ماڭعىستاۋدا بىرنەشە ەلدى مەكەن قۇم استىندا قالۋى مۇمكىن

«قۇم مەنىڭ بالا كەزىمدە, شامامەن 60 جىلداي بۇرىن, اۋىلدان 300 مەتردەي جەردە ەدى. 1996 جىلدان باستاپ قۇم كوشىپ باستادى, سوڭعى كەزدە ۇدەي ءتۇستى. قورا, قۇدىق دەگەندەردى باسىپ قالدى. ەندى وسى قۇمدى توقتاتۋ كەرەك. قورشاۋ ورناتاتىن بولسا, ءشوپ وسەر ەدى», دەپ شاعىمداندى جارما اۋىلىنىڭ تۇرعىنى يگىلىك وتەسىنوۆ.

جارما اۋىلىندا 100-گە جۋىق ادام تۇرادى. ولار جىل سايىن ارنايى تەحنيكا جالداپ, اۋلالارىن قۇمنان ارشىپ, الىسقا تاسىتادى. بىراق وعان تۇرعىلىقتى حالىقتىڭ ءبارىنىڭ بىردەي جاعدايى جەتپەيدى. سوندىقتان جاۋاپتىلاردىڭ تەزىرەك سەكسەۋىل ەگىپ, قۇم كوشكىنىنە تويتارىس بەرۋىن سۇرايدى. ۇقساس جاعداي ساۋىسقان جانە سازدى ەلدى مەكەندەرىندە دە ورىن الىپ وتىر.

«جىل باسىنان باستاپ ءبىز ءتورت رەت كونكۋرس جاريالاعان ەدىك. وكىنىشكە قاراي, مەردىگەرلەر كونكۋرسقا قاتىسپادى. ءبىر اپتا بۇرىن بەسىنشى رەت كونكۋرس جاريالاندى. 2004 جىلدان بەرى سەكسەۋىل ەگۋ جۇمىسىن جۇرگىزىپ كەلە جاتىرمىز. قازىرگى ۋاقىتقا دەيىن سەنەك, تۇششىقۇدىق, شەبىر جانە ۇشتاعان اۋىلدارىنا 3236 گەكتار سەكسەۋىل ەگىلدى», دەدى ماڭعىستاۋ وبلىستىق تابيعي رەسۋرستار باسقارماسىنىڭ ءبولىم باسشىسى ەربول دەنوۆ.

وسىمەن بەسىنشى رەت جاريالانعان بايقاۋدا مەردىگەر انىقتالسا, جىل سوڭىنا دەيىن ءۇش ەلدى مەكەندە 135 گەكتار اۋماق قورشالىپ, كەلەر جىلى سەكسەۋىل ەگۋ جۇمىسى باستالادى. بۇل جۇمىستارعا بيۋدجەتتەن 408 ميلليون تەڭگە قاراجات قاراستىرىلعان.