استانا. 25 ءساۋىر. مىسىردىڭ تۋريزم ءمينيسترى 1 مامىردان باستاپ ەلگە كىرۋ ءۇشىن بەرىلەتىن تۋريستىك ۆيزا قۇنىنىڭ قىمباتتايتىنىن مالىمدەدى. بۇل تۋرالى Ntv.ru حابارلادى.
«ەندى ساياحاتشىلار ۆيزا الۋ ءۇشىن بۇرىنعىداي 15 دوللار ەمەس, 20 دوللار تولەيتىن بولادى», – دەدى مىسىردىڭ تۋريزم ءمينيسترى حەشام زاازۋ. ونىڭ ايتۋىنشا, ۆيزانىڭ باعاسىن ءوسىرۋ بۇرىنىراقتا جوسپارلانعان, الايدا, بيلىك ونىڭ ناقتى كۇنىن بەلگىلەمەي كەلگەن. بۇدان بۇرىن ۆيزانىڭ باعاسى 2013 جىلدىڭ قاراشاسىندا, ودان كەيىن بيىلعى اقپان ايىندا كوتەرىلەدى دەپ حابارلانعان بولاتىن.
مينيستر باعانىڭ وسۋىنەن تۋريستەر سانى ءبارىبىر ازايمايتىنىن ايتادى. «باعا كوتەرىلگەنىمەن, ول ءالى دە الەمدەگى ەڭ ارزان ۆيزالاردىڭ ءبىرى سانالادى», – دەيدى ح.زاازۋ.
جەرگىلىكتى باق وكىلدەرىنىڭ حابارلاۋىنشا, ۇستىمىزدەگى جىلدىڭ العاشقى ەكى ايىندا مىسىر 1,3 ملن. ءتۋريستتى قارسى العان. بۇل وتكەن جىلدىڭ ءدال وسى ارالىعىنداعى كورسەتكىشتەن 28 پايىزعا تومەن بولىپ شىققان.
ايدار ورىسباەۆ.
دەرەككوز: Ntv.ru.
فوتو: Reuters.com.