ۇكىمەت وتىرىسىندا ەلىمىزدىڭ بيىلعى 7 ايداعى الەۋمەتتىك-ەكونوميكالىق دامۋ قورىتىندىلارى مەن رەسپۋبليكالىق بيۋدجەتتىڭ اتقارىلۋى, سول سياقتى جاڭا وقۋ جىلىنا دايىندىق ماسەلەلەرى پىسىقتالعان ەدى. جيىندا وزگە وڭىرلەرمەن قاتار جەتىسۋ وبلىسىنىڭ اكىمى بەيبىت يساباەۆ تا جاڭا وقۋ جىلىنا ءوڭىر مەكتەپتەرىنىڭ دايىندىعى جايىندا باياندادى.
جەتىسۋ وبلىسىنىڭ اكىمى بەيبىت يساباەۆتىڭ ايتۋىنشا, ايماقتا 340 مەكتەپ بولسا, سونىڭ ىشىندە ءۇش اۋىسىمدا وقىتاتىن مەكتەپتەر جوق. بيىل 15,9 ملرد تەڭگەگە جاڭادان 17 ءبىلىم بەرۋ نىسانىنىڭ قۇرىلىسى جۇرگىزىلۋدە. سونىڭ ىشىندە جىل سوڭىنا دەيىن 10 مەكتەپ, جازدىق لاگەر جانە مۋزىكالىق كوللەدج جاتاقحاناسى قولدانىسقا بەرىلەدى, قالعان 5 نىساننىڭ قۇرىلىسى 2023 جىلى اياقتالادى.
جىلدىڭ سوڭىنا دەيىن 58 مەكتەپ جاڭارتىلادى, ولارعا 2,1 ملرد تەڭگەگە جالپى سانى 90 ءتۇرلى ءپان كابينەتتەرى ساتىپ الىنۋدا. جالپىعا بىردەي ءبىلىم بەرۋ قورىنان الەۋمەتتىك جاعدايى تومەن وتباسىنان شىققان 14 مىڭ بالاعا مەكتەپ فورماسى مەن كەڭسە تاۋارلارىن الۋعا 500 ملن تەڭگەدەي قارجى بولىنگەن. جالپى وبلىستىڭ ءبىلىم بەرۋ سالاسى جاڭا وقۋ جىلىنا تولىقتاي ءازىر. وسى جەردە ايتا كەتەتىن جاعداي, ۇكىمەتتىڭ №64 قاۋلىسىنا جۋىردا عانا ەنگىزىلگەن وزگەرىستەرگە بايلانىستى از قامتىلعاندار ساناتىنداعى وتباسى بالالارىنا 37 389 تەڭگەدەن بەرىلۋى قاجەت. بۇگىنگە دەيىن بولىنگەن قارجىعا اۋدانداردا مەكتەپ فورمالارى مەن وقۋ قۇرالدارى ساتىپ الىنعاندىقتان, بەلگىلەنگەن سومانىڭ قالعان ايىرماشىلىعى اتا-انالاردىڭ جەكە شوتتارىنا اۋدارىلاتىن بولدى. سول سياقتى وبلىستا 17 مىڭنان استام وقۋشى ءبىر رەتتىك ىستىق تاماقپەن قامتاماسىز ەتىلەدى.
جالپى جەتىسۋ وبلىستىق ءبىلىم باسقارماسىنىڭ مالىمەتىنە سۇيەنسەك, بيىل ءبىرىنشى سىنىپقا 12 300 وقۋشى قابىلداندى. بالالاردىڭ قاۋىپسىز ورتادا ءبىلىم الۋىنا جاعداي جاسالعان. وڭىردەگى بارلىق مەكتەپ بەينەباقىلاۋ جۇيەلەرىمەن قامتىلعان, دەگەنمەن سونىڭ ىشىندە 208 مەكتەپتەگى بۇل جۇيە قايتا جاڭعىرتىلادى. جالپى 158 مەكتەپتىڭ بەينەباقىلاۋ كامەرالارى جەدەل باسقارۋ ورتالىقتارىنا قوسىلعان. بارلىق مەكتەپتە دابىل تۇيمەلەرى جۇمىس ىستەپ تۇر.
جەتىسۋ وبلىسى