«قازاقستان-2050» ستراتەگياسىندا ەلباسىمىز اۋىل شارۋاشىلىعىن, اسىرەسە, اۋىلشارۋاشىلىق ونىمىنە ءوسىپ وتىرعان جاھاندىق سۇرانىس جاعدايىندا اۋقىمدى جاڭعىرتۋلار قاجەت دەپ اتاپ كورسەتتى. سونىڭ ناتيجەسىندە اگروونەركاسىپتىك كەشەننىڭ ەكولوگيالىق تازا ءوندىرىس سالاسىنداعى جاھاندىق ويىنشى بولۋى كەرەك ەكەندىگى دە باسا ايتىلدى.
ءبىز سەكىلدى شاعىن شارۋا قوجالىعىمەن اينالىساتىن كاسىپكەرلەرگە 2050 جىلعا قاراي ەل ءىجو-دەگى اۋىلشارۋاشىلىق ءونىمىنىڭ ۇلەسىن 5 ەسەگە ارتتىرۋ كەرەكتىگىن تاپسىردى. سونىمەن بىرگە ەلباسىمىز ەكسپورتقا شىعاراتىن مال ەتىنىڭ مولشەرىن 60 مىڭ تونناعا جەتكىزۋ مىندەتىن قويعالى بىرنەشە جىلدىڭ ءجۇزى بولدى.
ارينە, بۇل وزەكتى مىندەتتى ورىنداۋ ءۇشىن ەڭ الدىمەن جەكە شارۋا قوجالىقتارىنىڭ سانىن ارتتىرۋ كەرەك ەكەندىگى تۇسىنىكتى. جەكە شارۋا قوجالىقتارى اۋدان كولەمىندە كوپتەپ قۇرىلعان جاعدايدا, حالىق تۇرمىسى جاقسارۋمەن بىرگە حالىقتىڭ ەڭبەكپەن قامتاماسىز ەتىلەتىندىگى دە ايدان انىق. بۇل ەل بولىپ جۇمىلاتىن وتە ماڭىزدى شارۋا.
ءبىز 15 وتباسى قحر-دان اقمولا وبلىسى شورتاندى اۋدانى نوۆوكۋبانكا اۋىلىنا كوشىپ كەلگەنىمىزگە ون جىلعا تايادى. ءبارىمىز دەرلىك قازاقستان رەسپۋبليكاسىنىڭ ازاماتتىعىن الدىق. قازىرگى كۇندە قولىمىزداعى مالدىڭ بارلىعىن جيناقتاپ كورسەتكەندە 100 باسقا تارتا سيىر, 300 تۇياقتان استام قوي, بەس تۇياق جىلقى مالى بار. ال وسى وتباسىلارىمىزداعى 36 ادام جازدا قالاعا بارىپ, جۇمىس ىستەپ, ءوز ناپاقالارىن ايىرىپ جۇرگەن بولاتىن. 2013 جىلى ءبىز ويلاسا كەلە اعامىز بەكقوجا جىلقىبەك ۇلىنىڭ ۇيىمداستىرۋىمەن شارۋا قوجالىعىن قۇرۋدى جوسپارعا الدىق. ءسويتىپ جەڭگەم الىمقوجاقىزى قوسىنگۇل ەكەۋمىزدىڭ اتىمىزدان «اقمولا وبلىسىنىڭ اۋىل شارۋاشىلىعى قارجىلاي قولداۋ قورى» اق-تىڭ ديرەكتورى عاليا وسپانوۆانىڭ تىكەلەي جاناشىرلىقپەن قولداپ-قۋاتتاۋىنىڭ ارقاسىندا 6 ميلليون تەڭگە نەسيەلىك قاراجات الىپ, 28 باس سيىر ساتىپ الدىق. بىلتىرعى قىسقا 70 توننا ءشوپ, 80 تونناعا جۋىق سابان, 50 تونناداي جەم ازىرلەدىك. اۋىلىمىزداعى 6 ازاماتتى جۇمىسپەن قامتاماسىز ەتىپ وتىرمىز. مالدى قولدا ۇستاپ باعىپ-باپتاۋ, جەمشوپ, تاعى باسقا دا ماسەلەلەر بىلتىرعى جىلى اۋىل اكىمى راحات ماردان مەن «نوۆوكۋبانكا» شارۋا قوجالىعىنىڭ اتقارۋشى ديرەكتورى يا.بەلتس مىرزانىڭ كومەگىمەن جانە اۋداندىق اكىمدىكتىڭ قولداپ-قۋاتتاۋىمەن شەشىمىن تاپقان بولاتىن.
ءبىز الداعى جوسپارىمىزدا جايىلىمدىق جەر ماسەلەسى شەشىمىن تاۋىپ, بىزگە جايىلىمدىق جەر مەن شابىندىق جەر بەرىلەتىن بولسا, قولدا بار مالىمىزدى وتارلاتىپ باعىپ, اۋىلىمىزدا مال سانىن كوبەيىپ, اۋىل ماڭىندا جايىلىم جەتىسپەۋ ماسەلەسىن شەشۋدى ويلاستىرىپ وتىرمىز. اۋدان اكىمىنىڭ ورىنباسارى ەرلان قىزداربەك ۇلى مىرزا مەن شارۋاشىلىق ءبولىمىنىڭ مەڭگەرۋشىسى تالعات ەدىگەنوۆ اعامىز بۇل ماسەلەنىڭ وڭتايلى شەشىم تابۋىنا قول ۇشىن بەرگەلى وتىرعاندىعى ءبىزدى قۋانتىپ وتىر. ءبىز سول ارقىلى بولاشاقتا «سىباعا» باعدارلاماسى سىندى ءىرى باعدارلاما ەسەبىنەن ىرگەلى شارۋا قوجالىقتاردىڭ بىرىنە اينالۋدى جوسپارلاپ وتىرمىز.
جۇمىس ءوز ىرعاعىمەن ءبىرتىندەپ جۇزەگە اسىپ كەلە جاتقان ءدال وسىنداي مامىراجاي كەزەڭدە ءبارى دە ءوزىمىزدىڭ قۇلشىنا ەڭبەك ەتۋىمىزگە بايلانىستى ەكەندىگى ايدان انىق. قازىر ىنتاسى بار ادامعا جۇمىس جەتكىلىكتى. شەكتەۋ قويىپ وتىرعان ەشكىم جوق. قايتا ءبىزدى بارلىق اكىمشىلىك ورگاندار مەن قارجىلىق بولىمشەلەر قولداپ-قۋاتتاپ وتىر. ساۋلەتتى استانامىز ىرگەمىزدە تۇرعاندا, ەلباسىمىزدىڭ ءتيىمدى ساياساتى قولداپ-قۋاتتاپ وتىرعاندا مال شارۋاشىلىعىن ەركىن دامىتۋعا بولادى دەپ ەسەپتەيمىن.
سۇلتانيا جىلقىبەك ۇلى.
اقمولا وبلىسى.