كەشە “نۇر وتان” حالىقتىق-دەموكراتيالىق پارتياسى ورتالىق اپپاراتىنىڭ عيماراتىندا مەملەكەتتىك قاراجات جۇمسالۋىن پارتيالىق باقىلاۋ كوميسسياسىنىڭ كەزەكتى وتىرىسى بولىپ ءوتتى.
بۇل جولعى وتىرىس “باتىس ەۋروپا-باتىس قىتاي” حالىقارالىق ترانزيتتىك ءدالىزى جوباسىن جۇزەگە اسىرۋ” بارىسىندا بولىنگەن قاراجاتتى ورنىمەن جۇمساۋعا ارنالدى. كولىك جانە كوممۋنيكاتسيا ءمينيسترى ابىلعازى قۇسايىنوۆ نۇروتاندىقتار الدىندا اتالعان جوبا بويىنشا بۇگىنگى كۇنگە دەيىن اتقارىلعان جۇمىستار جايىنان ەسەپ بەردى.
ءمينيستردىڭ ايتۋىنشا, “باتىس ەۋروپا – باتىس قىتاي” مەگا-جوباسىنىڭ قۇرىلىسى بارىسىندا 2 مىڭ 452 شاقىرىم جول قايتا ءجوندەلەتىن بولادى. نەگىزىنەن, وسى حالىقارالىق ترانزيت ءدالىزى ەلىمىزدىڭ 5 وبلىسىنىڭ اۋماعىن قامتيدى. وندا 7,9 ميلليون حالىق قونىستانسا, قۇرىلىس بارىسىنا قاجەتتى ينەرتتى ماتەريالدار مەن اۆتو جانە تەمىر جول تاسىمالداۋشىلارىن قوسا ەسەپتەگەندە, 12 مىڭ 62 ادام جۇمىسپەن قامتىلىپ وتىر. بۇعان قوسا, ءدالىز بويىنداعى وبلىستاردا اسفالت-بەتون زاۋىتتارى سالىنسا, ماۋسىم ايىنىڭ سوڭىنا دەيىن تاعى 7 زاۋىت ىسكە قوسىلادى.
“قازىرگى تاڭدا جولدىڭ ءاربىر ۋچاسكەسى بويىنشا اتقارىلاتىن جۇمىستاردىڭ ناقتى مەرزىمدەرى بەلگىلەنگەن. جوبا بويىنشا بارلىق جۇمىستار مەن ولاردىڭ اتقارىلۋ مەرزىمىنە ىجداعاتتىلىقپەن مونيتورينگ جۇرگىزۋدەمىز. ەگەر بەلگىلەنگەن مەرزىم بۇزىلسا, وعان قاتىستى ءتيىستى شارا قولدانىلادى. قورىتا ايتقاندا, جوبانى بەلگىلەنگەن ۋاقىتىندا, ءتيىستى تالاپتارعا تولىق جاۋاپ بەرەتىندەي دەڭگەيدە اياقتايمىز”, دەدى مينيستر.
انار تولەۋحانقىزى.