قاراعاندىداعى كوپقاباتتى ۇيلەردىڭ اۋلاسىندا ەكى جىگىتتىڭ ءمايىتى تابىلدى. كوپ ۇزاماستان پوليتسەيلەر ولاردى ولتىرگەن ەر ادامدى ۇستادى, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ مالىمەتىنشە, قىلمىستىق وقيعا 26 شىلدەدە ساعات 1.30 شاماسىندا بولعان.
«قاراعاندىدا كوپقاباتتى ۇيلەردىڭ ءبىرىنىڭ اۋلاسىنان ەكى ەر ادامنىڭ ءمايىتى تابىلدى. ادام ءولتىردى دەگەن كۇدىكپەن ىرگەلەس تۇرعان تۇرعىن ۇيلەر ماڭىنان 23 جاستاعى كۇدىكتى ۇستالدى. ول ءۇي اۋلاسىندا تۇرعاندا جانجال تۋىنداپ, سول كەزدە ەكى جىگىتتى پىشاقتاپ تاستاعانىن مويىندادى. كۇدىكتىدەن قىلمىس قارۋى تاركىلەندى», دەدى پوليتسيا دەپارتامەنتى باستىعىنىڭ ورىنباسارى ءابىل ءابىلدين.
قازىرگى كەزدە قر قىلمىستىق كودەكسىنىڭ 99-بابىنىڭ 2-بولىگى (كىسى ءولتىرۋ) بويىنشا قىلمىستىق ءىس قوزعالدى.
«پوليتسيا زارداپ شەككەندەردىڭ كىم ەكەنىن انىقتادى. ولار: 18 جانە 20 جاستاعى جاس جىگىتتەر», دەدى ءابىلدين.