قازاقستاندا تۋىسقان قىرعىزستان حالقىمەن ءوزارا قۇرمەت پەن تاتۋ كورشىلىككە, كوپعاسىرلىق دوستىق ءداستۇرلەرىنە, تىلدىك جانە مادەني جاقىنداستىققا نەگىزدەلىپ قالىپتاسقان قارىم-قاتىناستار دەڭگەيىن جوعارى باعالايدى.
قىرعىز رەسپۋبليكاسىنداعى وسى جىلدىڭ ءساۋىرىندەگى قايعىلى وقيعالاردىڭ العاشقى كۇنىنەن باستاپ قازاقستان تۋىسقان حالىققا ەكىجاقتى نەگىزدە دە, ەقىۇ-نىڭ قازىرگى توراعاسى رەتىندە دە كومەك پەن قولداۋ كورسەتۋدە. گۋمانيتارلىق كومەك كورسەتىلدى, حالىقارالىق جۇك جانە جولاۋشى تاسىمالى, ءبىلىم الىپ جاتقان وقۋشىلار مەن ستۋدەنتتەردىڭ بارىپ-كەلۋى توقتالعان جوق.
سونىمەن قاتار, كورشى مەملەكەتتەگى تۇراقتىلىقتى, زاڭدىلىق پەن قۇقىق ءتارتىبىن قامتاماسىز ەتۋدەگى ەلەۋلى پروبلەمالار قازاقستان رەسپۋبليكاسىنداعى قاۋىپسىزدىك پەن قىلمىستىق احۋالعا دا ەداۋىر تەرىس ىقپال ەتۋدە. وسىنىڭ ءبارى ەل باسشىلىعىن ۇستىمىزدەگى جىلدىڭ 6 ساۋىرىنەن باستاپ قازاقستان-قىرعىزستان مەملەكەتتىك شەكاراسىنا ۋاقىتشا شەكتەۋلەر ەنگىزۋگە ءماجبۇر ەتتى.
وكىنىشكە قاراي, قىرعىز رەسپۋبليكاسىنداعى احۋال تولىقتاي رەتتەلۋ مەن تۇراقتىلىقتان ءالى دە الشاق قالىپ وتىر. قازاقستان رەسپۋبليكاسىنىڭ اۋماعىنا اتىس قارۋىن, ەسىرتكى جانە باسقا دا تىيىم سالىنعان زاتتاردى زاڭسىز الىپ ءوتۋ فاكتىلەرى ورىن الۋدا.
الايدا, قىرعىزستانداعى كۇردەلى الەۋمەتتىك-ەكونوميكالىق جاعدايدى ەسكەرە جانە بىزگە دوستاس ەل ازاماتتارىنىڭ كوپتەگەن وتىنىشتەرىن نازارعا الا وتىرىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ اعىمداعى جىلعى 20 مامىردان باستاپ قازاقستان-قىرعىزستان مەملەكەتتىك شەكاراسىنداعى:
– “قورداي”;
– “سىپاتاي باتىر”;
– “ايشا ءبيبى” وتكىزۋ بەكەتتەرىندەگى ۋاقىتشا شەكتەۋلەردى الىپ تاستاۋ جونىندە ۇكىمەتكە تاپسىرما بەردى.
وتكىزۋ بەكەتتەرى مەملەكەتتىك شەكارا ارقىلى ترانزيتتىك حالىقارالىق كولىك, جۇك جانە جولاۋشى تاسىمالىن, جەكە تۇلعالاردى, ازىق-ت ۇلىك ونىمدەرىن, دارىلىك پرەپاراتتاردى, جانار-جاعارماي ماتەريالدارىن, اۋىل شارۋاشىلىعى ونىمدەرىن وتكىزۋدى قامتاماسىز ەتەتىن بولادى.
سونىمەن قاتار, ىقتيمال قاۋىپ پەن قاتەرلەردى دەر كەزىندە بەيتاراپتاندىرۋدى قامتاماسىز ەتۋ ماقساتىندا شەكارالىق, كەدەندىك جانە كوشى-قون باقىلاۋى كۇشەيتىلەتىن بولادى.
ءبىز قىرعىزستاننىڭ ۋاقىتشا ۇكىمەتىن جاعدايدى تەزدەتىپ تۇراقتاندىرۋعا, زاڭنىڭ ۇستەمدىگىن قالپىنا كەلتىرۋگە جانە ەل حالقىنىڭ كوكەيكەستى پروبلەمالارىن شەشۋگە شاقىرامىز.
2010 جىلعى 19 مامىر.