جۇقپالى ىندەتتىڭ جامانات حابارى جار استىنان ەستىلىپ جاتىر. كەيىنگى كۇندەرى ىندەت جۇقتىرعان ادامداردىڭ سانى ارتقانى تۋرالى اقپارات جيىلەي باستادى. بۇل قاتاردا الماتى وبلىسىنداعى ەپيدەميالىق جاعدايدىڭ اسقىنۋى دا بايقالادى.
وتكەن اپتادا وڭىردە كوروناۆيرۋس ينفەكتسياسىن جۇقتىرۋدىڭ 194 جاعدايى تىركەلگەن ەكەن. ونىڭ ىشىندە ءبىر تاۋلىكتە انىقتالعانى 51 ناۋقاس بولاتىن. ال كەشەگى كۇننىڭ مالىمەتى بويىنشا بۇل احۋال اسقىنىپ, اۋىرعاندار قاتارى تاۋلىگىنە 245 ادامعا كوبەيگەنى بايقالدى. اۋداندار بويىنشا جۇقتىرۋ دەرەگى دە ارقيلى. مىسالى, بالقاش پەن ىلە اۋدانىنداعى احۋال – 0,09 پايىز بولسا, تالعار اۋدانىنداعى ءوسىم – 0,05 شاماسىندا ەكەن. ال قاراساي اۋدانىنداعى ىندەت جۇقتىراعان ناۋقاس سانى 0,1 پايىزعا وسسە, كەگەن اۋدانىنداعى كورسەتكىش 0,2 پايىزعا كوبەيگەن. دەگەنمەن وبلىس جۇقپالى ىندەتتىڭ تارالۋ كورسەتكىشى بويىنشا «جاسىل ايماقتاعى» ورنىن ساقتاپ تۇر.
ايتپاقشى, وبلىستا تۇرعىندارعا ەكپە سالۋ جۇمىسى بەلسەندى جالعاسىپ كەلەدى. قازىرگە دەيىن ۆاكتسينانىڭ ءبىرىنشى كومپونەنتىن 719 773 ادام الدى. بۇل – يممۋنداۋعا جاتاتىن ەرەسەك حالىقتىڭ 88,3 پايىزى. ال ەكپەنىڭ ەكىنشى كومپونەنتىن 689 914 ادام نەمەسە حالىقتىڭ 84,7 پايىزى سالدىرعان. مۇنان بولەك 292 650 ادام رەۆاكتسينالاۋ كۋرسىنان ءوتىپ, 9 304 ازامات يممۋنيتەتتى نىعايتۋ ماقساتىندا ۆاكتسينانىڭ 4-دوزاسىن العان كورىنەدى.
الماتى وبلىسى