قازاقستان مەن يزرايل اراسىنداعى ەكىجاقتى قارىم-قاتىناستاردا ساياسي بايلانىستاردىڭ اجىراماس بولشەگى بولىپ تابىلاتىن پارلامەنتارالىق قاتىناستار ۇيلەسىم تاۋىپ كەلەدى. كنەسسەت دەپۋتاتى, پارلامەنتارالىق “يزرايل-قازاقستان” دوستىق اسسوتسياتسياسىنىڭ ءتورايىمى فاينا كيرشەنباۋمنىڭ قازاقستاندىق سەناتورعا, حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى قۋانىش سۇلتانوۆقا ارناعان ءسوزىندە ساياسي, ساۋدا-ەكونوميكالىق, عىلىمي-تەحنيكالىق جانە مادەني-گۋمانيتارلىق سالالارداعى ءوزارا ءىس-قيمىلدى ورىستەتۋدە پارلامەنتارالىق ۇنقاتىسۋدىڭ ءرولى اتالىپ ءوتىلدى.
“داعدارىستان كەيىنگى ءوسۋ, ەكونوميكانىڭ جەدەل ءارتاراپتانۋى, ادام كاپيتالىنا ينۆەستيتسيا جاساۋ, حالىق ءومىرىنىڭ ساپاسىن جاقسارتۋ, حالىق بىرلىگى مەن ۇلتتىق قاۋىپسىزدىكتى نىعايتۋ. پرەزيدەنت نۇرسۇلتان نازارباەۆتىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا ءمۇمكىندىكتەرى” جولداۋىندا قازاقستان باسشىسىنىڭ تاياۋ 10 جىلعا بەلگىلەنگەن وسىنداي نەگىزگى باعىتتارى ناقتى كورىنەدى, ولار يزرايلدە تۇسىنىستىك پەن قولداۋ تاۋىپ وتىر”, – دەپ جازادى كنەسسەت دەپۋتاتى.
قازاقستان بۇرىننان حالىقارالىق نازارعا الىنىپ كەلەدى. ەلىمىز بەن پرەزيدەنت ن.نازارباەۆتىڭ حالىقارالىق قوعامداستىقتا ەلەۋلى تۇردە ءوسىپ كەلە جاتقان بەدەلى تۋرالى, ساياسي جانە ەكونوميكالىق رەفورمالاردىڭ تانىلۋى تۋرالى ەقىۇ-عا قازىرگى توراعالىق ەتۋىمەن دالەلدەنىپ وتىر.
يسلام الەمى دە قازاقستاندى, ونىڭ ىشىندە ورتالىق ازيا ايماعىنداعى جەتەكشىلىگىن تانيدى. مۇسىلمان ەلدەرىمەن شەكارالاساتىندىقتان, ءبىز ءۇشىن مۇسىلمان الەمىمەن دە بايلانىستار اسا ماڭىزدى. “كنەسسەت دەپۋتاتى جانە يزرايل-قازاقستان پارلامەنتارالىق اسسوتسياتسياسىنىڭ ءتورايىمى رەتىندە مەن قازاقستاندا ءجيى بولامىن, – دەپ جازادى ف.كيرشەنباۋم. – ساپار كەزىندە مەن سەنات جانە ءماجىلىس دەپۋتاتتارىمەن, ساياساتكەرلەرمەن جانە ءىس ادامدارىمەن كەزدەسەمىن, ءناتيجەگە قول جەتكىزۋگە جانە ۇلتارالىق تەڭدىكتى ساقتاۋعا باعىتتالعان ۇلتتىڭ كوڭىل-كۇيى ۇنايدى”.
“ۇستىمىزدەگى جىلى, كۇزدە ءبىز قازاقستاندىق دەپۋتاتتاردى يزرايلدە كۇتەمىز”, دەي وتىرىپ, ول قازاقستان ەكونوميكاسىن جەدەل يندۋستريالىق-يننوۆاتسيالىق دامىتۋدىڭ مەملەكەتتىك باعدارلاماسىن جۇزەگە اسىرۋدى قولداۋعا يزرايل جاعىنىڭ ازىرلىگىن اتاپ ءوتتى.
ف.كيرشەنباۋمنىڭ پىكىرىنشە, ساۋدا-ەكونوميكالىق ىنتىماقتاستىق جونىندەگى ۇكىمەتارالىق قازاقستان-يزرايل كوميسسياسىنىڭ 5 وتىرىسىندا ونەركاسىپ, ماشينە جاساۋ, مەديتسينا, ءبىلىم بەرۋ, اۋىل شارۋاشىلىعىندا وسىنداي ىنتىماقتاستىقتىڭ قاجەتتىگى ناقتىلاندى.
“بىزدە ءداستۇرلى جىلى شىرايلى جانە دوستىق نەگىزىندەگى قاتىناستاردى دامىتۋعا بارلىق مۇمكىندىكتەر بار. ءبىزدى كوپتەگەن جاعدايلار: ءتىلدىڭ ورتاقتىعى مەن ءتىننىڭ ۇقساستىعى بايلانىستىرادى. مەن بىزبەن تاتۋ قازاقستان حالقىنا تابىستار مەن وركەندەۋ تىلەيمىن”, – دەدى ءوز سوزىندە پارلامەنتارالىق “يزرايل-قازاقستان” دوستىق اسسوتسياتسياسىنىڭ ءتورايىمى, دەپ حابارلادى پارلامەنت سەناتىنىڭ ءباسپاسوز قىزمەتى.