قاراعاندى ءوڭىرى «جاسىل ايماقتا» بولعانىمەن, سوڭعى تاۋلىكتەردەگى كەلىپ تۇسكەن اقپاراتتارعا قاراعاندا, «جامان تۇماۋ» تاعى دا باس كوتەرە باستاعانعا ۇقسايدى. ماسەلەن, وبلىستىق سانيتارلىق-ەپيدەميولوگيالىق باقىلاۋ دەپارتامەنتى ۇسىنعان مالىمەتكە ساي, سوڭعى تاۋلىكتە COVID-19 جۇقتىرعان 188 ناۋقاس تىركەلدى.
جالپى, وڭىردە پاندەميا باستالعالى بۇگىنگە دەيىن 152 391 ادام كوروناۆيرۋس ينفەكتسياسىمەن اۋىرعان ەكەن.
بۇل دەرتكە توسقاۋىل بولا الاتىن كۇشتىڭ ۆاكتسينا سالدىرۋ ەكەنى بەلگىلى. وسى ورايدا قاراعاندى وڭىرىندە تۇرعىنداردىڭ 75,2%-ى, ياعني 675 058 ادام ەكپەنىڭ ءبىرىنشى كومپونەنتىن قابىلداپتى. ال ۆاكتسينانىڭ ەكىنشى كومپونەنتىن سالدىرعانداردىڭ سانى 633 013 ادامعا جەتكەن. بۇل – جالپى وبلىس تۇرعىندارىنىڭ 44,3 پايىزى.
قازىرگى ۋاقىتتا رەۆاكتسينا سالدىرۋ دا كۇن تارتىبىندەگى كەزەك كۇتتىرمەيتىن ماسەلەنىڭ ءبىرى بولىپ تۇر. وبلىستا بۇگىنگە دەيىن 245 963 ادام ءۇشىنشى مارتە ەكپە سالدىرىپتى. مۇنىڭ ىشىندە Pfizer ءونىمى «كوميرناتي» ۆاكتسيناسىن سالدىرعانداردىڭ سانى 67 336 ادامدى قۇراعان. بۇدان بولەك وسى جىلدىڭ 25 مامىرىنان باستاپ وڭىردە رەۆاكتسينا قايتا سالىنا باستادى. قازىردىڭ وزىندە 18 743 ادام وسى ەكپەنى العان.
ال ەندى, كوروناۆيرۋس ينفەكتسياسىنىڭ ءورشي باستاعانىنا كەلسەك, قاراعاندى وبلىسىنىڭ سانەپيدباقىلاۋ دەپارتامەنتى ءوڭىردىڭ بارلىق تۇرعىندارى مەن قوناقتارىنا جابىق عيماراتتاردا, قوعامدىق كولىكتەردە ماسكا تاعىپ ءجۇرۋ كەرەگىن ەسكەرتە باستادى. سونىمەن قاتار اتالعان ۆەدومستۆونىڭ ماماندارى ۆاكتسينا سالدىرۋدىڭ تولىق كۋرسىنان وتكەندەر ءۇشىن «جامان تۇماۋدان» كەلەر قاۋىپتىڭ جوعىن جوققا ءتان ەكەنىن ايتىپ وتىر.
قاراعاندى وبلىسى