سەناتتا جۋرناليستەر اراسىنداعى «پاراسات» بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى. بيىل «پاراسات» بايقاۋىنا 100-دەن استام جۇمىس كەلىپ تۇسكەن. اۆتورلاردىڭ قاتارىندا ەلوردامەن بىرگە وڭىرلەردەگى تەلەارنا, راديو, گازەت, اقپاراتتىق پورتال جانە باسقا دا بۇقارالىق اقپارات قۇرالدارىنىڭ قىزمەتكەرلەرى بار.
باق وكىلدەرىن كاسىبي مەرەكەلەرىمەن قۇتتىقتاعان سەنات توراعاسى ماۋلەن اشىمباەۆ مەملەكەت باسشىسىنىڭ رەفورمالارىن جانە «جاڭا قازاقستان» تۇجىرىمداماسىن ىسكە اسىرۋدى زاڭنامالىق تۇرعىدان قامتاماسىز ەتۋ جولىنداعى سەناتورلاردىڭ جۇمىسىنا توقتالدى. بۇل باعىتتا پالاتانىڭ اقپاراتتىق اشىقتىعىنا باسا ءمان بەرىلەدى.
«سەنات جۇمىسىندا قىزمەتىمىزدىڭ اشىقتىعىنا جانە باق وكىلدەرىمەن تىعىز بايلانىسقا ءاردايىم ەرەكشە كوڭىل بولەمىز. بۇل – ءبىز ءۇشىن ماڭىزدى باعىت. ءبىز سەناتتىڭ زاڭ شىعارۋ قىزمەتىن حالىققا جان-جاقتى جەتكىزۋگە مۇددەلىمىز», دەدى ماۋلەن اشىمباەۆ.
سەنات سپيكەرى دەپۋتاتتار قابىلداناتىن زاڭداردىڭ ساپاسىنا تەرەڭ ءمان بەرەتىنىن ايتتى. سونداي-اق ولار ازاماتتاردى الاڭداتقان ماسەلەلەردى ۇنەمى كوتەرىپ كەلەدى. وسى جۇمىستاردى جۇرتقا جەتكىزۋ ءۇشىن سەنات ءداستۇرلى بۇقارالىق اقپارات قۇرالدارىمەن جانە ماسس-مەديامەن بىرلەسىپ جۇمىس ىستەۋدى جالعاستىرا بەرەدى. سونىمەن قاتار پالاتا توراعاسى سەناتتىڭ زاڭ شىعارۋ قىزمەتىن حالىققا دارىپتەپ جۇرگەن جۋرناليستەردىڭ پارلامەنتتىك پۋلىنا, ەلىمىزدەگى تەلەارنا, راديو, ءباسپاسوز رەداكتسيالارىنا العىس ءبىلدىردى.
سونىمەن «پاراسات» بايقاۋىنىڭ 2022 جىلعى جەڭىمپازدارى بولىپ «ۇزدىك تەلەۆيزيا ماتەريالى» اتالىمى بويىنشا «حابار 24» تەلەارناسىنىڭ ءجۋرناليسى داستان سەيىلحان ۇلى جانە Astana TV تەلەارناسىنىڭ ءتىلشىسى يانا گلادكوۆا تانىلدى. ال «ۇزدىك ءباسپاسوز ماتەريالى» اتالىمىن ارىپتەسىمىز, Egemen Qazaqstan گازەتىنىڭ اعا ءتىلشىسى اباي وتار جەڭىپ الدى. ءدال وسىنداي اتالىممەن «رۋدنىي التاي» شىعىس قازاقستان وبلىستىق گازەتىنىڭ ۇجىمى ماراپاتتالدى.
Stan.kz اقپارات پورتالىنان اينۇر مۇحادي مەن «بەسسيمپتومنو» تەلەگرام-كانالىنىڭ جەتەكشىسى سەرىكجان ماۋلەتباي «ينتەرنەت باسىلىمدارداعى ۇزدىك ماتەريال» اتالىمىندا وق بويى وزىپ شىقسا, «الەۋمەتتىك جەلىلەردەگى ۇزدىك ماتەريال» اتالىمىن «سۇراۋى بار» YouTube ارناسىنىڭ اۆتورى ەربول سەيىلحان جانە قوعام قايراتكەرى مارات شيبۇتوۆ ءوزارا ءبولىستى.
«جاڭا قازاقستان» ارنايى جۇلدەسى ۇزدىك ساراپتامالىق ماتەريالى ءۇشىن Qazaqstan ۇلتتىق تەلەارناسىنىڭ ءجۋرناليسى جالعاس التاەۆ پەن «ەۋرازيا» ءبىرىنشى ارناسىنىڭ «گراني» تەلەۆيزيالىق باعدارلاماسىنا بەرىلدى. «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» ارنايى جۇلدەسى Tengrinews.kz اقپاراتتىق پورتالىنىڭ ۇجىمى جانە «كازاحستانسكايا پراۆدا» گازەتىنىڭ ءجۋرناليسى لاۋرا تۇسىپبەكوۆاعا تاپسىرىلدى.