اتىراۋدا №5546 اسكەري ءبولىم بار. ىشكى ىستەر مينيسترلىگىنىڭ ىشكى اسكەرلەر قولباسشىلىعىنا قارايدى. قازىر مۇندا 400-گە جۋىق سارباز وتان الدىنداعى بورىشىن وتەۋدە. بۇرىن مۇندا جەرگىلىكتى جاستار دا اسكەري مىندەتىن وتەۋگە شاقىرىلا بەرەتىن. ءتىپتى, سىرقاتى بار ءبىر جاس جىگىتتىڭ سوناۋ قىزىلوردادان اسكەرگە شاقىرىلىپ, وسى بولىمنەن ۇيىنە كەرى قايتارىلعانىنا دا كۋا بولعان ەدىك. ال قازىر شە؟ اتالعان اسكەري بولىمدە الگىندەي پروبلەما كەزدەسىپ ءجۇر مە؟ وسى ساۋالدارعا جاۋاپ الۋ ءۇشىن اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, مايور اتابەك سالىقباەۆقا جولىققان ەدىك.
ءبولىم كومانديرىنىڭ ورىنباسارى اسكەري تارتىپكە ساي اڭگىمەگە ساراڭ بولىپ شىقتى. ونىسى ءتۇسىنىكتى دە شىعار. مايور اتابەك سالىقباەۆتىڭ ايتۋىنشا, جاقىن ارادا 100-دەن اسا ساربازدىڭ اسكەري مىندەتىن وتەۋ مەرزىمى اياقتالادى. سوعان وراي ساربازدار قاتارى ماۋسىم ايىندا تولىعادى دەپ كۇتىلۋدە. نەگىزىنەن اسكەري ءبولىم ساربازدارى اتىراۋ قالاسى كوشەلەرىندەگى قوعامدىق ءتارتىپ ساقتاۋعا, سونىمەن بىرگە, ەڭبەكپەن تۇزەۋ مەكەمەسىندەگى ءتارتىپتى نىعايتۋعا اتسالىسادى. بىراق, ءبىر كەزدەردەگىدەي باتىس وبلىستار مەن جەرگىلىكتى جەردىڭ جاستارى بۇل بولىمگە جىبەرىلمەيتىن بولىپتى. كەرىسىنشە, وزگە وڭىرلەردىڭ جاستارى كوبىرەك جىبەرىلەدى. ماسەلەن, وتكەن جىلعى كۇزدە قاراعاندى, سولتۇستىك قازاقستان وبلىستارى مەن استانا قالاسىنىڭ جاستارى اسكەري مىندەتىن وتەۋگە كەلىپتى. جاقىن ارادا اسكەري مىندەتىن وتەۋ مەرزىمى اياقتالاتىن ساربازدار اراسىندا كەرەكۋ ءوڭىرىنىڭ جاستارى دا بار. سونىڭ ءبىرى, سىمداي تارتىلعان قاتارداعى جاۋىنگەر ءداۋلەت زەكەنوۆ گازەت ءتىلشىسىن باقىلاۋ-وتكىزۋ بەكەتىنەن اسكەري ءبولىم كومانديرىنىڭ ورىنباسارىنىڭ كابينەتىنە دەيىن ەرتىپ ءجۇردى.
