جاقىندا قازاقستان رەسپۋبليكاسى پرەزيدەنتى جانىنان قۇرىلعان ۇلتتىق قۇرىلتايعا مۇشە بولدىم. جاڭا قازاقستان تاريحىنداعى ماڭىزدى وقيعا ۇلتتىق قۇرىلتايدىڭ ۇلىتاۋ وبلىسىندا وتكىزىلۋىنىڭ ەكى ايرىقشا ماعىناسى بار. وسى ايماقتىڭ تۇرعىنى رەتىندە بۇل تاڭداۋدىڭ مانىنە توقتالعىم كەلەدى.
قۇرىلتايدىڭ ۇلىتاۋ وڭىرىندە ءوتۋى – وبلىستىڭ پروبلەمالىق ماسەلەلەرىنە نازار اۋدارىپ, ولاردى كۇن تارتىبىنە ەنگىزۋگە جول اشتى. وبلىس مارتەبەسىنەن ايىرىلعان جيىرما جىلدا اۋماقتىڭ ەكولوگيالىق جاعدايى ناشارلادى. ءوڭىردى باسىپ وتەتىن رەسپۋبليكالىق جولدار توزىپ كەتتى. ينجەنەرلىك كوممۋنيكاتسيالار جۇيەسى ەسكىردى. الەۋمەتتىك سالادا پروبلەما كوپ. پرەزيدەنت جەزقازعان قالاسىنا بارعاندا وبلىستاعى جاعدايمەن مۇقيات تانىسىپ, ءوڭىردى دامىتۋ جونىندە بىرقاتار تاپسىرما بەردى. حالىقتىڭ ءومىر ءسۇرۋ ساپاسىن جاقسارتۋ, ءسوزسىز, پرەزيدەنتتىڭ باستى نازارىندا. ۇكىمەت پەن وبلىس باسشىلىعىنا جول سالاسىن, ەكولوگيانى, ءبىلىم بەرۋدى جاقسارتۋعا كۇش سالۋدى تاپسىردى.
وبلىستىڭ باس جۇمىس بەرۋشىسى – «قازاقمىس» كومپانياسى. مەملەكەت باسشىسى قاسىم-جومارت توقاەۆ «قازاقمىس كورپوراتسياسى» جشس باسشىلىعىنا بيزنەستىڭ الەۋمەتتىك جاۋاپكەرشىلىگى تۋرالى قاتاڭ ەسكەرتتى. بيزنەستىڭ الەۋمەتتىك جاۋاپكەرشىلىگى اياسىندا ءىرى مىس ونەركاسىپ نىسانى بيىل اۋماققا 25,4 ميلليارد تەڭگە بولمەك. الايدا قاسىم-جومارت توقاەۆ بۇل قاراجاتتىڭ جەتكىلىكسىز ەكەنىن اتاپ كورسەتىپ, ونى ۇلعايتۋدى ۇسىندى. ءوز كەزەگىندە كومپانيا باسشىلىعى مەديتسيناعا, بىلىمگە, سپورتقا ەرەكشە نازار اۋدارۋعا ۋادە بەردى. مىسالى, كەلەسى جىلى جەزقازعاندا بالالار سپورت اكادەمياسى مەن 200 بالاعا ارنالعان ينتەرنات سالۋ جوسپارلانۋدا. كومپانيا تۇرعىن ءۇي قۇرىلىسىن جاڭا ستاندارتتار بويىنشا باستاۋدى جوسپارلاپ وتىر. جاڭا اكىم بەرىك ابدىعاليدىڭ مالىمەتى بويىنشا, جەزقازعاندا تۇرعىن ءۇي قورىنىڭ 33 پايىزى ەسكىرگەن. شىنىندا دا, كەنشىلەر قالاسىندا قيراعان ۇيلەر كوپ. بۇل ماسەلەنى تۇرعىن ۇيلەردى جاڭارتۋ باعدارلاماسى اياسىندا شەشۋ جوسپارلانعان. ونىڭ اياسىندا 2023 جىلدىڭ سوڭىنا دەيىن 20 تۇرعىن ءۇي سالۋ كوزدەلگەنى قۋانتتى.
ءوڭىر ءۇشىن ەكىنشى ماڭىزدى ماسەلە – ۇلىتاۋدا ۇلتتىق قۇرىلتايدى وتكىزۋ ارقىلى مەملەكەت باسشىسى مىقتى «ماركەتينگتىك قادام» جاسادى. پرەزيدەنت قازاقستان تاريحىنداعى ءىرى وقيعا قۇرىلتايدى جوشى حان كەسەنەسى ماڭىندا وتكىزۋ ارقىلى الەمنىڭ نازارىن وسى وڭىرگە اۋدارۋدى كوزدەدى. تاريحي ورىندى كورۋ ءۇشىن وتاندىق جانە شەتەلدىك تۋريستەر اعىلۋى مۇمكىن. ەندى مۇندا تۋريزم قارقىندى داميدى دەپ ويلايمىن.
ۇلتتىق قۇرىلتاي مۇشەسى بولۋ – مەن ءۇشىن ۇلكەن مارتەبە. وسىلايشا, مەملەكەت باسشىسى كوپبالالى انالارعا دا سەنىم ءبىلدىردى دەپ سانايمىن.
ءلاززات قوجاحمەتوۆا,
قاراعاندى وبلىسى قوعامدىق كەڭەسىنىڭ مۇشەسى, «Talbesik كوپبالالى انالار وداعى» قوعامدىق بىرلەستىگىنىڭ جەتەكشىسى