استانا. 30 ءساۋىر. ەرتەڭ قازاقستان حالقىنىڭ بىرلىگى كۇنى ەلىمىز بويىنشا كەڭ كولەمدە اتالىپ وتەدى. بۇل ايتۋلى مەرەكەدە تاتۋ-ءتاتتى ءومىرىمىز, كەڭ پەيىلىمىز, مولىنان بۇيىرىلعان ىرىزىق-نەسىبەمىز كورىنىس بەرمەك. بۇل تۋرالى egemen.kz ءتىلشىسى حابارلادى.
1 مامىر مەيرامىنىڭ جوعارى دەڭگەيدە ۇيىمداستىرىلۋىنا, اسىرەسە, قازاقستان حالقىنىڭ اسسامبلەياسى, بارلىق ەتنومادەني بىرلەستىكتەر سۇبەلى ۇلەس قوسقالى وتىر.
قازىرگى تاڭدا مادەني-رۋحاني ومىرىمىزدەن لايىقتى ورنىن تاپقان اسسامبلەيا جانە ەتنومادەني ورتالىقتار تاراپىنان ۇيىمداستىرىلاتىن شارالار ۇشان-تەڭىز. بۇلاردىڭ مەملەكەت مەرەيىن اسىرۋعا تالپىنعان وسىناۋ نيەتتەرىنە العىستان باسقا ايتار ءسوز بولماس دەپ ويلايمىز.
اسسامبلەيانىڭ ءححى سەسسياسى تابىستى اياقتالعاننان كەيىن كوپ وتپەي ءوز كەزەگىمەن كەلىپ جەتكەن 1 مامىر مەرەكەسىندە بىرلىك پەن ىنتىماقتى تۋ ەتكەن حالقىمىز رۋحاني كەلىسىمنىڭ, ادامگەرشىلىكتىڭ قازاقستاندىق مودەلىن وسىلايشا تاعى ءبىر جاڭعىرتپاق.
ەستەرىڭىزگە سالا كەتەيىك, اعىمداعى جىلدىڭ 18 ساۋىرىندە وتكەن قازاقستان حالقى اسسامبلەياسىنىڭ ءححى سەسسياسىندا مەملەكەت باسشىسى: «قازاقستان حالقى اسسامبلەياسى – ول ءارى ىرگەتاس, ءارى بەيبىتشىلىك, رۋحاني كەلىسىم مادەنيەتىنىڭ نەگىزگى قاعيداتى. اسسامبلەيا – بۇكىل ازاماتتاردىڭ بۇكىلحالىقتىق وكىلدەرى مۇددەلەرىنىڭ يننوۆاتسيالىق مودەلى جانە ءبىزدىڭ جاس دەموكراتيانىڭ تابىستى قۇرالى. ول بۇكىل ەل بويىنشا 820 ەتنومادەني بىرلەستىكتەر قىزمەتىن شوعىرلاندىرادى. بۇل دەگەنىمىز 70 مىڭ بەلسەندى. ال وسى جۇمىسقا بارلىعى 3 ميلليوننان استام ادام قاتىسادى», – دەگەن بولاتىن. بۇدان ءبىز اسسامبلەيانىڭ جانە ونىڭ ماڭىنا توپتاسقان ەتنومادەني بىرلەستىكتەردىڭ ەل بىرلىگىن نىعايتۋداعى ءرولىن اڭعارامىز.
پرەزيدەنتتىڭ ايتۋىنشا, وتكەن جىلى اسسامبلەيا 10 مىڭ ءىس-شارا ۇيىمداستىرىپتى. وسىناۋ شارالارعا 3,5 ميلليوننان استام ادام قاتىسقان. سونداي-اق, كوپتەگەن وڭىرلەردە دوستىق ۇيلەرى قۇرىلعان.
تاعى ءبىر ايتا كەتەر ءجايت, بۇگىندە اسسامبلەيانى 2020 جىلعا دەيىن دامىتۋ تۇجىرىمداماسى جۇزەگە اسىرىلۋدا.
جولدىباي بازار.
دەرەككوز: egemen.kz.
فوتو: ortalyk-kaz.kz.