مۇنداعى ساربازدارعا بارلىق جاعداي جاسالعان ەكەن. كازارما, اسحانا سەكىلدى عيماراتتارعا “كوگىلدىر وتىن” جەلىسى جۇرگىزىلىپتى. بۇرىن كازارمانىڭ قىستا جىلۋدان, سۋدان تارىعاتىنىن بىلەتىن ەدىك. ەندى ءبارى باسقاشا, جاقسىلىق جاعىنا قاراي وزگەرگەن. ءبولىم ساربازدارى ءۇشىن ارنايى مونشا دا سالىنىپتى. بولىمدە مايور ۆلاديمير نۋتكوۆ جەتەكشىلىك ەتەتىن اسكەري وركەستر بار. ونىڭ قۇرامىنداعى 18 مۋزىكانت كەلىسىم-شارتپەن جۇمىسقا الىنعان. كەلىسىم-شارت دەمەكشى, بىلتىر اسكەري مىندەتىن وتەۋ مەرزىمى اياقتالعان 10 سارباز وسى بولىمدە كەلىسىم-شارتپەن قىزمەتىن جالعاستىرۋعا قالىپتى. ال بيىل 6 سارباز اسكەري ۋچيليششەگە بارۋعا تىلەك ءبىلدىرىپ وتىر. بۇل – ىشكى اسكەرلەر قۇرامىنداعى ەڭ ۇزدىك ءبولىمنىڭ ءبىرى. ء“بىزدىڭ ساربازدار وزدەرىنىڭ اسكەري مىندەتىنە ادالدىعىمەن ءار كەز تانىلىپ كەلەدى. قولداۋ كۇتكەن جاندارعا قورعان بولۋدى جۇكتەيتىن جاۋاپكەرشىلىكتى ءتۇسىندى. قازاقتىڭ جىگىتتەرى نەگىزىنەن شىمىر, قايراتتى بولىپ كەلەدى عوي. ءبولىم ساربازى جاندوس قالدىشەۆ 23 ساۋىردە جايىق وزەنىندەگى سۋعا باتىپ بارا جاتقان ادامدى قۇتقارىپ قالدى. سۋدان قۇتقارعان ادامدى اۋرۋحاناعا اپارىپ, ومىرىنە اراشا بولدى. ال قاتارداعى جاۋىنگەر بولات نۇرساپاەۆ ءىV شاعىن اۋداندا اناسىنان اداسىپ قالعان ءۇش جاسار بالدىرعاندى 12 ساعاتتان كەيىن “جەڭىس ساياباعى” اۋماعىنان تاۋىپ بەردى. ءارينە, مۇنداي ساربازداردى وزگەلەرگە ۇلگى-ونەگە ەتەمىز. ىشكى ءاسكەرلەر باس قولباسشىسى ر.جاقسىلىقوۆتىڭ بۇيرىعىمەن قاتارداعى جاۋىنگەر جاندوس قالدىشەۆ “قۇقىق ءتارتىبىن قامتاماسىز ەتۋدە ۇزدىك شىققانى ءۇشىن” توسبەلگىسىمەن ماراپاتتالدى”, دەيدى ءبولىم كومانديرىنىڭ ورىنباسارى اتابەك سالىقباەۆ.
وكىنىشكە قاراي, ماقالامىزدىڭ باسىندا ايتىلعانداي, سىرقات جاستى اسكەرگە جىبەرۋ وقيعاسى ءالى دە كەزدەسەدى. بىلتىرعى كۇزدە جەزقازعان وڭىرىنەن ەپيلەپسيا سىرقاتىنا شالدىققان ءبىر جىگىت وسى ءبولىمگە جىبەرىلىپتى. سوندا دارىگەرلەر سىرقات جىگىتتى تاۋەلسىز ەلىمىزدىڭ قورعانى بولا الادى, دەپ جىبەرگەن عوي شاماسى. وزگە ەمەس, ەپيلەپسيا سىرقاتىنا كوز جۇما قاراۋعا بولمايتىنىن دارىگەرلەر قاۋىمى جاقسى بىلەدى. ەندەشە, قالتىراپ-دىرىلدەپ, ەسىنەن تانىپ قالاتىن سىرقاتى بار جىگىت اسكەري-مەديتسينالىق كوميسسيا ءجىتى تالقىسىنان, باقىلاۋىنان قالاي وتكەن؟ الدە اسكەرگە بارعىسى كەلمەگەن دوكەي بالاسىنىڭ ورنىنا “ابايسىزدا” “قۇرباندىققا” شالىندى ما ەكەن؟
جولداسبەك شوپەعۇل, اتىراۋ وبلىسى.
سۋرەتتەردى تۇسىرگەن ورىنباي بالمۇرات.