وسى جىلعى 1 ماۋسىمداعى جاعداي بويىنشا رەسپۋبليكانىڭ 434 كاسىپورنىندا 8,8 مىڭ جۇمىسكەرگە جالاقى بويىنشا بەرەشەگى بارى انىقتالدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
«جىل باسىنان بەرى مەملەكەتتىك ەڭبەك ينسپەكتورلارى 6,8 مىڭنان استام جۇمىسكەردىڭ قۇقىعىن قورعادى. وسى جىلعى 1 ماۋسىمداعى جاعداي بويىنشا مەملەكەتتىك ەڭبەك ينسپەكتورلارى رەسپۋبليكانىڭ 434 كاسىپورنىندا 8,8 مىڭ جۇمىسكەردىڭ الدىندا 1 ملرد 996 ملن تەڭگەدەن استام سوماعا جالاقى بويىنشا بەرەشەكتى انىقتادى», دەلىنگەن ۆەدومستۆو حابارلاماسىندا.
وسى كاسىپورىنداردىڭ باسشىلارىنا ورىندالۋى مىندەتتى 298 نۇسقاما بەرىلىپ, 52,5 ملن تەڭگەدەن استام سوماعا ايىپپۇل سالىنعان.
«قابىلدانعان شارالار, سونىڭ ىشىندە جالاقى بويىنشا بەرەشەكتى وتەۋدىڭ قاتاڭ ساقتالۋى ءتيىس كەستەلەرى مەن مەرزىمدەرىن بەلگىلەۋ ناتيجەسىندە 6,8 مىڭنان استام جۇمىسكەردىڭ قۇقىعى قورعالدى. ولارعا 1 ملرد 754,5 ملن تەڭگە تولەندى», دەپ تولىقتىردى مينيسترلىك.