تاۋەلسىزدىك العالى بەرى ۇمىت قالعان ءداستۇرلى ۇلتتىق سپورت تۇرلەرى جاڭعىرۋ ۇستىندە. دالانىڭ ءتوسىن دۇبىرلەتكەن جاۋىنگەر حالىقتىڭ بۇگىنگى ۇرپاعى دا دالانى اڭساپ تۇرادى. ۇلىلىعىمىزدىڭ بەلگىسىنە اينالعان, حالقىمىزدىڭ مىقتىلىعى مەن تەكتىلىگىن, مادەنيەتى مەن مىنەز-قۇلقىن تانىتاتىن ۇلتتىق سپورت ويىندارى كىمنىڭ بولسىن قانىن ويناتىپ, ءوزىنىڭ ۇلتتىق بولمىسىمەن قايتا قاۋىشتىراتىنى ءسوزسىز.
جاقىندا بالالار جىلى اياسىندا جانە سپورت كۇنىنە وراي اۋداندىق بايگە فەدەراتسياسىنىڭ ۇيىمداستىرۋىمەن, تاسقالا اۋدانى اكىمدىگىنىڭ جانە اۋداننىڭ جاناشىر ازاماتتارىنىڭ قولداۋىمەن ۇلتتىق ات سپورتى تۇرلەرىنەن رەسپۋبليكالىق اشىق بىرىنشىلىك ءوتتى. بىرىنشىلىكتىڭ اشىلۋ سالتاناتىندا ءسوز سويلەگەن اۋدان باسشىلىعىنىڭ وكىلى مەن باسقا دا ازاماتتار ۇلتتىق قۇندىلىقتارىمىزدى ۇلىقتاۋدىڭ ماڭىزى زور ەكەنىن جانە قۇندىلىقتارىمىزدى وسكەلەڭ ۇرپاقتىڭ بويىنا ءسىڭىرۋدىڭ ارتىقشىلىقتارىن, ۇلتتىق تاربيەنىڭ الاتىن ورنىن ەرەكشە اتاپ ءوتىپ, دالا قىزىقتارىن وتكىزۋگە باستاۋ بەردى.
بىرىنشىلىككە ەلىمىزدىڭ تۇكپىر-تۇكپىرىنەن توپ-توپ بولىپ, قاۋمالاپ شاباندوزدار جينالدى. تاي جارىسى, قۇنان بايگە, توپ بايگە جانە الامان بايگەدەن جۇلدەلەر ساراپقا سالىندى. ەشكىتاۋدىڭ قىرلارى شاباندوزداردى ءبىراز سىناپ, «جۇيرىكتەن جۇيرىك وزار جارىسقاندا» دەگەندەي, مىقتىلاردىڭ مىقتىسى, ناعىز جۇيرىك سايگ ۇلىكتەر جەڭىس مارەسىنە جەتتى. قازاق كۇرەسى, قوي كوتەرۋ جانە جاپپاي كوكپاردان دا تارتىستى باسەكەلەر تاسقالالىقتاردىڭ كوڭىلىنەن شىقتى.
تاسقالانىڭ دالاسىندا اسەم اندەر شىرقالدى. كيىز ۇيلەر تىگىلىپ, اۋدان كاسىپكەرلەرى جارمەڭكە ۇيىمداستىردى. بىرلىگى بەرەكەلى, تىرلىگى مەرەكەلى, ىنتىماعى جاراسقان ەشكىتاۋ ەتەگىندەگى ەڭسەلى ەل ۇيىمداستىرعان ءىس-شارا اۋدان تۇرعىندارى مەن قوناقتارىنىڭ جوعارى باعاسىنا يە بولدى.
رافحات حالەلوۆ,
جۋرناليست
باتىس قازاقستان وبلىسى,
تاسقالا اۋدانى