شىعارما يەسى – بەلگىلى سۋرەتشى باۋىرجان ءبايدىلدا. قىلقالام شەبەرى ەلدىڭ كەڭ-بايتاق جەرىن كولدەنەڭ ولشەمدە سىزىقتىق پەرسپەكتيۆا ارقىلى شەبەر كورسەتكەن. كارتينانىڭ ارتقى قاپتالىنداعى بيىك تاۋلار الدىڭعى پلانداعى بۇركىتكە پاراللەل كورىنىس بەرىپ تۇر. ورتاڭعى پلاندا قالىپ قويعان جىگىت بەينەسى دە تۋعان جەرىنە دەگەن قۇرمەتىن سەزدىرىپ تۇر.
تۇمسا تابيعاتتىڭ تىلسىم كۇشى اۆتورعا جاڭا يدەيا تۋعىزعانداي. ات ۇستىنە ورنىققان ەر جىگىت, كوك جۇزىندە قالىقتاعان بۇركىت, ۇلتىمىزدىڭ جەتى قازىناسى ەكەنى ءمالىم. تۋىندىعا ەر جىگىتتىڭ اجىراماس سەرىكتەرى – جۇيرىك ات, قىران بۇركىت سىندى وبرازدار ەنگىزىلگەن. ەردىڭ قاناتى – ات, قۇلاعى – يت, اسىراۋشىسى – بۇركىت, قورعانشىسى – مىلتىق, بۇل يدەيالىق دەتالدار.
سۋرەتشى كەيىپكەرىن ەش الاڭسىز كۇيدە سەنىمدى سەرىكتەرىمەن ەن دالادا جۇرگەن كەزىن بەينەلەگەن. بۇركىت ادەتىنشە تۋىندىدا دا قالىقتاپ بارا جاتىر. بۇل كورىنىس كورسەتىلگەن كارتينانىڭ بىرەۋىنىڭ فورماتى پەيزاجدىق فورماتتا, بىرەۋى پورترەتتىك تۇرعىعا نەگىزدەلگەن. بەينەنى تىگىنەن ءتۇسىرۋ ارقىلى اۆتور وقىرمانعا بيىكتىكتى سەزىندىرەدى. جالپى, پەيزاجدىق فورمات نەگىزىندە سوزىلىڭقى ەتىپ جازىلعان بۇركىت كەڭ جازىقتىقتى سۋرەتتەيدى.
شىنىندا سۋرەتكەر ۇلتتىڭ رۋحاني بوياۋىن شىعارماسىنا كۋلت رەتىندە قالاپ, بوستاندىققا ۇمسىنعان ءباھادۇر بابامىزدىڭ ماقسات-مۇراتىن جەتەلەپ كەلەدى. جولاۋشى – ءسىز بەن ءبىز. تالاي زوبالاڭ جولداردى, اۋىر ناۋبەتتى باسىنان وتكەرگەن, سوندا دا مادەنيەتىنەن, ۇلتتىق بولمىسىنان, اتا-تەگىنەن اجىراماعان حالىقتىڭ جيىنتىعى. انە, تالايدى تامساندىرعان تاۋەلسىزدىك تاڭى! بۇل – ەركىندىك ەملەسى!