بۇل تۋرالى قر مادەنيەت جانە سپورت ۆيتسە-ءمينيسترى ەرجان ەركىنباەۆ ءمالىم ەتتى, دەپ حابارلايدى Egemen.kz.
«بيىل ەلىمىزگە 500 مىڭنان 1 ميلليونعا دەيىن شەتەلدەن تۋريست كەلەدى دەپ بولجاپ وتىرمىز. بۇعان دەيىن پاندەمياعا بايلانىستى شەكارالار جابىلىپ, شەكتەۋلەر قويىلعان ەدى. بۇگىنگى تاڭدا بارلىق شەكتەۋ الىنىپ تاستالدى. قازاقستانعا كەلۋ بويىنشا 74 ەلگە ۆيزاسىز رەجيم قايتارىلدى. بۇل ءتىزىمدى 100-گە دەيىن ارتتىرۋدى جوسپارلاپ وتىرمىز. كەشەدەن باستاپ ەلەكتروندى ۆيزا بەرۋ قايتا جانداندى. قازىرگى ۋاقىتتا يران, قىتاي, ءۇندىستان ازاماتتارى ءۇشىن ۆيزاسىز رەجيم ەنگىزۋ ماسەلەسى پىسىقتالۋ ۇستىندە», دەدى ەرجان ەركىنباەۆ ەلوردادا اشىلعان «Qazaqstan Live Fest – 2022» اتتى حالىقارالىق كورمە بارىسىندا.
ونىڭ ايتۋىنشا, بۇگىندە ىشكى تۋريستەردىڭ سانى 6,9 ملن-عا جەتىپ, رەكوردتىق كورسەتكىشكە قول جەتتى.