سوعىس جىلدارىندا مايدان دالاسىندا قازا تاپقان قازاقستاندىق جاۋىنگەر قالەي دۇزباەۆتىڭ سۇيەگى ماسكەۋدەن نۇر-سۇلتان قالاسىنا جەتكىزىلدى, دەپ حابارلايدى Egemen.kz قورعانىس مينيسترلىگىنە سىلتەمە جاساپ.
«قازاقستاندىقتاردىڭ مايدانداعى ەرلىگى ۇرپاقتىڭ جادىندا ماڭگى ساقتالادى. ولار بۇگىنگى وتان قورعاۋشىلار ءۇشىن مۇقالماس رۋحتىڭ, قاجىماس قايراتتىڭ, جانقيار ەرلىكتىڭ جانە وتانعا دەگەن سۇيىسپەنشىلىكتىڭ شىنايى ۇلگىسى. ءبىزدىڭ بىرلەسىپ اتقارىپ جاتقان جۇمىستارىمىز باتىر بابالاردىڭ ەرلىگىن تاريحتا ساقتاۋعا, جاستارعا اسكەري-پاتريوتتىق تاربيە بەرۋگە ەداۋىر ۇلەس قوساتىنىنا سەنىمدىمىن», دەدى قورعانىس ءمينيسترى, گەنەرال-پولكوۆنيك رۋسلان جاقسىلىقوۆ.
1902 جىلى باتىس قازاقستان وبلىسىندا تۋعان قالەي دۇزباەۆتىڭ جەرلەنگەن جەرىن 9 شىلدەدە لەنينگراد وبلىسىنىڭ توسنەنسك اۋدانىنداعى «زاسلون» ىزدەۋ جاساعىنىڭ مۇشەلەرى تاپقان بولاتىن. ونىڭ كىمگە تيەسىلى ەكەنى سارباز مەدالونىندا ساقتالعان جازباسىنا قاراپ انىقتالدى.
«Atamnyn اmanaty» ىزدەستىرۋ جاساعىنىڭ باسقارما توراعاسى مۇرات مولداعاليەۆ اتاپ وتكەندەي, بۇل كۇندەرى كالۋجسك وبلىسىنداعى اسكەري-تاريحي ەكسپەديتسياعا قازاقستاندىق بىرىككەن جاساق قاتىسىپ جاتىر. ول ەكى ەل ىزدەۋشىلەرىنىڭ بىرلەسكەن جۇمىسى جاڭا سەرپىن الاتىنىنا سەنىمدى.
ماۋسىم ايىندا قازاقستاندىق ءۇش جاۋىنگەر – تولەگەن ۇركەرباەۆتىڭ, پەتر ابراموۆيچ فومەنكونىڭ, نيكولاي ماتۆەەۆيچ گۋروۆتىڭ سۇيەكتەرىن ەلگە جەتكىزۋ مەن قايتا جەرلەۋ راسىمدەرى ۇيىمداستىرىلعان.
قالەي دۇزباەۆتىڭ سۇيەگىن قايتا جەرلەۋ ءراسىمى ونىڭ تۋعان جەرىندە اسكەري قۇرمەتكە ساي وتكىزىلەدى.