قاراعاندىدا شەكارادان زاڭسىز وتكەن شەتەلدىكتەر ۇستالدى

قاراعاندى قالاسىنىڭ پب وڭتۇستىك-شىعىس پوليتسيا ءبولىمىنىڭ ۋچاسكەلىك ينسپەكتورلارى اۋماقتىق پاتەر ارالاۋ جۇمىستارىن جۇرگىزدى. كوپقاباتتى ۇيدەگى پاتەرلەردىڭ بىرىندە 27 جاستاعى ەر ادام كۇدىك تۋعىزعان. قۇجاتتارىن تەكسەرۋ بارىسىندا ونىڭ وزبەكستان رەسپۋبليكاسىنىڭ ازاماتى ەكەنى انىقتالدى. دەگەنمەن ونىڭ ۇسىنعان تولقۇجاتى كۇماندى كورىندى. كەيىن ەر ادامنىڭ تولقۇجاتى جالعان ەكەنى بەلگىلى بولدى.

ايتا كەتەيىك, اتالعان ازامات 2019 جىلى قاراعاندىعا كەلىپ, كوشى-قون زاڭناماسىن بۇزعان. بۇعان قوسا, ول قازاقستان اۋماعىندا ءجۇرىپ-تۇرۋ مەرزىمىن بۇزدى. قاراعاندى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن ەلگە بىرنەشە جىلعا كىرۋگە تىيىم سالىنعان.

وزبەكستاندا بولعان كەزىندە اتالعان جىگىت ءوزىنىڭ جەكە مالىمەتتەرىن تولىعىمەن وزگەرتكەن: تەگىن, اتىن, اكەسىنىڭ اتىن. جاڭا تولقۇجات جاساتىپ الىپ, قازاقستانعا قايتا ورالعان, الايدا ونىڭ مۇنداي قيتۇرقى امال-ارەكەتى اشكەرە بولىپ قالدى.

«زاڭسىز - 2022» جەدەل الدىن الۋ ءىس-شاراسى بارىسىندا قىزمەتكەرلەر تاجىكستان رەسپۋبليكاسىنىڭ 25 جاستاعى ازاماتىن انىقتادى.

شەتەلدىكتىڭ تولقۇجاتىندا ونىڭ قازاقستان شەكاراسىنان وتكەنى تۋرالى بەلگى بولماعان. ەكى دەرەك بويىنشا قر قك 392-بابى «مەملەكەتتىك شەكارانى قاساقانا زاڭسىز كەسىپ ءوتۋ» بويىنشا قىلمىستىق ءىس قوزعالدى.

تەرگەۋ امالدارى جۇرگىزىلىپ جاتىر.