استانا قالاسىندا 1-2 شىلدەدە “داعدارىستان كەيىنگى كەزەڭدەگى تۇراقتى ەكونوميكالىق ءوسىم” اتتى ەكونوميكالىق ءۇشىنشى فورۋم ءوز جۇمىسىن باستاماق. بيىلعى جىلى الەمنىڭ ەلۋ مەملەكەتىنەن كەلەتىن ساياسي جانە ىسكەر ورتانىڭ ەكى مىڭنان استام وكىلدەرىن جينايتىن ءۇشىنشى ەكونوميكالىق فورۋم قارساڭىندا الماتىدا وسى ءىرى شاراعا ارنالعان ءباسپاسوز ءماسليحاتى بولىپ ءوتتى.
ءباسپاسوز ءماسليحاتىنا قاتىسقان ەل پرەزيدەنتىنىڭ كومەكشىسى باقىت سۇلتانوۆ قازاقستان استاناسىندا جىل سايىن وتكىزىلەتىن ءداستۇرلى فورۋمنىڭ كۇن تارتىبىندەگى وزەكتى ماسەلە – الەمدىك داعدارىستان كەيىنگى تۇراقتى دامۋ توڭىرەگىندە ءسوز قوزعادى. ونىڭ ايتۋىنشا, استانا ەكونوميكالىق فورۋمىنىڭ ماڭىزدىلىعى ۋاقىت وتكەن سايىن ارتا تۇسۋدە, ونىڭ وزىندىك سەبەپتەرى دە بار. بيىلعى فورۋمعا قاتىسۋشىلاردىڭ اراسىندا نوبەل سىيلىعىنىڭ ءۇش بىردەي لاۋرەاتىنىڭ بولۋى دا كوپ نارسەدەن حابار بەرسە كەرەك.
ەكونوميكالىق ماسەلەلەردى ورتاعا سالاتىن ءىرى فورۋم مەملەكەت باسشىسىنىڭ باستاماسىمەن دۇنيەگە كەلگەن. بۇل ورايدا, سانكت-پەتەربۋرگتە 2007 جىلى وتكەن ەكونوميكالىق فورۋمدا پرەزيدەنت عالىمداردىڭ ەۋرازيا ەكونوميكالىق كلۋبىن قۇرۋ تۋرالى باستاما كوتەرىپ, سول كلۋبتىڭ تىلدەستىك الاڭى استانا ەكونوميكالىق فورۋمى بولعاندىعىن اتاپ ايتۋ قاجەت.
باقىت سۇلتانوۆ ءباسپاسوز ءماسليحاتىنا جينالعاندارعا استانا ەكونوميكالىق ءۇشىنشى فورۋمىنىڭ نەگىزگى ەرەكشەلىكتەرى جونىندە جان-جاقتى بايانداپ بەردى.
– شەتەلدىك كاسىپكەرلەر مەن ونەركاسىپشىلەر جانە وزگە دە سالالاردىڭ باسشىلارى قاتىساتىن ىسكەرلىك فورۋمى استانا ەكونوميكالىق فورۋمىنداعى ۇلكەن وقيعاعا اينالادى دەپ كۇتىلۋدە. بۇل باسقوسۋداعى باستى ماقسات – ەۋرازيا كەڭىستىگىندە ءوزارا ساۋدا-ەكونوميكالىق بايلانىستار جانە ينۆەستيتسيالىق ىنتىماقتاستىقتى كەڭەيتۋگە باعىتتالعان ىسكەرلىك كونگرەسىن قۇرۋ بولىپ تابىلادى. تاعى ءبىر اتاپ ايتاتىن ءجايت, ءۇشىنشى فورۋم “G 20”-نىڭ بيىل وتەتىن ەكى سامميتىنىڭ ارالىعىندا اشىلماق. انىعىراق ايتقاندا, “G 20”-نىڭ ءبىر ءسامميتى – تورونتودا, ال ەكىنشىسى سەۋل قالاسىندا وتىلەدى دەپ جوسپارلانۋدا. جيىندا الەمدىك داعدارىستان كەيىنگى الەۋمەتتىك-ەكونوميكالىق قاۋىپسىزدىكتى قامتاماسىز ەتۋدىڭ وزەكتى ماسەلەلەرى تالقىلانباق, – دەيدى باقىت تۇرلىحان ۇلى.
فورۋمعا قاتىسۋشىلاردىڭ اراسىندا ەقىۇ باس حاتشىسى مارك پەررەن دە بريشامبو, ەكونوميكالىق ىقپالداستىق جونىندەگى ۇيىمنىڭ باس حاتشىسى, اۋعانستان پرەزيدەنتى كەڭەسشىسى مۇحامماد ماارۋفي جانە ەۋروپا ورتالىق بانكى, ازيا دامۋ بانكى, ءىرى ينۆەستيتسيالىق كومپانيالار جانە وزگە دە ءىرى ۇيىمدار وكىلدەرى بار. جيىن شەڭبەرىندە داعدارىستان كەيىنگى رەتتەۋ جاعدايىندا يسلامدىق قارجىلاندىرۋدى رەتتەۋ تەتىكتەرىنە ارنالعان حالىقارالىق عىلىمي كونفەرەنتسيا ۇيىمداستىرىلادى.
مەملەكەت باسشىسىنىڭ كومەكشىسى استاناداعى ەكونوميكالىق ءۇشىنشى فورۋم اياسىندا يننوۆاتسيالىق تەحنولوگيالاردى دامىتۋدا ماڭىزدى ءرول اتقاراتىن يننوۆاتسيالىق كونگرەسس وتكىزىلەتىندىگىن دە حابارلادى. ۇلتتىق يننوۆاتسيالىق ەكونوميكانى دامىتۋدىڭ وزىق تاجىريبەسىمەن جانە ورتالىق ازيا ەلدەرى مەن قازاقستاندا يننوۆاتسيالىق ساياساتتارعا ارنالعان ۇسىنىستارىمەن فينليانديا, نورۆەگيا, گەرمانيا, كورەيا, فرانتسيا جانە يزرايل ەلدەرىنىڭ يننوۆاتسيالار جانە تەحنولوگيالار جونىندەگى مەملەكەتتىك قۇرىلىمدارىنىڭ وكىلدەرى وي بولىسپەك. سونىمەن قاتار, اتالعان ءىس-شارا اياسىندا يندۋستريالىق-يننوۆاتسيالىق جوبالار مەن عىلىمي ەڭبەكتەر كورمەسى دە ۇيىمداستىرىلادى.
باقىت بالعارينا,
الماتى.