قاراعايدى نەگە كەستى؟

ءبىلىم ورداسى باسشىسىنىڭ بۇل ارەكەتى اتا-انالاردىڭ اشۋىن تۋعىزعان. ءبىر ايدان سوڭ جاڭا وقۋ جىلى باستالادى. مەك­تە­پى­شىلىك ءىس-شارالاردا كۇن توبەدەن تونگەندە وقۋشىلار وسى قيىلعان اعاشتاردى سايالايدى ەكەن. ءارى ءبىلىم شاڭى­راعىنىڭ كوركىندەي كوزگە ىستىق كورىنەدى. ەندى وقۋشىلار مەكتەپ اۋلاسىن تازدىڭ باسىنداي تىقىرلاپ تاستاعاندىقتان ۇزىلىستە كولەڭكە ىزدەپ سەندەلمەك. بۇل – «اتاڭنان مال قالعانشا تال قالسىن» دەپ تۇيسىنگەن قازاقتىڭ دۇنيەتانىمىنا جات ارەكەت. مۇ­نى بىزگە جينالعان ءبىر توپ تۇرعىن ايتتى.

«مەكتەپ ماڭىنداعى اعاشتار زاڭسىز كەسىلدى. بۇل دۇرىس ەمەس. ناقتى ءبىر شەشىم شىقسا ۇندەمەس ەدىك. مەكتەپ باسشىلارىنىڭ قاراعايلاردىڭ بالالارعا قاۋىپ ءتوندىرىپ تۇرعانىن, بولاشاقتا مۇندا شىرشا اعاشى ەگىلەتىنىن ايتىپ جاتىر. ەگەر تامىرىن الىپ قاراساق, قاراعايدىكى جايىلىپ, شىرشانىكى تىك وسەدى. ياعني شىرشا اعاشى ودان دا قاۋىپتى», دەيدى قالا تۇرعىنى ەكاتەرينا تۋسۋپباەۆا.

شاھار تۇرعىندارىنىڭ بىرقاتارى «قاۋىپسىزدىكتى ويلاسا, مەكتەپكە قاراما-قار­سى ورنالاسقان جاتاقحانا اۋلاسىن­داعى قۇلايىن دەپ تۇرعان قاراعاي­لاردى نەگە شاپپاعان» دەپ رەنىشىن ءبىل­دىردى. ءتىپتى كەيبىرى مەكتەپ باسشىلىعىنىڭ ءىس-ارەكەتىن اقتاپ الەك. ء«بىلىم وشاعى باسشىسىنىڭ اعاشتاردى رۇقساتسىز كەسكەنى دۇرىس ەمەس شىعار, بىراق ول ەڭ الدىمەن قاۋىپسىزدىكتى ويلادى», دەپ بىرجاقتى قاراماۋعا شاقىردى. ال مەكتەپ ديرەكتورى جانار جاقىپبەكوۆا ءوز كىناسىن مويىنداپ وتىر.

«كىنامدى مويىندايمىن. مەكتەپتە مىڭنان اسا بالا وقيدى. كىشكەنتاي 30 بالدىرعان با­لاباقشادا ءجۇر. 100-دەن اسا قىزمەتكەر بار. وقۋشىلار مەك­تەپتىڭ اۋلاسىندا جۇگىرىپ جۇرەدى. مەن بۇل جەردە اعاشتاردى ەمەس, بالالاردىڭ, مەكتەپ قىز­مەت­كەرلەرىنىڭ قاۋىپسىزدىگىن كوبىرەك ويلادىم», دەيدى ج.جا­قىپبەكوۆا.

جالپى, مەكتەپ اۋلاسىنان 16 قاراعاي, 7 قاراعاش, 1 تەرەك كە­سىلگەن. بۇل ماسەلە ءالى قارالۋدا. ءبىلىم وشاعى باسشىسىنىڭ كىنالى, كىناسىز ەكەنى جايلى ناقتى شەشىم جاقىن ارادا شىعادى.

جەتىسۋ وبلىسى