«استانا بالەت» تەاترى توعىزىنشى ماۋسىمىنىڭ شىمىلدىعىن «ورفەي مەن ەۆريديكا» ءبىر اكتىلى بالەتىنىڭ پرەمەراسىمەن جاپتى. باس ديريجەر ارمان ورازعاليەۆتىڭ جەتەكشىلىگىندەگى سيمفونيالىق وركەستردىڭ سۇيەمەلدەۋىمەن وتكەن سپەكتاكلدى حورەوگراف كريستينا پولين قويدى.
«ورفەي مەن ەۆريديكا» بالەتى ءوزىنىڭ سىرشىل سازدى اۋەنىمەن, جۇرەك پەرنەسىن ءتۇرتىپ, سەزىم سىرىن شەرتەر نازىك تە سۇلۋ مۋزىكا مەن ءبيدىڭ ءساتتى ۇندەسۋىمەن ەرەكشەلەنەدى. قويىلىم سەرگەي پروكوفەۆ, ەدۋارد ۋيليام ەلگار, گەورگ فريدريح گەندەل, دەۆيدسون دجاكونەللو سىندى كومپوزيتورلاردىڭ اسەم اۋەندەرىمەن سۇيەمەلدەنگەن. ال كوستيۋم بويىنشا سۋرەتشى دەننيس پەشكەنىڭ ساحنالىق كيىمدەرىندە ايگىلى ءميفتىڭ سيمۆوليكاسى شىنايى كورىنىس تاپسا, ستسەنوگراف وتتو بۋبەنيچەكتىڭ دەكوراتسياسىندا تاۋعا ۇقسايتىن بىركەلكى ەمەس, اينالى گەومەتريالىق كەسكىندەر قولدانىلدى. مۇنىڭ بارلىعى سپەكتاكلدىڭ شىرايىن اشىپ, كوركىن كىرگىزگەنى انىق. دەگەنمەن, ەڭ باستىسى, حورەوگرافيا مەن استانالىق تەاتر ارتىستەرىنىڭ شەبەرلىگى كورەرمەنىن ايرىقشا ءتانتى ەتتى.
– ساحناداعى ارەكەت – شىعارماشىلىق قيالدىڭ جەمىسى عوي. سوندىقتان دا مەن ءوزىمنىڭ قويىلىمدارىما ۇنەمى گرەك ميفولوگياسىنىڭ كەيىپكەرلەرىن كىرىكتىرگەندى ۇناتامىن. ايتسە دە, ءميفتىڭ مازمۇنىن, سونىمەن قاتار كەيىپكەرلەردىڭ مىنەز-قۇلقىن ءسال-ءپال وزگەرتەمىن. مەن ءۇشىن, ەڭ باستىسى – سپەكتاكل مازمۇنىن بيشىلەردىڭ قيمىلىمەن جەتكىزە ءبىلۋ. ياعني, كوستيۋم, دەكوراتسيا, وزگە دە ساحنالىق بەزەندىرۋدى مەيلىنشە از قولدانۋعا تىرىسامىن. ماڭىزدىسى – بي ارقىلى كوڭىل كۇي ىرعاعىن جەتكىزۋ, دەدى پرەمەرادان كەيىن قويىلىم تۋرالى ويىمەن بولىسكەن قويۋشى-حورەوگراف كريستينا پولين.
ورفەيدىڭ ءرولىن جەتەكشى سوليست سۇندەت سۇلتانوۆ پەن ءبىرىنشى سوليست ۋەسلي كارۆالو, مۋزا ءارى ورفەيدىڭ سۇيىكتىسىن جەتەكشى سوليست اينۇر ابىلعازينا مەن تاتيانا تەن, ال كەمتالانت جازۋشى اريستەيدىڭ بەينەسىن دارىندى بيشىلەر ەرقانات ەرماعامبەت پەن ەلدار سارسەمباەۆ سومدادى.
سونىمەن قاتار جاڭا قويىلىمعا يليا ماناەنكوۆ, نازەركە ايمۇحامەتوۆا, دارينا قايراشەۆا, بايقادام تۇنعاتاروۆ, ارتۋر ەدسون, ناتاليا فەرناندەس-مەنەس, اڭساعان كوبەنتاي, انار دۇكيەۆا, اققالي تۇرعالي, نۇرزات بەرىكقازى ۇلى جانە سەرىك امانجول سىندى تەاتر ارتىستەرى قاتىستى.
ماۋسىمجابار كورىكتى كەشتىڭ ەكىنشى بولىمىندە استانالىق كورەرمەن نازارىنا ۇسىنىلعان چەح ەلىنىڭ اتى اڭىزعا اينالعان ءپالساپاشى-حورەوگرافى يرجي كيلياننىڭ «جولدان تايعاندار» بالەتى سيمفونيالىق وركەستردىڭ ۇرمالى اسپاپتار توبىنىڭ سۇيەمەلدەۋىمەن ورىندالدى. عاجايىپ كيليان حورەوگرافياسى مەن سۇڭعىلا ستيۆەن رايحتىڭ داۋىلپاز كومپوزيتسياسىنىڭ شىعارماشىلىق ۇندەستىگىنىڭ جەمىسى – ساحناداعى سەگىز بالەرينانىڭ قالىقتاعان قيمىلىنان-اق ءبىلىنىپ, سەزىلىپ تۇردى. حورەورافتىڭ تۋىندىسى اۋەزدىلىگىمەن, مونوحرومدى ەستەتيكا جانە ورىنداۋشىلىقتىڭ الەمدىك دەڭگەيىمەن ەرەكشەلەندى.
– بيىلعى تەاتر ماۋسىمى گاسترولدىك ساپارلار جاعىنان دا, ءتۇرلى جوبالار جاعىنان دا وتە مازمۇندى بولدى. پرەمەرالىق قويىلىمدار, سونىمەن قاتار رەپەرتۋارداعى ۇزدىك سپەكتاكلدەر كورەرمەن نازارىنا ۇسىنىلدى. «ورفەي مەن ەۆريديكا» بالەتىنىڭ پرەمەراسى دا ويداعىداي ءوتتى. كورەرمەن زور ىقىلاسىن, قوشەمەتىن ءبىلدىردى. تەاتر سۇيەر قاۋىمنىڭ ارقاسىندا ءبىزدىڭ دە تىنىسىمىز اشىلىپ, تىڭ دۇنيەلەر شىعارۋعا تالپىنىپ, شابىتقا بولەنىپ, اسا مارتەبەلى كورەرمەندەرىمىزبەن قايتا قاۋىشۋ ءۇشىن الداعى تەاتر ماۋسىمىن اسىعا كۇتەتىن بولامىز, دەپ تەاتر ديرەكتورى الەكساندر سوۆوستيانوۆ ماۋسىمجابار ونەر وقيعاسىن تۇيىندەدى.
مادەنيەت جانە سپورت مينيسترلىگىنىڭ قولداۋىمەن وتكەن تەاتردىڭ جاڭا تۋىندىسىنا ءتانتى بولعان كورەرمەن سپەكتاكل سوڭىنان جەمىستى جۇمىس اتقارعان شىعارماشىلىق توپقا زور قوشەمەتىن ءبىلدىرىپ, تولاسسىز شاپالاعىن جاۋدىردى.