تامىز ايىنىڭ ءۇشىنشى جەكسەنبىسىندە قازاقستاندا سپورت كۇنى اتاپ وتىلەدى. كاسىبي مەرەكە قارساڭىندا مادەنيەت جانە سپورت ءمينيسترى داۋرەن اباەۆ سپورت سالاسى قىزمەتكەرلەرىن ماراپاتتاپ, ولاردىڭ سالاماتتى ءومىر سالتىن دامىتۋعا جانە ناسيحاتتاۋعا قوسقان زور ۇلەسىن اتاپ ءوتتى.
ء«بىزدىڭ ەلىمىزدە سپورت ءار ءتۇرلى جاستاعى, ۇلت پەن كاسىپتەگى كوپتەگەن ادامداردىڭ باسىن بىرىكتىرەدى. جىلدان جىلعا سپورت قاۋىمداستىقتارى مەن سەكتسيالارىنىڭ سانى ءوسىپ, سپورتپەن تۇراقتى اينالىساتىن ازاماتتاردىڭ سانى ارتىپ كەلەدى. ارينە, بۇل جەردە جاتتىقتىرۋشىلاردىڭ, تورەشىلەردىڭ جانە سپورت مەنەدجەرلەرىنىڭ ەڭبەگى زور. مۇنىڭ ءبارى ولاردىڭ تاڭداعان ماماندىعىنا دەگەن ىنتاسى مەن ادالدىعىنا تىكەلەي بايلانىستى», دەدى داۋرەن اباەۆ.
سالتاناتتى ءىس-شارا وليمپيادا رەزەرۆىنىڭ وبلىستىق جانە رەسپۋبليكالىق مامانداندىرىلعان مەكتەپ-ينتەرنات-كوللەدجدەرىنىڭ جۇمىسى ماسەلەلەرى جونىندەگى كەڭەس شەڭبەرىندە ءوتتى.
«قازىر مەكتەپ-ينتەرنات-كوللەدجدەردە تاياۋ جىلدارى وتەتىن ءىرى جارىستاردا ەل نامىسىن قورعايتىندار وقىپ ءجۇر. ءبىر سوزبەن ايتقاندا, سىزدەر قازاقستاننىڭ سپورت ەليتاسىن دايارلاپ جاتىرسىزدار. بىراق وكىنىشكە قاراي, دايارلاعان شاكىرتتەردىڭ قازىرگى ناتيجەلەرى الاڭداۋشىلىق تۋدىرادى. كوپتەگەن پارامەترلەر بويىنشا بىرقاتار مەكتەپ-ينتەرنات-كوللەدجدەردىڭ كورسەتكىشتەرى كادىمگى سپورت مەكتەپتەرىنەن تومەن. بۇل جاتتىعۋ پروتسەسىندە, پسيحولوگيالىق دايارلىقتا, وقىتۋ ءادىسناماسىندا ولقىلىقتاردىڭ بار ەكەنىن بىلدىرەدى», دەدى مينيستر.
ونىڭ ايتۋىنشا, مەكتەپتەردەگى كادر ماسەلەسىنە ەرەكشە نازار اۋدارۋ قاجەت. مەكتەپ-ينتەرنات-كوللەدجدەردە ۇزدىك جاتتىقتىرۋشىلار مەن ادىسكەرلەر جۇمىس ىستەۋگە ءتيىس.
داۋرەن اباەۆ سونداي-اق مەكتەپ-ينتەرنات-كوللەدجدەرگە وقۋشىلاردى قابىلداۋ كەزىندە باقىلاۋدى كۇشەيتۋدى, جوعارى سىنىپ جانە كوللەدج سپورتشىلارىنىڭ ناتيجەلەرىنە جۇيەلى تالداۋ جاساۋدى, سونداي-اق قارجىلىق جاعداي مەن بىلىكتى مامانداردىڭ بولۋىن ەسكەرە وتىرىپ, سپورت تۇرلەرىن وڭتايلاندىرۋدى قاراستىرۋدى تاپسىردى.