قوناەۆ قالاسىنىڭ ماڭىندا سينتەتيكالىق ەسىرتكى جاساۋمەن اينالىسقان كۇدىكتىلەر انىقتالدى. ءتىنتۋ بارىسىندا ءۇش ەر ادام ۇستالدى, دەپ حابارلايدى Egemen.kz.
الماتى وبلىستىق پوليتسيا دەپارتامەنتى ۇستالعانداردىڭ ءبىرى الماتى قالاسىنىڭ, قالعان ەكەۋى ىلە اۋدانىنىڭ تۇرعىنى ەكەنىن حابارلادى. ولار قوناەۆ قالاسىنان بەس شاقىرىم جەردە قورشالعان اۋماقتا ەشكىم تۇرمايتىن ەكى ۇيدە جاسىرىن ەسىرتكى زەرتحاناسىن ۇيىمداستىرعان.
اتالعان جەردە مەفەدرون وندىرەتىن ارنايى قوندىرعىلار ورناتىلعانى انىقتالدى. تەكسەرۋ بارىسىندا كوپتەگەن پلاستيكالىق ىدىس پەن ۇنتاق ءتارىزدى زات جانە ارنايى ولشەگىش قۇرالدار تابىلدى.
تابىلعان زاتتار اراسىنان 52,82 گرامم ۇنتاقتىڭ زەرتحانالىق تەكسەرۋ بارىسىندا مەفەدرون ەكەنى انىقتالدى. سونداي-اق 2 تونناعا جۋىق حيميالىق سۇيىقتىق تاركىلەندى.
«قر قك 297 بابى بويىنشا تەرگەۋ امالدارى جۇرگىزىلۋدە. كۇدىكتىلەردىڭ ءبىرى قاماۋعا الىنىپ, قالعان ەكەۋىنەن مىندەتتى كەلۋ تۋرالى قولحات الىندى», دەلىنگەن ۆەدومستۆو اقپاراتىندا.