قازاق حالقىنىڭ ارعى-بەرگى تاريحىندا ەل كوشىن باستاعان حاندار مەن بيلەرىمىز, كوسەمدەرىمىز بەن شەشەندەرىمىز قانداي دا ءبىر تاعدىرشەشتى كەزەڭدە ۇلىتاۋعا جينالىپ, مامىلەلەسكەنى تاريحتان ءمالىم.
جوشى ءوزىنىڭ عالامدىق ۇلى جورىقتارىنا ءدال وسى قاسيەتتى ۇلىتاۋدا ۇلىسىمەن باتالاسىپ, جولعا شىققان. بەرىسى رەسەيدە, ءارىسى كارى قۇرلىقتا اتىنىڭ اۋىزدىعىن اعىتقان باتىي دا جوشىنىڭ بايراعىن وسى ۇلىتاۋدا قولىنا العان.
الىپ شاھارلاردى وتقا وراعان التىن وردانىڭ حانى توقتامىسقا, ەر ەدىگەگە ماڭگىلىك جەر بەسىك بولعان مەكەن بۇل. ءتۇبى ءبىر تۇركى كوسەمدەرىمەن ىمىراعا كەلە الماي كەتكەن ءامىر تەمىر ءوزىنىڭ تاعدىرىن التىنشوقىداعى تاسقا قاشاپ قالدىردى.
قاسقا جولى جارعىعا اينالعان قاسىم حاننىڭ اقتىق اسى وتكەن ۇلىتاۋ بۇل.
الاتاۋدىڭ ارعى قاپتالىندا قاپىدا كەنە حاننىڭ باسى يىعىنان دومالاپ بارا جاتقاندا ءبىر ءتۇيىر توپىراعى بۇلك ەتە قالعان ۇلىتاۋ!
ۇلىتاۋ – ءبىزدىڭ اتا-بابالارىمىزدىڭ مىڭداعان جىل رۋحاني اڭىزىنا اينالعان, اقىندار جىرىنا ارقاۋ ەتكەن, سىن ساعاتتا ءپاتۋا مىنبەرى بولعان قاسيەتتى ءتور! قىرىم مەن ءۇرىمنىڭ ۇرەيىن العان كوشپەندىلەردىڭ كوشىن باستاعان حاندار مەن بيلەردىڭ جولى ءدال وسى ۇلىتاۋدان باستالعان.
مەملەكەت باسشىسى قاسىم-جومارت توقاەۆ سول قاسيەتتى توردە ەلدىك پەن بىرلىكتىڭ بايراعىن جەلبىرەتىپ, ۇلتتىق قۇرىلتاي شاقىرعان ەدى. سول ءساتتىڭ مەزگىل ساعاتى سوقتى. سالتاناتى جاراسقان بايسالدى ماجىلىستەن حالىقتىڭ كۇتەتىن ءۇمىتى مەن سەنىمى مول.
ۇلىتاۋ بايتاعىنداعى جوشى حان كەسەنەسىنىڭ ىرگەسىنە اق شاتىر تىگىلىپ, بايراعى جەلبىرەگەن ۇلتتىق قۇرىلتاي قازاق ەلىنە, ەل-حالىققا قايىرلى بولعاي!
جاناربەك ءاشىمجان,
ءماجىلىس دەپۋتاتى