مەسسەندجەرلەر مەن الەۋمەتتىك جەلىلەردە تاراتىلىپ جاتقان ەل پرەزيدەنتىنىڭ جارلىعىمەن 2023 جىلعى 1 قاڭتاردان باستاپ ايەلدەردىڭ زەينەتكە شىعۋ جاسى 58 جاسقا دەيىن تومەندەتىلەتىنى تۋرالى اقپارات شىندىققا جاناسپايدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
ايەلدەردىڭ زەينەتكە شىعۋىنىڭ زاڭنامامەن بەلگىلەنگەن جاسى حالىقارالىق جانە وتاندىق ساراپشىلار جۇرگىزگەن زەرتتەۋلەر ناتيجەلەرى مەن ۇزاق مەرزىمدى اكتۋارلىق بولجامدارعا نەگىزدەلگەن, حالىقارالىق پراكتيكاعا جانە الەمدەگى قالىپتاسىپ وتىرعان ەكونوميكالىق جانە دەموگرافيالىق جاعدايعا سايكەس كەلەتىنىن ەستەرىڭىزگە سالامىز. بەكىتىلگەن جاس مولشەرى بازالىق جانە ىنتىماقتى زەينەتاقىنى جانە بىرىڭعاي جيناقتاۋشى زەينەتاقى قورىنان (بۇدان ءارى – بجزق) تولەنەتىن تولەمدەردى ەسكەرە وتىرىپ, قازاقستاندىقتار قۇرمەتتى دەمالىسقا شىققاننان كەيىن ءتيىستى زەينەتاقى تولەمدەرىن قالىپتاستىرۋ قاجەتتىلىگىمەن نەگىزدەلگەن.
بۇل رەتتە ىنتىماقتى زەينەتاقى جۇيەسى بىرتىندەپ قىسقارۋدا, ويتكەنى ولاردى تاعايىنداۋ كەزىندە 1998 جىلعى 1 قاڭتارعا دەيىن, ياعني جيناقتاۋشى جۇيە ەنگىزىلگەنگە دەيىن ازىرلەنگەن ەڭبەك ءوتىلى ەسكەرىلەدى. وسىعان بايلانىستى مىندەتتى زەينەتاقى جارنالارى ەسەبىنەن قالىپتاستىرىلاتىن جيناقتاۋشى زەينەتاقىنىڭ ءرولى ارتادى, زەينەتاقى جارنالارىن اۋدارۋ كەزەڭى مەن مولشەرى نەعۇرلىم كوپ بولسا, ول سوعان سايكەس جوعارى بولادى.
ىنتىماقتى ەڭبەك ءوتىلى جوق جانە بۇگىندە جيناقتاۋشى زەينەتاقى جۇيەسىنە قاتىسپايتىن قازاقستاندىقتار ءۇشىن 50+ جاسىندا ەرتە زەينەتكە شىعۋ لايىقتى تولەمدەردى قامتاماسىز ەتپەيدى.
سونىمەن قاتار قولدانىستاعى زاڭناماعا سايكەس ازاماتتارعا زەينەتكەرلىككە ەرتە شىعۋ قۇقىعى بەرىلەدى. وسىلايشا, بجزق-دا زەينەتاقى جيناقتارى 55 جاسقا (ەرلەر) جانە 52,5 جاسقا (ايەلدەر) تولعاندا جەتكىلىكتى بولعان كەزدە قازاقستاندىقتار زەينەتاقى اننۋيتەتىن رەسىمدەي الادى (زەينەتاقى جاسىنا جەتكەنگە دەيىن زەينەتاقى جيناقتارىنان زەينەتاقى تولەمدەرىن الۋ قۇقىعى).
2021 جىلدان باستاپ بجزق سالىمشىلارىنىڭ كەيىنگە قالدىرىلعان زەينەتاقى اننۋيتەتى شارتىن جاساسۋ مۇمكىندىگى بار. ياعني ايەلدەر ونى 42,5 جاستا, ەرلەر 45 جاستا جاساي الادى. بۇل رەتتە ساقتاندىرۋ ۇيىمىنان تولەمدەر تيىسىنشە 52,5 جانە 55 جاستا جۇزەگە اسىرىلا باستايدى.
زياندى ەڭبەك جاعدايلارىندا جۇمىس ىستەيتىن ازاماتتار زەينەتاقى اننۋيتەتىن 40 جاستان پايدالانا الادى, بۇل رەتتە وسىنداي شارتتار بويىنشا تولەمدەر 50 جاستان باستالادى.
2022 جىلى قارجى نارىعىن رەتتەۋ جانە دامىتۋ اگەنتتىگىنىڭ دەرەكتەرى بويىنشا ەرلەر ءۇشىن جەدەل زەينەتاقى اننۋيتەتىنىڭ قۇنى – 7,1 ملن تەڭگە, ايەلدەر ءۇشىن – 9,5 ملن تەڭگە, ەرلەر ءۇشىن كەيىنگە قالدىرىلعان زەينەتاقى اننۋيتەتىنىڭ قۇنى – 6,5 ملن تەڭگە, ايەلدەر ءۇشىن – 8,1 ملن تەڭگە.
ازاماتتاردان فەيكتەرگە نازار اۋدارماۋدى جانە اقپاراتتى تەك رەسمي دەرەككوزدەردەن پايدالانۋدى سۇرايمىز.
ەستەرىڭىزگە سالا كەتەيىك, جالعان اقپارات تاراتۋ زاڭ بويىنشا جازالانادى.