26 تامىزدا جامبىل وبلىسى بايزاق اۋدانىنداعى اسكەري ءبولىم اۋماعىنداعى ءورت سالدارىنان بولعان قايعىلى وقيعاعا ءبىر جىل تولىپ وتىر. اسكەري ءبولىم اۋماعىندا ينجەنەرلىك وق-دارىلەر قويماسىندا بولعان جارىلىس سالدارىنان 17 ادام قايتىس بولعان ەدى. بۇگىن قازا تاپقان جاۋىنگەرلەردى ەسكە الۋعا ارنالعان ەسكەرتكىشتىڭ اشىلۋ ءراسىمى ءوتتى, دەپ حابارلايدى Egemen.kz.
مەموريالدىڭ اشىلۋ راسىمىنە «وڭتۇستىك» وڭىرلىك قولباسشىلىعىنىڭ باسشىلىعى, جامبىل وبلىسى اكىمدىگىنىڭ, وڭتۇستىك ءوڭىردىڭ اسكەري پروكۋراتۋراسىنىڭ وكىلدەرى, سونداي-اق قايعىلى وقيعا سالدارىنان قازا تاپقان اسكەري قىزمەتشىلەردىڭ جاقىندارى مەن تۋىستارى قاتىستى.
راسىمگە جينالعاندار قازا بولعانداردى ءبىر مينۋت ۇنسىزدىكپەن ەسكە الدى. كۇشتىك قۇرىلىمداردىڭ وكىلدەرى, قىزمەتتەستەرى, تۋىستارى مەن جاقىندارى قازا تاپقاندار تۋرالى جىلى ەستەلىكتەرىمەن ءبولىسىپ, ولاردىڭ جانقيار باتىرلىعى جايلى ايتتى.
«وڭتۇستىك» وڭىرلىك قولباسشىلىعىنىڭ اسكەري قىزمەتشىلەرى, توتەنشە جاعدايلار دەپارتامەنتى ءورت ءسوندىرۋ قىزمەتىنىڭ قىزمەتكەرلەرى جانە اسكەري پروكۋراتۋرا قىزمەتكەرلەرى, ولاردىڭ ءبارى وزدەرىنىڭ كاسىبي مىندەتتەرىن ادال, جانقيارلىقپەن اتقاردى. اسكەري قىزمەتكەرلەردىڭ, جەرلەستەرىمىزدىڭ قازاسى ورنى تولماس اۋىر قايعى. ءبىز ولاردىڭ وتباسىلارىنا قامقورلىق جاساپ, نازاردان تىس قالدىرماي, بالالارىنىڭ اكەلەرىن ماقتان تۇتىپ وسۋىنە كومەكتەسۋدى جالعاستىرامىز. مۇنداي وقيعا ەندى ەشقاشان بولماسىن دەپ تىلەيمىز», دەدى جامبىل وبلىسى اكىمىنىڭ ورىنباسارى ەركىن ۇيسىمباەۆ.
2021 جىلعى 26 تامىزدا بايزاق اۋدانىنداعى ينجەنەرلىك وق-دارىلەر قويماسى اۋماعىندا بولعان وقيعا سالدارىنان ءوزىنىڭ كاسىبي جانە اسكەري بورىشىن وتەۋ كەزىندە 17 ادام قايعىلى جاعدايدا قازا تاپتى. مارقۇمداردىڭ بارلىعى مەملەكەتتىك ناگرادالارمەن ماراپاتتالدى. ءبىر اسكەري قىزمەتشى – 28349 اسكەري ءبولىمى ءورت ءسوندىرۋ ءبولىمىنىڭ كومانديرى كىشى سەرجانت باۋىرجان داۋىتباەۆ ءالى كۇنگە دەيىن حابار-وشارسىز.
«ولاردىڭ ەسىمدەرى ارقاشان جادىمىزدا ساقتالىپ, جاساعان ەرلىكتەرى وتانعا ادال قىزمەت ەتۋدىڭ جانە ءوز ىسىنە ادالدىقتىڭ ۇلگىسى. ءبىز قازا تاپقانداردىڭ وتباسىلارىمەن بايلانىستى ۇزبەي, كومەك كورسەتەمىز. ال ەگەر بالالارى اسكەري وقۋ ورىندارىنا تۇسۋگە نيەت ءبىلدىرىپ جاتسا, ءبىز ولارعا دايارلىقتا جان-جاقتى جاردەم كورسەتەتىن بولامىز», دەدى اسكەري ءبولىم كومانديرى پودپولكوۆنيك ەركىن ابسادىقوۆ.
ايتا كەتسەك, قازىرگى ۋاقىتتا اسكەري ءبولىم اۋماعىن وق-دارىلەردىڭ قالدىقتارىنان تازارتۋ جۇمىستارى جالعاسۋدا. ولاردى جويۋ ەلدى مەكەندەردەن الىس ورنالاسقان تاۋلى جەردە جۇرگىزىلەدى.