جەكسەنبى كۇنى استانادا تۋريزم جانە سپورت مينيسترلىگى, قالا اكىمدىگى مەن رەسپۋبليكالىق تاەكۆوندو فەدەراتسياسىنىڭ ۇيىمداستىرۋىمەن تۇڭعىش رەت سپورتتىڭ وسى ءتۇرىنىڭ تەحنيكاسىن كورسەتۋ (پۋمسە) بويىنشا ازيا چەمپيوناتى مەن WTF ۆەرسياسىنان ءحىح قۇرلىقتىق باسەكەسى وتەدى. وعان 20 ەلدىڭ 380 سپورتشىسى قاتىسادى.
سونىمەن بىرگە, مينيسترلىكتىڭ سپورت ىستەرى جونىندەگى كوميتەتىنىڭ توراعاسى ەلسيار قاناعاتوۆتىڭ ايتۋىنشا, سپورتشىلاردان باسقا چەمپيوناتقا 28 ەلدىڭ تەحنيكالىق جانە تورەلىك جاسايتىن قىزمەتكەرلەرى قاتىسىپ, تاجىريبەلەرىمەن بولىسەدى. وسى تۇستا ازيا چەمپيوناتىنىڭ استانادا العاش رەت وتكىزىلەتىندىكتەن اتالمىش مينيسترلىكتىڭ باستاماسىمەن 14-18 مامىر كۇندەرى تاەكۆوندودان تۇڭعىش رەت الەمنىڭ 35 ەلىنىڭ وكىلدەرى قاتىسقان تورەشىلەردىڭ حالىقارالىق سەمينار مەن ازيا تاەكۆوندو وداعى باس اسسامبلەياسىنىڭ كەزەكتى ءماجىلىسى وتكەنىن اتاپ ءوتۋ ءجون. سارسەنبىدە, اتالمىش جيىننىڭ سوڭعى كۇنى اتو باسشىسى داي سون لەي حالىقارالىق سەمينار مەن باس اسسامبلەيا وتىرىسىنىڭ جوعارى دەڭگەيدە وتكەنىن, وندا قازاقستاندا سپورتتىڭ وسى ءتۇرىنىڭ دامۋىنا قاتىستى بىرقاتار ماسەلەلەردىڭ دە قارالعانىن اتاپ ءوتتى. ونىڭ ايتۋىنشا, قازىرگى كۇنى قازاقستان ازيا قۇرلىعى بويىنشا تاەكۆوندونى دامىتۋدا بەسىنشى, ال الەمدە ون جەتىنشى ورىندى يەلەنىپ وتىر. الداعى كەزدە اتو ەلىمىزدە تاەكۆوندونىڭ ناسيحاتتالىپ, ونىڭ دامۋىنا قولدا بار مۇمكىندىكتى كورسەتەتىن بولادى.
ال بيىلعى ازيا چەمپيوناتىنا كەلەر بولساق, قازاقستان تاەكۆوندو فەدەراتسياسىنىڭ پرەزيدەنتى شامسات يسابەكوۆ, مەملەكەتتىك جاتتىقتىرۋشى ماقسۇت نارباەۆ پەن ۇلتتىق قۇرامانىڭ باس باپكەرى قايرات قىرعىزباەۆ ەلوردادا وتەتىن باسەكەدە ەرلەر جانە ايەلدەر قۇراماسىنىڭ بۇگىنگى تاڭدا قۇرلىق بويىنشا ەڭ ۇزدىك سانالاتىن وڭتۇستىك كورەيا, جاپونيا, يران مەن باسقا دا ەلدەردىڭ سپورتشىلارىنا لايىقتى دەڭگەيدە قارسىلىق كورسەتەتىنە سەنىم بىلدىرۋدە. ەستەرىڭىزگە سالا كەتسەك, وسى چەمپيوناتقا ۇلتتىق قۇراما ساپىندا بەيجىڭ وليمپياداسىنىڭ قولا جۇلدەگەرى, 87 كگ. سالماقتاعى ازيا چەمپيونى ارمان شىلمانوۆ تا قاتىساتىن بولادى.
داستان كەنجالين.