جاڭا وبلىس ورتالىقتارى وڭىرلەردى دامىتۋعا جاڭا سەرپىن بەرەدى. بۇل تۋرالى ورتالىق كوممۋنيكاتسيالار قىزمەتىندە قر ۇلتتىق ەكونوميكا ءمينيسترى الىبەك قۋانتىروۆ ءمالىم ەتتى, دەپ حابارلايدى Egemen.kz.
«بيىل 16 ناۋرىزدا مەملەكەت باسشىسى ءوزىنىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىندا اباي, جەتىسۋ, ۇلىتاۋ وبلىستارىن قۇرۋدى ۇسىندى. اكىمشىلىك-اۋماقتىق قايتا قۇرۋ اۋماعى 935 مىڭ شارشى كم (ەل اۋماعىنىڭ 35%) اۋماقتا تۇراتىن شامامەن 5 ملن تۇرعىننىڭ (4,9 ملن ادام, ەل حالقىنىڭ 25%) ومىرىنە اسەر ەتەتىنىن اتاپ وتكەن ءجون. ونىڭ ىشىندە اۋدانى 493 مىڭ شارشى كم (ەل اۋماعىنىڭ 18%-ى) بولاتىن اباي, جەتىسۋ, ۇلىتاۋ جاڭا وبلىستارىندا شامامەن 1,5 ملن ادام (ەل حالقىنىڭ 7,8%) تۇرادى. ەلدىڭ اكىمشىلىك-اۋماقتىق قۇرىلىسىنداعى وسى وزگەرىستەر الەۋمەتتىك-ەكونوميكالىق دامۋداعى تەڭگەرىمسىزدىكتى تومەندەتۋ جانە وڭىرلەردىڭ اۋماقتىق بايلانىسىن قامتاماسىز ەتۋ نەگىزىنە باعىتتالعان جاڭا وڭىرلىك ساياساتتىڭ باسىمدىقتارىنا تولىق سايكەس كەلەدى», دەدى الىبەك قۋانتىروۆ.
ونىڭ ايتۋىنشا, سەمەي, جەزقازعان جانە قوناەۆ قالالارىنا وبلىس ورتالىعى مارتەبەسىن بەرۋ وڭىرلەردى دامىتۋعا جاڭا سەرپىن بەرەدى.
«بۇگىندە بۇل قالالاردا ينفراقۇرىلىمنىڭ توزۋىنا, جولداردىڭ ساپاسىنا, كولىك جۇيەسىنىڭ جاي-كۇيىنە بايلانىستى پروبلەمالار بار. جاڭا مارتەبە وسى قالالارعا ينۆەستيتسيا اعىنىن ۇلعايتادى جانە اۋماقتىق-اكىمشىلىك ءبولىنىستىڭ نەعۇرلىم ۇتىمدى ەسەبىنەن جەرگىلىكتى پروبلەمالاردى نەعۇرلىم ءتيىمدى شەشۋگە مۇمكىندىك بەرەدى. جالپى, مەملەكەت باسشىسىنىڭ بۇل رەفورماسى وڭىرلەردە جيناقتالعان پروبلەمالاردى كەشەندى شەشۋگە جانە ولاردىڭ ودان ءارى دامۋىنىڭ كەدەرگىلەرىن جويۋعا باعىتتالعان. مەملەكەت باسشىسىنىڭ جاڭا وبلىستاردى قۇرۋ جونىندەگى باستاماسى حالىق, جۇرتشىلىق, قارالىپ وتىرعان وڭىرلەردىڭ اۋداندىق جانە وبلىستىق دەڭگەيدەگى دەپۋتاتتارى اراسىندا قولداۋ تاپتى», دەدى مينيستر.