اتىراۋ وبلىسى قۇرمانعازى اۋدانىنىڭ ورلى كەنتىندەگى مەكتەپتىڭ ءوز جىلىجايى بولادى. قازىرگى تاڭدا جىلىجايدىڭ قۇرىلىسى قىزۋ جۇرگىزىلىپ جاتىر. بۇل تۋرالى ازاماتتىق باستامالاردى قولداۋ ورتالىعىنىڭ ءباسپاسوز قىزمەتى حابارلادى.
بۇگىنگى تاڭدا «قۇرمانعازى – تۋعان جەر» قوعامدىق قورى بالالاردى ەڭبەككە باۋلۋ, ولارعا كوكونىس ءوسىرۋ تەحنولوگيالارىن ۇيرەتۋ ماقساتىندا ورلى اۋىلىندا نۇعمان ماناەۆ اتىنداعى جالپى ورتا مەكتەپتە جىلىجايدىڭ قۇرىلىس جۇمىستارىن جۇرگىزىپ جاتىر. جاقىن ارادا مۇندا كوكونىستەر ەگىلىپ, وقۋشىلارعا ارنالعان پراكتيكالىق ساباقتار وتكىزىلمەك. بۇل ساباقتاردا جاسوسپىرىمدەر كوكونىستىڭ تۇرلەرىن كۇتۋ داعدىلارىنا, سۋارۋ تاسىلدەرىنە, ءتۇرلى مينەرالدارعا قاتىستى بىلىكتىلىگىن ارتتىرا الادى. قوعامدىق قور جەتەكشىسى ازامات ابدۋللاەۆتىڭ ايتۋىنا قاراعاندا, جوبا وقۋشىلارعا بولاشاق ماماندىقتارىن تاڭداۋعا سەپتىگىن تيگىزىپ قانا قويماي, اۋدان جاستارى اراسىندا ۆولونتەرلىك قوزعالىستىڭ جاندانۋىنا ارقاۋ بولادى.
ء«بىزدىڭ اۋداندا 32 مەكتەپ بار. ءبىر وكىنىشتىسى, ولاردىڭ ەشبىرىندە جىلىجاي جوق. جىلىجايدى مەكتەپتە ورناتۋ ارقىلى ءبىز وقۋشىلاردى ەڭبەكسۇيگىشتىككە شاقىرامىز, ءوز ەڭبەگىمەن تازا ءونىم الۋدى ۇيرەتەمىز. جىلىجايدا ارنايى ساباقتار وتكىزەمىز. بىزگە كورشى مەكتەپتەردىڭ دە وقۋشىلارى كەلەدى. ولار ۆولونتەرلىك نەگىزدە اۋدانىمىزدىڭ كوگالدانۋىنا ءوز ۇلەسىن قوسادى. ءتىپتى مۇنداي شارالار ساباقتارعا قاتىساتىن بالالاردىڭ بولاشاقتا اگرونوميا سياقتى ماماندىقتى تاڭداۋىنا سەپ بولا الادى», دەيدى ازامات ابدۋللاەۆ.
جوبانى «قۇرمانعازى – تۋعان جەر» قوعامدىق قورى «شەلل قازاقستان» كومپانياسى جانە ازاماتتىق باستامالاردى قولداۋ ورتالىعىنىڭ «ەكوباتىس» باستاماسى ششەڭبەرىندە ىسكە اسىرادى. قور باسشىسى جىلىجايدىڭ قۇرىلىس جۇمىستارىن ماۋسىمدا اياقتاپ, ەگۋ شارالارىن باستاۋدى جوسپارلاپ وتىر.