دەبات تۋرنيرلەرىنىڭ جەڭىمپازدارى قوماقتى اقشالاي سىيلىقتار مەن ءبىلىم گرانتتارىن الادى. بيىل قازاقستاننىڭ 6 جوعارى وقۋ ورنى پىكىرتالاس جۇلدەگەرى اتانعان 12 مەكتەپ تۇلەگىنە ءبىلىم گرانتىن بەردى.
گرانت بەرگەن جوعارى وقۋ ورىندارى اراسىندا قورقىت اتا اتىنداعى قىزىلوردا ۋنيۆەرسيتەتى, س.امانجولوۆ اتىنداعى شىعىس قازاقستان ۋنيۆەرسيتەتى, ح.دوسمۇحامەدوۆ اتىنداعى اتىراۋ ۋنيۆەرسيتەتى, تۇران ۋنيۆەرسيتەتى, Satbayev University جانە نارحوز ۋنيۆەرسيتەتى بار. سونداي-اق جاستار سايىستارعا قاتىسقانى ءۇشىن گراموتالارمەن, كۋبوكتارمەن جانە 200 مىڭنان 500 مىڭ تەڭگەگە دەيىن اقشالاي سىيلىقتارمەن ماراپاتتالادى. ءبىلىم جانە عىلىم مينيسترلىگىنىنىڭ مالىمدەۋىنشە, بۇگىنگى تاڭدا ەلىمىزدە 120 944 وقۋشى مەن ستۋدەنتتى قامتيتىن 6 778 دەبات كلۋبى بار.
رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى رايسا شەر ەلىمىزدە جاستاردىڭ دەبات قوزعالىسى بەلسەندى تۇردە دامىپ كەلە جاتقانىن جەتكىزدى.
«ەكى جىل بۇرىن 4 405 مەكتەپ پەن ستۋدەنتتىك كلۋبتا 66 186 پىكىرسايىسشى بولسا, بۇگىندە ولاردىڭ سانى 120 مىڭنان استى. كلۋب مۇشەلەرى سىندارلى تالقىلاۋ ونەرىن ۇيرەنەدى, باسقا دەباتشىلارمەن دوستىق جانە سىيلاستىق قارىم-قاتىناس ورناتادى. سونىمەن قاتار ولار وي-ءورىسىن كەڭەيتىپ, شىعارماشىلىق بەلسەندىلىگىن ارتتىرادى. بيىل بالالار جىلى اياسىندا بەس دەبات ءتۋرنيرى ۇيىمداستىرىلماق. قازىرگى تاڭدا ونىڭ ەكەۋى وتكىزىلدى. وعان 500-گە جۋىق وقۋشى مەن ستۋدەنت قاتىسىپ, كامەلەتكە تولماعانداردى وقىتۋ, تاربيەلەۋ جانە ولاردىڭ قۇقىقتارىن قورعاۋدىڭ ماڭىزدى ماسەلەلەرىن كوتەرگەن بولاتىن», دەپ حابارلايدى.
اتالعان مينيسترلىكتىڭ دەرەگىنە سۇيەنسەك, وقۋشىلاردى دەبات ونەرىنە باۋليتىن تاجىريبەلى پىكىرسايىسشىلار پۋلى قۇرىلعان. پۋل 100-دەن اسا ماماننان تۇرادى. ال كوللەدجدەر مەن مەكتەپتەردە, پەداگوگيكالىق جوعارى وقۋ ورىندارىندا دەبات كلۋبتارىنا كومەكتەسۋ ءۇشىن ستۋدەنت دەسانتشىلار, ەرىكتىلەر توبى جۇمىس ىستەپ جاتىر. ولار مەكتەپتەردە ترەنينگتەر مەن شەبەرلىك ساباقتارىن وتكىزىپ, تۋرنيرلەردى ۇيىمداستىرۋ كەزىندە ۆولونتەرلىك كومەك كورسەتپەك.
ارۋجان ناعاشىباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى