پرەزيدەنت جانىنداعى ورتالىق كوممۋنيكاتسيالار قىزمەتىندە ءداستۇرلى بريفينگ ءوز جالعاسىن تاپتى. باسقوسۋدىڭ بۇل جولعى قوناقتارى ۇلتتىق كاسىپكەرلەر پالاتاسىنىڭ اگروونەركاسىپتىك كەشەنى كوميتەتىنىڭ حاتشىسى باۋىرجان قاسەنوۆ, وسى كوميتەتتىڭ ساراپشىسى بولات سەيسەنوۆ جانە «استانا فينانس» «ليزينگتىك كومپانياسى» اق باسقارما توراعاسىنىڭ ورىنباسارى ەربول ۋاتحانوۆ بولدى.
«ەلىمىزگە ۆەتەرينارلىق ءدارى-ءدارمەكتەردىڭ 95 پايىزى شەتەلدەن جەتكىزىلەدى. بۇل وندىرىستەردى رەسپۋبليكادا قولعا الۋ ءۇشىن مەملەكەتتىك ساتىپ الۋ ارقىلى سۇرانىستى كوبەيتۋ قاجەت. قازىرگى تاڭدا ستەپنوگور جانە تاراز قالالارىنداعى ەكى كاسىپورىن مالدىڭ اۋسىل, قۇتىرۋ اۋرۋلارىنان ەمدەۋگە, سونىمەن قاتار ءتۇرلى باكتەريالارعا قارسى ءدارى شىعارۋعا دايىن. ءتىپتى قولداۋ بىلدىرەتىن ينۆەستورلار دا بار. ەندى تەك ونىمگە سۇرانىس ءبىلدىرىپ, وتكىزەتىن نارىقتى انىقتاۋ ءلازىم», دەيدى ۇلتتىق كاسىپكەرلەر پالاتاسى اگروونەركاسىپ كەشەنى كوميتەتىنىڭ ساراپشىسى بولات سەيسەنوۆ. سونداي-اق, ول ۆەتەرينارلىق ءدارى-دارمەكتەرمەن ەلىمىزدى قامتاماسىز ەتۋ ءۇشىن ءبىز بۇگىندە يمپورتقا تاۋەلدى بولىپ وتىرعانىمىزدى دا نازاردان تىس قالدىرمادى. «بۇرىندارى بۇكىل كەڭەس وداعىن كەيبىر قاجەتتى پرەپاراتتارمەن الماتى بيوكومبيناتى قامتاماسىز ەتەتىن. كەيىندەرى ول جابىلىپ قالدى. بۇل رەتتە ۇلتتىق پالاتاعا ينۆەستورلار كەلىپ, ءوندىرىس ورنىن اشايىق دەپ ۇسىنىس بىلدىرۋدە. بىزگە ەندى سۇرانىستى قامتاماسىز ەتۋ عانا قالدى», دەدى ول.
كەيىنگى ەكى جىلدا مال شارۋاشىلىعىمەن اينالىساتىن قوجالىقتاردىڭ سانى 14 پايىزعا كوبەيگەن. وتكەن جىلى كەدەن وداعى اياسىندا ماسكەۋگە مىڭ تونناعا جۋىق ەت ءونىمى جەتكىزىلسە, بيىل ونىڭ كولەمى ون بەس مىڭ توننا بولادى دەپ جوسپارلانعان. وسى تۇرعىدا ماماندار ينتەگراتسيالىق ۇردىستەر سەپتىگىن تيگىزگەنىن ايتادى.
«ەلىمىزدە مالدىڭ 70-80 پايىزى قولايلى جاعدايدا ۇستالىپ وتىرعان جوق. سوندىقتان ءبىز «سىباعا» باعدارلاماسى اياسىندا شارۋا قوجالىقتارىنا قولداۋ كورسەتىپ, مالدى اسىلداندىرۋ سەكىلدى جۇمىستارعا كوڭىل اۋدارۋدامىز. وسىلايشا وتانىمىزداعى ەت, ءسۇت ءوندىرىسى قازىر 20 پايىزدى قۇراسا, الداعى 5-6 جىلدا 70 پايىزعا جاقىندايدى دەپ جوسپارلاۋدامىز», دەيدى ۇلتتىق كاسىپكەرلەر پالاتاسى اگروونەركاسىپ كەشەنىنىڭ حاتشىسى باۋىرجان قاسەنوۆ.
ءابدىراحمان قىدىربەك,
«ەگەمەن قازاقستان».