استانا. 24 ءساۋىر. استانادا 1-سىنىپ وقۋشىسىنىڭ قالتاسىنداعى ۇيالى تەلەفونى جارىلىپ, سونىڭ سالدارىنان ول 3-دارەجەلى كۇيىكپەن اۋرۋحاناعا جەتكىزىلدى. بۇل تۋرالى NUR.kz حابارلادى.
استانالىق جەتى جاسار اريانا ايتجان ءوزىنىڭ Samsung Galaxy S2 ماركالى ۇيالى تەلەفونىنىڭ جارىلۋىنان دەنەسىن كۇيىك شالىپ ءارى ەسەڭگىرەپ قالعان.
وقۋشىنىڭ اكەسى ەرلان ايتجاننىڭ ايتۋىنشا, قىز اۋلادا ويناپ ءجۇرىپتى. ول الدەنە تارس ەتكەندە, قورىققاننان ايقايلاپ جىبەرەدى. سول ساتتە دجينسي شالبارى جانا باستايدى. كيىمى ورتەنگە اريانا اينالاسىنداعىلاردى كومەككە شاقىرادى. سودان, كورشىلەر ونىڭ ءدجينسيىن شەشىپ العاندا, تەرىسى بىرگە سىپىرىلىپ تۇسكەن. كۇيىك سۇيەككە دەيىن بارعان.
ال اريانانىڭ اناسى ءاليا قامزينا: «ءبىز قازىر اۋرۋحانادا جاتىرمىز, ءسىرا, ءبىراز بولاتىن ءتۇرىمىز بار. تەرىسىن جاماۋ كەرەك. قىزىم قازىر تەلەفوننان قورقاتىن بولدى. مەن Samsung كومپانياسىنا تەلەفون شالدىم, ولار ءبارىن وتەپ, ەمدەۋ شىعىندارىن تولەۋگە ۋادە بەردى», – دەدى. قازىر قىزدىڭ اتا-انالارى پەرزەنتتەرىنىڭ دەنساۋلىعىمەن باس قاتىرۋدا. ولار بۇدان كەيىن كىنالىلەردى انىقتاۋعا كىرىسپەك.
ولار Samsung Galaxy S2 تەلەفونىن استاناداعى رەسپۋبليكا داڭعىلى بويىنداعى دۇكەننەن ساتىپ الىپتى. ەرلان ايتجان تەلەفوندى تاۋەلسىز ساراپتاماعا بەرمەك. جابىرلەنۋشىلەر ماسكەۋدەگى Samsung-ورتالىعىنا حات جازىپتى. ولار تەلەفوندى سالىپ جىبەرۋدى سۇراعان. ەرلان ايتجان: « ءبىز ازىرگە ونى جىبەرمەيمىز, الدىمەن تاۋەلسىز ساراپتاما وتكىزەمىز. قازىر ءبىز قىزىمىزدىڭ دەنساۋلىق جاعدايىمەن اينالىسۋدامىز, بىراق تا كەيىن مىندەتتى تۇردە ماسەلەنىڭ ءمان-جايىن تەكسەرتەتىن بولامىز», – دەدى.
وسى جاعدايعا بايلانىستى Samsung كومپانياسى جاعىنان تۇسىنىكتەمە بەرىلگەنىن دە ايتا كەتەلىك. ولار «ءبىز جارىلعان تەلەفوندى الىپ, مۇقيات تەكسەرۋىمىز كەرەك. سودان كەيىن ونىڭ نە سەبەپتى جارىلعانىن انىقتايتىن بولامىز. بۇل ىسكە جەڭىل قارامايمىز. ءبىز ءۇشىن تۇتىنۋشىلارىمىزدىڭ قاۋىپسىزدىگى ماڭىزدى. Samsung Kazakhstan مىندەتتى تۇردە اريانا ايتجاننىڭ اتا-اناسىمەن بايلانىسىپ وتىرادى. ولارعا قاجەتتى كومەگىمىزدى بەرەمىز» دەپتى.
جولدىباي بازار.
دەرەككوز: NUR.kz.
فوتو: Supreme.ru.