سقو-دا ەگىن جيناۋ ناۋقانى قاشان باستالادى

سقو اۋىل شارۋاشىلىعى جانە جەر قاتىناستارى باسقارماسىنىڭ باسشىسى مەيرام مەڭدىباەۆتىڭ ايتۋىنشا, وڭىردە ەگىن وراعى 20 تامىز باستالادى دەپ جوسپارلانعان.

قازىرگى ۋاقىتتا ناۋقانعا دايىندىق قىزۋ جۇرگىزىلىپ جاتىر. تەحنيكا سايلاندى. وراققا 7300 كومباين, سونىڭ ىشىندە 3800 ونىمدىلىگى جوعارى جاڭا تەحنيكا تارتىلماق. بيىل وبلىس كاسىپكەرلەرى 1400-دەن استام تەحنيكانى 33,1 ملرد تەڭگەگە ساتىپ الدى.

«وبلىستا 4,4 ملن گا ءداندى داقىل ەگىلدى. بۇل شامامەن وتكەن جىلعى كورسەتكىشپەن بىردەي. سونىڭ ىشىندە 3,1 ملن گا – بيداي, 1 ملن – مايلى ءداندى داقىل, قالعانى ءداندى-بۇرشاقتى داقىلدار. بيىل كۇنباعىستىڭ القابىن شامامەن ەكى ەسە ۇلعايتىپ, 119 مىڭ گا جەتكىزدىك. سونداي-اق جاسىمىق 66 مىڭ گا جەرگە ەگىلدى, بۇل بىلتىرعىمەن سالىستىرعاندا ەكى ەسە كوپ. وڭىرگە 78,5 مىڭ توننا ارزانداتىلعان باعامەن ديزەل وتىنى ءبولىندى, وپەراتورلار انىقتالدى. باعاسى وسى كۇزگى ناۋقانعا ليترىنە 219 تەڭگە بولىپ بەكىتىلدى», دەيدى مەيرام مەڭدىباەۆ.

بيىل جالپى اۋا رايى ديقاندار ءۇشىن قولايلى بولدى. جاۋىن دا بار, كۇن دە ىستىق. ماماننىڭ ايتۋىنشا, سوعان قاراعاندا استىقتىڭ شىعىمى دا, ساپاسى دا جامان ەمەس.

«ەندىگى مىندەت – جاز بويى ماڭداي تەرمەن وسىرىلگەن ءداندى شاشاۋ شىعارماي جيناپ الۋ. ەلەۆاتورلار مەن قامبالار بيىلعى جىلدىڭ جاڭا استىعىن قابىلداۋعا دايىن تۇر. جالپى سىيىمدىلىعى - 6,6 ملن توننا. وراق ناۋقانىن مەرزىمىندە وتكىزۋگە جاعداي بار, تەك اۋا رايى كەدەرگى كەلتىرمەسە بولعانى», دەيدى باسقارما باسشىسى.

قازىرگى ۋاقىتتا شارۋاشىلىقتار قىستىڭ قامىن جاساپ, شوپكە كىرىسكەن. بيىل وڭىردە ءشوپتىڭ دە شىعىمى جاقسى.